मलिकिसेदक याजक
1 यो मिलिकिसिदक सालेम को राजा होतो। अना सब लक मोठयो परमेस्वर को याजक होतो। जब अबराहम राजागीन ला मार के लवट रहयो होतो। ता उ अबराहम लक मिलयो अना वोला आसीरवाद दियो। 2 अबराहम ना सब चीज को दसवा अंस दियो। मलकीसेदेक को मजे "धरमी राजा"। उ सालेम को भी राजा से। मन्जे "सान्ती को राजा।" 3 उ राजा को न तो अजी सेत, ना माय सेत, अना कोनी खानदान सेत। वोको जिंदगी को नातो सुरुवात से, ना आखीर सेत। उ परमेस्वर को टूरा जसो सेत। अना उ हमेसा लक याजक बनो रव्हासेत।
4 अबा तुमी यो विचार करो का, मलकीसेदेक कीतरो महान सेत। जोनला आजा-पुरखा अबराहम ना आपरो लूट को, सब लक साजरा हिस्सा को, दसवा हिस्सा दियो। 5 मोसे को नियम अनुसार लेवी को सन्तान गिनमा जोन याजक पद पावत होतिन। उनला च अबराहम को खानदानी आपरो भाऊ गीन लक दसवा हिस्सा लेवन को हुकूम होतो। 6 मंग मिलिकिसिदक ना, जोन लेवी को खानदानी नहीं होतो। अबराहम लक दसवा हिस्सा लियो। अना वोना अबराहम ला आसीरवाद दियो। अखीन जोनको जवर परमेस्वर को करार होतो। 7 यो गोस्टी मा कोनी सक नाहती का जोन आसीरवाद देवासेत। उ आसीरवाद लेवन वालो लक मोठो होवासेत। 8 गिरंथ कव्हसेत का जोन दसवा हिस्सा लेवासेत उ हरामेसा जित्तो रव्हसेत। मंग जोन लेवीगिन दसवा हिस्सा लेवा सेत, वय सब मरनवालो सेत। 9 तो अमी यो कव्ह सकसेत का दसवा अंस लेवनवारा लेवीगिन ना मलिकिसिदक ला अबराहम लक दसवा अंस दियो। 10 काहेका वोना बेरा मा वय आपरो अजी अबराहम को देहमा होतीन। जबा अबराहम ना मलिकिसिदक ला भेट दियो होतो।
11 इसरायली जनता ला लेवी गिनको याजक को आधार मा, नियम मिलयो होतो। यदी यो याजकपन को लक पूरो भयी जातो। मंग एक दुसरो याजक को चरचा कायको लाय कियो जातो। जोन हारून को खानदान लक नही, बल्की मलिकिसिदक को जसो आ जाय। 12 जबा मोठो याजक बदल गयो तो नियम बदलनो जरुरी सेत। 13 यो गोस्टी जोन याजक को बारेमा कव्हयो गयो सेत, उ दुजो खानदान को सेत। अना उ खानदान को कोनी मानूस ला वेदी को सेवा को हक नही मिलयो सेत। 14 काहेका यो गोस्टी सफा सेत, का आमरो पिरभू यीसु यहूदा कुर लक सेत। अना मोसे ना यो कुर को याजक पद को बारेमा काही चरचा नही करयो सेत।
मलिकसेदक जसो याजक कोनी नाहती
15 आमरो दावा अखीन साफ भई जासेत, जबा मलिकिसिदक को जसो अखीन एक याजक पैदा हो जासेत। 16 जोन देह को हुकूम को नियम लक नाहती। पर कदी नास नही होवनवारा जिंदगी, को ताकत को लक ठहरायो गयो सेत। 17 काहेका वोको बारेमा असो गवाही लिखयो सेत। "तू मलिकिसिदक को रित मा सदा को याजक सेत।" 18 असो पहेलो हुकूम कमजोर अना बेफर होवन को कारन मीट गयो। 19 काहेका नियम काही पूरो नही कर सकयो। सब को सब अधुरो सेत, तबा अमीला एको लक साजरा आस दियो गयो सेत। अना एको कन लक आमी परमेस्वर को कठा पहुच सकासेजन।
20 यो वादा को सगं च यीसु ला ठहरायो गयो। जबकि वय बीन करार को याजक ठैयरायो गयो। 21 काहेका मसीह को ठहरायो जानको बेरा पिरभू परमेस्वर ना किरिया खाई होती। "जसो का पवीतर गिरथ कव्हसेत।"
पिरभु ना करार कियो से,
मंग उ ना ओकोलक पस्तावा करेत,
की तू सदा लक याजक बनो रव्हजोस।
22 असो आमी चोवा सेजन का यीसु जोन नियम को करार लेवासेत। उ कही जादा साजरा सेत।
23 एको अलावा पयले को याजक लगत गिनतीमा ठहरायो जावत होतो। काहेका मरनो को कारन जादा बेरा लक याजक पदमा बनयो रव्हनो मुस्किल होतो। 24 पर यीसु सदा लक बनयो रव्हन वालो याजक सेत। एकोलाय वोको याजकपद कोनी को नाहती, पर हमेसा वोकोच सेत।
25 योच कारन सेत का जोन लोक गीन यीसु लक परमेस्वर को सरन लेवासेत वा उनला पूरो रित लक बचावनो को ताकत राखासेत। काहेका उ उनको कन लक बिनती करन काजी हमेसा लक जित्तो सेत। 26 अबा अमीला असो महायाजक मिलयो सेत। जोन एक पवीतर, निरदोस, बेदाग, पापगिन लक बेगरो, अना सरग लक वरता होयेत। यो गोस्टी सहीच होत्यो। 27 पर जोन दुसरो महायाजक गीन, पयले आपरो पाप को काजी, मंग परजा को पाप को काजी हर रोज बली चघावसेत। पर यीसु ला एको जरुरत नाहती। काहेका वोना यो काम हमेसा लाय, एक च बार मा कर डाखिसेस। जबा वोना आपरो बली चघायो। 28 काहेका मोसे को नियम तो कमजोर मानूस ला महायाजक ठैयरावा सेत। पर नियम खतम होवन को मघा, परमेस्वर को करार लक उ टूरा महायाजक ठैयरावो जावासेत, जोन सदा को लाय पूरो सिध्ध बना दियो गयो सेत।