లూకా 8

యేసు యాయీరు జోకు, జొనె మొట్టకు బొలికొరువురొ

40 మనమానె సొబ్బిలింకె యేసు కోసం దిక్కుకుంట అచ్చె. సే సొంద్రొ పక్కరతీకిరి అయినాక తంకె తాకు స్వాగతము దీసె. 41 సే సమయమురె ప్రార్దనామందిరముకు అదికారిగా తల్ల యాయీరు బుల్ల మనమ జొనె అయికిరి యేసు గొడ్డొనంపరె పొడికిరి మో గొట్టికి అయిబులి బతిమాలిగిచ్చి.

42 తా పన్నెండు బొచ్చొరొనె జో మొరొజోసిబులి, మెత్తె జొన్నాక జో బులి, కొయిగిచ్చి. యేసు తా గొట్టికి జేతన్నుగా, మనమానె వొంకిదీకుంట తా చుట్టూ అచ్చె. 43 సే గుంపురె పన్నెండు బొచ్చొరోనె రక్తస్రావం సంగరె బాదపొడితల్ల జొనె మొట్ట అచ్చి, తా పక్కరె తల్లాటల్ల వైద్యునెకు దిన్నెను బొలైలాని. 44 సే మొట్ట యేసు పొచ్చాడె తీకిరి అయికిరి తా అంగీ కొన్నకు సూగిచ్చి. ఎంట్రాక తా రక్తస్రావం టాపొడిసి. 45 యేసు, "మెత్తె కేసె సుంగిల్లె?" బులి కొయిసి. సొబ్బిలింకె అమె నింతొబులి కొయిసె. సెత్తెలె పేతురు, "ప్రబు! మనమానె వొంకి దీకుంట తో ఉంపరె పొడ్లీసె నీకిర! కాకు కొయిపారొ?" బులి కొయిసె.

46 యేసు, "ఈనె కేసెవో మెత్తె సూగిచ్చి. మో బిత్తరెతీకిరి సక్తి జెల్లాట గమినించిలించి" బులి కొయిసి. 47 సెత్తెలె తిల్డ్రపిల్ల తాకు గమనించికుంట తన్నిబులి గ్రహించికిరి, డొరిజేకుంట అయికిరి యేసు గొడ్డొనంపరె పొడిసి. సే తాకు కిరకు సూగిచ్చొ, తాకు క్యాకిరి ఎంట్రాక బొలియీసివొ సొబ్బిలింకె మొజిరె కొయిసి. 48 సెత్తెలె యేసు తా సంగరె, "మా! తో విస్వాసం తొత్తె బొలికొరిసి. సాంతీకిరి జా" బులి కొయిసి.

49 యేసు ఇంక కొతలగితన్నుగా ప్రార్దనామందిరము అదికారి గొట్టె తీకిరి జొనె అయికిరి తా సంగరె, "తో జో మొరిజేసి. బోదకుడుకు కొస్టొనొగివురొ బొలితన్ని" బులి కొయిసి.

50 ఎడ సునికిరి యేసు యాయీరుసంగరె, "డొరితెనా, విస్వాసం రొగ్గును, తో జో బొలియీజోసీ" బులికొయిసి.

51 యేసు యాయీరు గొట్టికి అయిసి. పేతురు, యోహాను, యాకోబు సే పిల్లరొ మా బోకూ తప్ప ఇంక కేసె మో సంగరె అయిపించిలనింతె. 52 తంకల్లా సే పిల్లకోసం కందికుంట అచ్చె. యేసు, "తొమె కందువురొ ఆపొండి. సే పిల్ల మొర్జిల్లాని, సొయికిరి అచ్చి సెత్తాక" బులికొయిసి.

53 సే పిల్ల మొరిజేసి బులి తంకు తెలుసు సడకు తంకె యేసుకు హేలన కొర్లె. 54 యేసు సే పిల్లరొ అత్తొనె దరిగినికిరి, "సన్నిపిల్లా ఉటూ!" బులి కొయిసి. 55 పిల్లరొ ఆత్మబుల్లికిరి తా బిత్తురుకు అయిసి. సే ఎంట్రాక ఉటిసి. యేసు తంకె సంగరె, "సే పిల్లకు కిరనె కైతె దేండి" బులి కొయిసి. 56 సే పిల్లరొ మా బో ఆచర్య పొడిసె యీనె యేసు జరిగిలాట గురించి కాకు కొయితెనాండి బులి ఆజ్ఞాపించిసి.