1 हरेक महायाजक मानुसगिन लक लियो जावासेत। अना मानूसगिन को कन लक, परमेस्वर को बारे मा काम करासेत। वोला एकोलाय ठहरायो जासे का पाप को भेट अना बली दुई चघाय। 2 काहेकी वा खुद च कमजोरी लक घिरो रव्हसेत। यो काजी वा अगियानी अना भुलो भटको को संग सहनभुती को बरताव करे। 3 एकोलाय वोला आपरो पापगिन लाय अना वसोच लोकगिन को लाय पापगिन को बली चघानो पड़ासेत। 4 यो मान कोनी ला आपरो आप नही भेटासेत। जब तकन हारून जसो परमेस्वर को कन लक ठैयरायो नही जावासेत।

5 असोच मसीह ना भी महायाजक बनन को गौरव स्वता नही लियो।

बल्कि परमेस्वर ना वोको लक कह्यो,

"तू मोरो टूरा आस आज मीना तोला जलमायो सेउ ।"महायाजक आपरो कपरा अना धुपदानी को संग

6 असोच उ अखीन एक जघा मा कव्हसेत,

"तू मलिकिसिदक को रित लक

सदा को याजक सेत।"

7 यीसु आपरी देह मा रव्हत बेरा, हकल-हकल के अना आसू बोहा-बोहा के परमेस्वर लक पिराथना अना बिनती करीस, अना बिनती, भगती को कारन वोको आयको गई। 8 टूरा होवनो को बाउजुद भी वोना दुख उचल-उचल के हुकूम माननो सिकिस। 9 अना एक बार पुरो होवन को मघा उन सबको लाय जोन वोको हुकूम मानासेत। उ अमर सूटकारा को ठिकान बन गयो। 10 अना परमेस्वर को कन लक मलिकिसिदक को रीत लक वोला महायाजक बनायो गयो।

11 एको बारेमा आमरो जवर कव्हन लाय लगत सेत मंग समझानो कठीन सेत। काहेका तुम्हरो समज लगत मध्दो सेत। 12 सहीमा तुमीला अबा तकन सिक्सक बन जानो होतो। पर तुम्हीला तो अबा कोनी असो मानूस को जरुरत सेत। जोन तुम्हिला नवा सिरो लक परमेस्वर को सिक्सा को सुरुवात को गोस्टी सिकायेत। तुम्हिला बस अबा दूध च पाहीजे, जेवन नही। 13 जोन अबा दुध-मुहा लेकरा सेत। वोला नियम को बचन ला चिन्हनो नही आवासेत। 14 पर जेवन तो सियानो काजी सेत जोनला खरो-खोटो को गियान सेत।