1 एकोलाय पवीतर भाऊ अना बहिन हुन! तुमी सरग मा हाकलो जान को हिस्सादार सेव। यीसु पर धियान लगाव जोन आमी ला पेरीत अना मुखिया याजक मानिसेजन। 2 जसो परमेस्वर को सारो घराना मा मोसे भरोसा को काबिल बनो रहयो, वसोच उभी आपरो ठहरानवारा को डोरा मा भरोसा को काबिल बनो रहयो। 3 जसो घरको बनावन वारा घर लक जादा आदर को काबिल होवासेत वसोच यीसु भी मोसे लक बड़के महिमा अना आदर को लायक समझो गयो। 4 काहेका हरेक घर कोनी ना कोनी लक बनायो जासेत। पर सक्ड़या चीजला बनावन वारा परमेस्वर सेत। 5 परमेस्वर को सारो घराना मा मोसे तो नौकर जसो भरोसा को काबिल रहयो का मघा मा होवनवालो गोस्टी को पुरुप भई जाय। 6 पर मसिहा तो टूरा जसो परमेस्वर को घराना को वारिस सेत। अदी आमी आपरो भरोसा अना आस मा घमंड ला आखीर तकन मजबुति लक थाम सेजन त हमच वोको घराना सेजन।

7 एकोलाय जसो पवीतर आतमा कव्हसेत "अदी आज तुम वोको हाकलनो आयको 8 तो आपरो मन ला गोटा वानी नोको करो। जसो जगंल मा परिक्सा को बेरा उनना करिया होता जेनको लक परमेस्वर हिजर गयो होतो।" 9 उता तुमरो आजा बाबा गीन ना मोला परखिन अना चाड़ीस साल तकन मोरो काम चोविन। 10 एकोलाय मीना यो बेरा को लोकगीन लक हिजर के सागयो इनको मन हमेसा लक इतानी उतानी हिंडा सेत अना ऐना ना मोरो रस्ता ला नही चिन्होसेत 11 तबा मीना हिजर के किरिया खायो वय मोरो बिसराम को जघा मा नही जाय सकेत।

12 अगो भाऊ अना बहिनहुन होसियार रव्हो कदि असो नोको होये का तुमरो लक कोनी को मन दुस्ट स अना अबिस्वासी भई जाय अना तुम जित्तो परमेस्वर लक दुहुर भई जावो। 13 जब तकन "आज को दिवस" कहलावसेत तबा तकन तुमी रोज एक दूजो ला बढ़ावा देव, कदी असो नोको भई जाय का तुमरो लक कोनी मानूस पाप मा पड जाय अना वोको मन गोटा जसो भई जाय। 14 अदी आमी आपरो पहेलो भरोसा पर आखीर तकन मजबूत बनो रव्हसेत तो आमी मसीह को हिस्सादार बनयो सेत।

15 जबकि कव्हयो गयो सेत,

"अदी आज तुमी वोको आवाज आयको,

तो आपरो मन ला असो कड़ो नोको करो,

जसो का उनना हिजरान को बेरा कियो होतो।"

16 काहेका कोन लोक गिनना आयक के मोसे ला हिजराइन? का सहीमा उन लोकगीन नही जोन मोसे को सगं मिसर देस लक हिटी होतिन। 17 उ कोन लोकगीन लक चाड़ीस साल तकन गुस्सा करीस का उन लक नही जोन ना पाप करिया अना उनको लास जगंल मा पडयो रहयो। 18 "परमेस्वर ना कोनी लक किरिया खाईस? का तुमी मोरो अराम को जघामा नही जा सकेत। का उन लक नही का जोनना हुकूम नही मानिन?" 19 तो एकोलाय आमी चोवसेजन का अबिस्वास होवन को कारन लक वय धसनो नही पाइन।