Mateus 2

E mudracurja darujin e Isuse

1 O Isus bijandilo ando gav Vitlejem, savo sas ande judejsko regija, ande vrjama kana vladilas o caro Irod. Ande godoja vrjama aviline e mudracurja katar o Istok ando Jerusalim 2 thaj počnisardine te raspituin pe: "Kaj si godova o nevo bijando caro e Židovengo? Dikhlam lešći čerain sar inkljel po istok thaj avilam te das koča angle leste."

3 Kana godova ašundas o caro Irod zurale uznemirisajlo sago vi o sa o them ando Jerusalim. 4 Askal akhardas sa e židovske šorvale rašajen thaj e učiteljen e Mojsiješće zakonestar te phučel lendar: "Kaj o Hristo trubul te bijandol?" 5 A von phendine lešće: "Ando Vitlejem ande Judeja, kaj gajda o proroko ramosarda:

6 ‘A tu Vitlejeme, ande judejsko phuv,

nipošto naj san majcikno katar aver judejske gava,

kaj andar tute inkljela o vladari

savo vodila mungre theme e Izraele sago o pastiri pire bakhren.’"

7 Askal o Irod čordanes akhardas peste e mudracen te phučel lendar kana inkljisti e čerain. 8 Askal phendas: "Džan thaj lačhe phučen pale godova čhavro thaj kana araćhena les, bolden tumen thaj javin manđe te šaj džav vi me te pokloni man lešće," thaj bičhalda len ando Vitlejem. 9 E mudracurja ašundine so phendas lenđe o caro Irod thaj đeletar. A e čerain savja dikhline sar inkljel džalas angle lende dok či ačhili anglo than kaj sas o čhavro. 10 Kana dikhline e čerain kaj ačhili, zurale raduisajle. 11 Dine ando ćher thaj dikhline e čhavre lešće dejava e Marijasa thaj peline pe pire koča thaj poklonisajle lešće. Pale godova putardine pire kutijice thaj daruisardine les e sunakajesa, tamnjanosa thaj e mirisno uljesa. 12 Pale godova o Del upozorisarda len ando suno te či bolden pe ko Irod, nego boldine pe ande pešći phuv aver dromesa.