1 కుండె దినోనె యీలాబెల్లె యేసు ఇంకా కపెర్నహూము పట్నంరె తల్లా గొరుకు అయిసి బులి మనమానుకల్లా అరకైసి. 2 బడేమంది మనమానె సే తల్లాగొరొ పక్కు చేరిలందరె చోటు సొరుపొడులాని. దోరె కూడా చోటునీ. యేసు తంకు బోదించిలీసి.

3 సెత్తెలాక చార్లింకె మనమానె జొనె పక్సవాతవ మనమకు బొయిగీకిరి సెట్టికి అయిసె. 4 ఈనె బడే జనమూనె మూగిజిల్లందరె జబ్బుతల్లాటకు యేసు అగురుకు కొడతైనారిసె. ఈనె తంకె యేసు తల్లా గదిరొ ఉంపరె కప్పు పిటికిరి, సే పక్సవాత మనమకు సే రొల్లా సొప్ప సంగరె ఉంపరెతీకిరి యేసు అగరె వొల్లిదీసె. 5 ఈనె యేసు తంకు విస్వాసంకు దిక్కిరి పక్సవాత రోగి సంగరె, "పో! తో పాపోనెకు క్సమించించి!" బులి కొయిసి.

6 సెట్టాక బొసిరికిరి తల్లా సగం మంది సాస్త్రీనె తంకు బిత్తరె తంకాక యాకిరి బులిగిల్లీసె. 7 "యెయ్యె యాకిరి కైంకి కొయిలీసి? ఎడ పురువుకు దూసించువురాక! పురువు తప్ప పాపోనెకు కేసె క్సమించిపారె? బులి కొయిగిచ్చె."

8 తంకె మనుసునురె ఆలోసించిలాట యేసు ఎంట్రాక ఆత్మరె తెలిసిగిచ్చి. "తొమె ఎడగురించి కైంకి యాకిరి ఆలోసించిగిల్లీసొ? 9 కిడ సులువు? పక్సవాత మనమ సంగరె, తో పాపోనె క్సమించిబొడిసె! బులికొయివురొనా? నీనె తో సొప్ప కడిగీకిరి సలి జా బులి కొయివురొనా. 10 ఈనె మియి కొయిలించి మనమరొ పోకు బూలోకంరె పాపోనె క్సమించిలా అదికారం అచ్చి" బులి పక్సవాత మనమకు కొయిసి. 11 "మీ కొయిలించి ఉటికిరి, తో సొప్ప కడిగికిరి గొరుకు జా! బులి కొయిసి."

12 ఎంట్రాక సే పక్సవాత మనమ ఉటికిరి టారికిరి తా సొప్ప కడిగీకిరి సొబ్బిలింకె దిగుతన్నుగా సలికిరి బాజేసి. యెడ దిక్కిరి సెట్టె తల్లలింకల్లా ఆచర్యపొడికిరి, "అమ్మె యెడ పనా కార్యం కెబ్బె దిగిలానింతొ" బులి పురువుకు మహిమపర్చిసె.

13 యేసు ఇంగుటె బెల్లె గలిలయ సొంద్రొ ఒడ్డురె సలిజెల్లీసి. బడేమంది మనమానె తా పక్కు అయిసె. సెయ్యె తంకు బోద కొరువురొ మొదలుదీసి. 14 సెట్టెతీకిరి బయలుదేరికిరి అగురుకు సలికిరి జేతన్నుగా అల్పయి పో లేవి పన్నునె వొసూలు కొరిలా గొరొరె బొసికిరి తవ్వురొ దిగిసి. యేసు "తాకు ఉటికిరి మో సంగరె ఆయి బులి కొయిసి." ఎంట్రాక లేవి ఉటికిరి తాకు అనుసరించిసి.

15 సే తరవాతరె యేసు లేవి గొరొరె కద్దికు బొసిరీసి, బడేలింకె పన్నునె వొసులు కొరిలాలింకె, పాపోనె బడేమంది తా సంగరె తా సిస్యునె తీకిరి కూడా కద్దీనుకు బొసిరిసె. తంకెబిత్తరె బడేలింకె యేసుకు అనుచరూనె. 16 పరిసయ్యునెరె తల్లా సాస్త్రీనె, యేసు పాపాత్ములు సంగరె, పన్నునె వొసులు కొరిలా సుంకరీనె సంగరె మిసికిరి కద్దికైవురొ దిక్కిరి, తంకె సిస్యునెకు కిడకు తంకె సంగరె కైలీసి బులి పొచ్చరిసె.

17 యెడ సునిలా యేసు తంకుసంగరె, "రోగము తల్లాటకాక వొసొ పొగువురొ అవసరం. ఈనె బొల్లె తల్లాటకు వొసొ అవసరంనీ! పాపాత్ములుకాక మీ డక్కితందుకు అయించి, ఈనె నీతిమంతునెకు డక్కితందుకు అయిలాని బులిసి."

18 యోహాను సిస్యునె, పరిసయ్యునె, ఉపాసాలు కొరివె. కుండె మనమానె యేసు పక్కు అయికిరి, "యోహానురొ సిస్యునె, పరిసయ్యునెరొ సిస్యునె ఉపాసానె కొరివెనీనా! తో సిస్యునె కైంకి కొర్నింతె?" బులి పొచ్చరిసె.

19 యేసు తంకు యాకిరి కొయిసి. "బొర్రొ తంకె సంగరె తల్లద్దినె బందువూనె ఉపాసం రొవ్వేనా? బొర్రొ తంకె సంగరె తల్లబెల్లె తంకె ఉపాసం కొరినింతె. 20 ఈనె, బొర్రొకు తంకుతీకిరి కొడిబాజీతల్లా దినొ అయివొ, సెత్తెలె సే దినొరె తంకె ఉపాసం కొరివె" బులి కొయిసి.

21 "చిరిజిల్లా పుర్న కొన్నానుకు నో కొన్న సంగరె కేసే మాసిక పొగినింతె, సాకిరి కొరినె నో కొన్న పుర్న కొన్నకు ఇంకా చిరిపివ్వొ."

22 "కేసే పుర్న సొమ్మొసంచిరె నోద్రాక్సరసం రోయిదిన్నెంతె, ఈనె సాకిరిగని కొరినె నోద్రాక్సరసం సే సంచినుకు పిగలమరిపీవొ. సొమ్మొసంచి, ద్రాక్సరసం దీటా నాసనమైజివ్వె. సడుకాక నో ద్రాక్సరసం నో సొమ్మొసంచిన్రాక రోయిదిమ్మాసి బులి యేసు కొయిసి .చొమ్మొ సంచినె"

23 యేసు గుటె విస్రాంతి దిన్రె బిల్లోన్రెతీకిరి జెల్లీసి. తా సిస్యునంకా తా సంగరె అచ్చె. తంకె కైతందుకు జొన్న ఎన్నూనె చిండిగిచ్చె. 24 సెత్తెలె పరిసయ్యునె యేసు సంగరె, "ఇదిగొ దిగు! తంకె దర్మసాస్త్రముకు విరొదంగా విస్రాంతి దిన్రె నాకొరివలిసిలాపైటి కైంకి కొర్లీసె." బులి పొచ్చరిసె.

25 యేసు తంకు కొయికుంటా, "దావీదు, తా సంగరె రొల్లాలింకు బొక్కొరె రొల్లాబెల్లె, సెల్లె దావీదు కిడకొరిసొ తొమె కెబ్బే చదివిలానింతోనా? * 26 అబ్యాతారు ప్రదానయాజకుడుగా*తల్లాకల్రె దావీదు పురువురొ మందిరం*బిత్తురుకు జేకిరి పురువురొ అగరె దిల్లా సముకపు రొట్టి కడిగి కైకిరి, తా అనుచరూనెకంకా దీసి. దర్మసాస్త్రము ప్రకారం యే రొట్టి యాజకూనె తప్ప పొదర్లింకె కైనాసి."

27 సెత్తెలె యేసు తంకె సంగరె యాకిరి కొయిసి, "విస్రాంతి దినొ మనమానె గురించాక నియమించబొడిసి గని, మనమానె విస్రాంతి దినొకోసం నియమించబొడిలానింతె. 28 సడుకాక మనమరొ పోకు *విస్రాంతి దినపరంకా అదికారం అచ్చి."