Hebreus 8

6 A akana o Isus dobinđa svešteničko služba savi po bitno oti olengiri, adalese so o savez zako savoi ov posredniko, po šukari oto Purano savez, adalese soi utemeljime ko po šukar obećanja.

7 A te ovel ine o prvo savez bizi mana, naka rodel pe ine o dujto te zamenini le.

8 Adalese so, korkoro o Devel arakhlja lese mana hem ple narodose phenđa:

"Ače, avela o vreme – phenela o Gospod – kad ka dovršinav o nevo savez e narodoja oto Izrael hem e narodoja oti Juda. 9 Adava naka ovel sar o savez savo phandljum lengere pradadencar kad dolinđum len oto vas te ikalav len taro Egipat. Adalese so, on na ačhile verna mle savezese, pa hem me irinđum lenđe mlo dumo – phenela o Gospod. 10 A akavai savez savo ka phandav e izraelesere narodoja palo adava vreme, phenela o Gospod: ka čhivav mle zakonja ano lengere mislija, hem ka pisinav len ano lengere vile. Me ka ovav lengoro Devel, a on ka oven mlo narodo. 11 I niko više naka valjani te sikaj ple dizutne ni ple phrale vaćerindoj: ‘Pendžar e Devle’, adalese so ka pendžaren man sare, oto najtikoro đi o najbaro. 12 Adalese so, ka oprostinav lenđe lengere nepravde hem više naka setinav man lengere grehendar."

13 Kad phenđa "nevo savez", o Devel proglasinđa o prvo savez dai purano. A sa so puranđola, sigate ka nestanini.