1 O Devel ani prošlost but puti hem ko but načinja vaćerđa amare pradadenđe prekalo proroci, 2 a ano akala poslednja dive vaćerđa amenđe prekalo plo Čhavo kole odredinđa te ovel nasledniko oto sa, prekala kaste hem stvorinđa o sveto. 3 Ovi odsjaj oti e Devlesiri slava hem pravo slika e Devlesiri, ov kova sa ićeri ple zorale lafeja. I kad omogućinđa e manušenđe te oven očistime oto grehija, bešlo ko nebo, ko počasno than, oti desno strana e Najzorale Devlesiri. 4 Ađahar ulo edobor po zoralo e anđelendar, kobor o Devel dinđa le anav po baro olengere anavendar.

5 Adalese so, o Devel nikad na phenđa nijekhe anđeose:

"Tu injan mlo Čhavo,

avdive uljum će Dad."

Hem ko aver than ano Sveto lil o Devel phenela:

"Me ka ovav lese Dad,

a ov ka ovel maje Čhavo."

6 A palem, kad bičhalđa ko sveto ple jekhore Čhave, phenđa:

"Nek peren ko kočija anglo leste sa o anđelja e Devlesere."

7 Zako anđelja phenela:

"Ple anđelen ćerela sar barvalja

hem ple slugen sar o plamen e jagakoro."

8 A e Čhavese phenela:

"To tron, Devla, terđola zauvek.

Tu vladineja ano to carstvo žezloja oti pravednost.

9 Zavolinđan i pravda, a zamrzinđan o bezakonje.

Adalese o Devel, to Devel, pomazinđa tut uljeja oti radost,

više nego bilo kas te amalendar."

10 Hem akava phenela:

"Ano početak tu, Gospode, čhivđan o temelji e phuvjakoro,

hem o nebesija ćerđan te vastencar.

11 Tu ačhoveja, a on ka nestaninen

hem ka puranđon sar o akharde šeja.

12 Ka paćare len sar o ogrtači,

ka oven zamenime sar o purane šeja.

A tu injan uvek isto

hem te beršenđe nane kraj."

13 Nijekhe anđeose o Devel na phenđa:

"Beš ko počasno than, oti mli desno strana,

đikote na pašljarava te neprijateljen talo te pre."

14 Soi onda o anđelja? Oni duhija kolai bičhalde e Devlestar te služinen okolenđe kola ka nasledinen o spasenje.