1 సెయ్యె కలొరె సెట్టెతల్లాలింకెబిత్తిరె కుండెలింకె యేసు సంగరె, పిలాతు గలిలయ మనమానెరొ, రొగుతొ బలి దిల్లా జంతువుల్రొ రొగుతొసంగరె మిసిలీబులి కొయిసె. 2 యేసు తంకు సమాదానం కొయిసి, "ఏ విదాంగా మొర్జిలందుకు అంకె యితర గలిలయ మనమానెకన్న బడేపాపం కొర్లెబులి తొమ అబిప్రాయం కిరా? 3 కచ్చితంగా ఎడ జరిగినాసి! ఈనె మీ కొయిలించి కేసె తా పాపోనెకోసం పస్చతాపంపొన్నెంతెవొ తంకల్లా సే గలిలయలింకెపనికిరి నాసనంవూసె. 4 ఈనె సిలోయము బిత్తరె గోపురం పొడికిరి మొర్జిల్ల సే పద్దినిమిది, యెరూసలేమురె కాపురం తల్లా సొబ్బిలింకెకన్న అపరాదులుబులి తలంచిగిల్లీసొకిరా? 5 ఈనె తొమె తొమ పాపోనెకోసం పస్చతాపం నాపొన్నె తంకపనికిరాక నాసనంవూసొ."

6 సే తరవాత యేసు ఏ ఉపమానం కొయిసి, "జొనె తా ద్రాక్సతొట్టరె గుటె అంజూరపు గొచ్చొనాటికిరి అచ్చి. పొగలానె కోసం సే అంజూరపు గొచ్చొ పక్కు జేకిరి సే కుజ్జిలీసి. యీనె తాకు పొగలానె మిలివినీ. 7 సెత్తెలె సే తోటమాలిసంగరె కొయిలీసి, ఇదిగొ తింటబొచ్చొరొతీకిరి ఏ గొచ్చొకు పొగలానె బొడుసికివొబులి కెబ్బుకు అయికుంటా దిగితమ్మి. ఈనె ఎడకు అనిపె ఎడవల్ల యే బూమికి వ్యర్దంకైంకి 8 సెత్తిలె సే తోటమాలి,‘ప్రబూ! సడకు ఇంగుటె బొచ్చొరొ సడిదేండి. మీ చుట్టు పాదు తవ్వికిరి ఎరువు పొగుంచీ; 9 అయిల బొచ్చొరొకు పచ్చపచ్చినె, బొల్టాక. నాపచ్చినె సెత్తిలే అనిపేవచ్చు’ బులి కొయిసి."

10 గుటె విస్రాంతి దినొరె యేసు ప్రార్దనామందిరంరె బోదించుకుంటతల్లాబెల్లె; 11 బలహీనంపర్చిలా ఆత్మదర్లందరె పద్దినిమిది బొచ్చొరొనె తైకిరి బలహీనత సంగరె బాదపొడుకుంట గుటె మొట్ట సెట్టె అచ్చి. తావంట వంగిజేకిరి అచ్చి, కెత్తెకేనెకి సే బొల్లెటారేనారేతవ్వి. 12 యేసు తాకు దిక్కిరి, పక్కు అయిబులి డక్కికిరి తాసంగరె, "మా! తో బలహీతతీకిరి తొత్తె విముక్తి కలిగికిరి అచ్చిబులి కొయికిరి! 13 తాఉంపరె అత్తొనెనొగిలాటకు వెంట్రాక సే మొట్ట బొల్లికిరి టారేకిరి పురువుకు మహిమపర్చిసి."

14 యేసు విస్రాంతిదినొరె బొలికొరివురొ వల్ల సే సమాజమందిరపు అదికారి రగ్గొసంగరె మండిపొడికిరి, జనసముహమునుకు దిక్కిరి, పైటికొర్ల సోట దినొనె అచ్చి యీనె సే దినొనేరాక అయికిరి బొలియిండి; యీనె విస్రాంతి దినొరె నా ఆయిబులి కొయిసి.

15 సడకు యేసు, సమాదానంగా "తొమె వేసదారునెలింకె! విస్రాంతి దినొరె తొం గొరు యీనెను, గొద్దొ యీనెను సాలదీకిరి పిటికిరి జేకిరి పని నొగుసునీకిర! 16 ఈనె ఏ మొట్ట అబ్రాహాము జో, పద్దినిమిది బొచ్చొరోనె సాతాను తాకు ఆదీనంరె నొగ్గినీసి. యింక తాకు విస్రాంతి దినొరె సే బందంతైకిరి విముక్తి కొరువురొ అవసరంనీకిరా?" బులి కొయిసి. 17 ఏ కొతానుకు, తా విరోదూనె లజ్జొపొల్లిపనికిరి యీసి. యీనె సే కొర్లాట మహత్కార్యాలు దిక్కిరి మనమానె బడే ఆనందపొడిసె.

18 సే తరువాత యేసు, "పురువురొ రాజ్యం కెడ పనికిరి తాసి? సడకు కెడసంగరె పోల్చివాసి? 19 ఈనె సడ గుటె ఆవగింజపనాట సడకు జొనె తా తొట్టరెకుంతిల. సడ బొడికిరి బొట్టా మొక్కయీల. మెగొబిత్తరె ఉడ్డిలాపక్సినె సే కొమ్మానె ఉంపరె గూడూనె బందిగిచ్చి" బులి పొచ్చిరిసి.

20 సెత్తిలె యేసు ఇంకా, పురువురొ రాజ్యంకు కెడపనికిరితాసి? బులి పొచ్చిరిసి 21 "సడ పిండిరె మిసిల అమిల పనాట. గుటె మొట్ట సే అమిల యీల పిండి తింట కుంచానె పిండిరె మిసిలబెల్లె సేపిండల్లా అమిలయీజోసి" బులి కొయిసి.

22 యేసు పట్టనమునె బిత్తరె, పల్లెగారె తల్లా మనమానుకు బోదించుకుంట యెరూసలేము ఆడుకు ప్రయానం సాగించిసి. 23 జొనె, "ప్రబూ! కుండెలింకె మాత్రమాక రక్సించబొడివేనా?" బులితాకు పొచ్చిరిబెల్లె.

24 యేసు తంకెసంగరె, యిరుకీలా బట్టొకు జేతే బడేలింకె ప్రయత్నంకొరివె. కేసెకేసెవొ సే బట్టొరె ప్రవేసించితె ప్రయత్నం కొరువె ఈనె ప్రవేసించినారె. 25 గొరొ యజమాని ఉటికిరి తలుపూనెపొగుసి. తొమె పొదిరె టారేకిరి తలుపు మరుకుంట ప్రబూ! అం కోసం తలుపు పిటొండి! బులి బ్రతిమాలుగునుసె. ఈనె సే తొమె కేసెవొ, కేటితీకిరి అయిసో మెత్తె తెలిసినీ బులి సమాదానం కొయిసి. 26 సెత్తిలె తొమె, తొంసంగరె మిసికిరి కైంచొ పీంచో; తొమె అం సైరె బోదించిసొ బులి కొయిసె. 27 ఈనె యింక సే, తొమల్లా దుర్మార్గులునె తొమె కేసొ మెత్తె తెలిసినీ, కేటెతీకిరి అయిసొ తెలిసినీ, మోపక్కరెతీకిరి బాజాండి. బులి కొయిసి. 28 ఈనె "తొమె అబ్రాహాముకు, ఇస్సాకుకు, యాకోబుకు పొదరె ప్రవక్తానెకు పురువురొ రాజ్యంరె దిగిలాపరె, తొమెకు పొదిరె పొక్కిదిల్లందుకు దంతొనె కమిడిగినివురొ, కందివురొ కొరుసొ. 29 ఈనె మనమానె ఉత్తర దక్సినాల తీకిరి, తూర్పు పడమర తీకిరి పురువురొ రాజ్యంరె జరిగిల విందుకు అయికిరి బొసువొ. 30 వుంచిని పొచ్చడె స్దానాంరె తల్లలింకె సెట్టె అగుంత స్దానాంరె తాసె. వుంచినె అగుంత స్దానాంరె తల్లాలింకె సెట్ట పొచ్చడె స్దానాంరె తాసె" బులి కొయిసి.

31 సెత్తిలే కుండెలింకె పరిసయ్యునె యేసు పక్కు అయికిరి, "ఏప్రాంతం సడిదీకిరి ఇంక కేటికినెను బాజా. హేరోదు తొత్తె పొర్నొ కడివాసిబులి కొయిగిల్లీసి" బులి కొయిసె.

32 "యేసు తంకెసంగరె యాకిరి సమాదానం కొయిసి" ఏ దినొ, కల్లికి మనమానుకు బొలికొరుంచి, బుత్తొనుకు సడదిల్లపనికిరి కొరుంచి, యింక తింటోదినొరె మీ కొరివలిసిలాట కార్యం యీజోసీ, జేకిరి ఏ విసయం సే నక్కానె సంగరె కోండి. 33 ఈనె ఆజి, కల్లికి, పోరిదినుకు మో బట్టొరె మీ జేకుంట తవ్వాసి. ప్రవక్త యీలట యెరూసలేముకు పొదిరె మొర్జిజీవొరొ బొల్టనీ.

34 ఓ "యెరూసలేము! యెరూసలేము! తూ ప్రవక్తానెకు పొర్నొకల్లుసు. పురువు పొడిదిల్లలింకు పొతొరోనొ సంగరె మొరదెల్లీసు ‘కూడ’ తా పిల్లానుకు కాపాడిగిత్తె రెక్కానె తొల్లె చేర్చిగిల్లపనికిరి తో మనమానుకు మోపక్కు చేరిగినివాసి బులి కెత్తోబెల్లె బులిగించి! ఈనె తూ సడకు అంగీకరించిలాను! 35 తో మందిరం పాడుయీజోసీ ప్రబువు నారే అయిలాట దన్యుడు బులి తూ కొయిలాజాంక తూ మెత్తె దిగును." బులి కొయిలించి బులిసి.