Miquéias 5

బేత్లెహేము దీకిరి ఏలీలాట ఆసి బులి పురువురొ వాగ్దనం

1 యెరూసలేము జనుమూనె, యుద్ద సేనసంగరె ఉంచీని మిసికిరి అయిండి. తో గా చుట్టు గోడ అచ్చి. ఈనె సత్రువూనె ఇస్రాయేలీరొ నాయకుడుకు బెత్తంసంగరె చంప ఉంపరె మరుసె. 2 బేత్లెహేము ఎప్రాతా, యూదాలింట కుటుమానమూనె మొజిరె తూ సన్ని గా యీల మో కోసం ఇస్రాయేలీంకు పాలించిలాట తోబిత్తరె తీకిరి ఆసి. సే పుర్నొ కలొదీకిరి, కెబ్బుకు తల్లాట. 3 ఈనె పెట్టొసంగరె తల్ల తిల్డ్రమనమ, పిల్లకు జొర్నొ దిల్లజాంక, పురువు తంకు అప్పగించుసి. సెత్తెలె సే అన్నబైనె బిత్తరె తక్కిల లింకె ఇస్రాయేలీ పక్కు బుల్లికిరి ఆసే. 4 సే యెహోవా బలము సంగరె తా యెహోవా పురువురొ బలము సంగరె గొప్ప సంగరె టారేకిరి తా మందకు మేపుసి. బీ చివరజాంక సే గొప్పతా పనికిరి తాసి.

విద్వంసం, విమోచన

5 అస్సూరీనె అం దెసొరె చొరబొడ్లపరె, తంకె అం ప్రాకారానె ఉంపరె లగకు అయిలపరె తంకు ఎదిరించితె అమ్మె సత్రలింకె గొర్రీనె జొగొలొలింకు, హట్ట నాయకునెలింకు నియమించుసె. సెయ్యాక అముకు సాంతి. 6 తంకె యుద్దం కత్తి సంగరె అస్సూరు దెసొకు పాలుంచుసె. తంక అత్తొన్రె కత్తినె సంగరె నిమ్రోదు దెసొకు పరపాలుంచుసె. అస్సూరునె అం దెసొరె చొరబొడికిరి అం సరహద్దురె చొరబొడ్లబులే సే అముకు యాకిరి కాపాడుసి. 7 యాకొబు సంతానమురె తక్కిలలింకె కెత్తొ మనమానె మొజిరె జీకుంట, యెహోవా కురిపించిల మంచు పనికిరి మనమరొ ప్రయత్నం, ఆలోచన నొయికుంట, గస్సొ ఉంపరె పొల్ల బొరొసొ పనికిరి తాసొ. 8 యాకోబు సంతానమురె తక్కిలలింకె రొజానె మొజిరె, కెత్తొ జనుము మొజిరె బొనొ జంతువూనెరె బొడ బగొ పనికిరి తాసె. సడ మందరె దూరికిరి సడుకు తొక్కుకుంట సడకు చీల్చిపోసి. 9 తో అత్తొ తో సత్రువూనె ఉంపరె ఉటికిరి తాసి. సడ తంకు నాసనము కొరుసి. 10 యెహోవా యాకిరి కొయిలీసి, "సే దినొరె మీ తో గొడానెల్లకు నాసనం కొరుంచి. తో రదమూనెకు నాసనం కొరిమి. 11 తో దెసొరె గానెకు నాసనం కొరిమి. తో కోటానెకు పొక్కిదిమ్మి. 12 తొం మొజిరె మంత్రవిద్య నీకుంట నాసనం కొరిమి. జాతకం కొయిలలింకె యింక తో బిత్తరె తన్నెంతె 13 చెక్కిల బొమ్మ విగ్రహానెకు దేవాతా స్తంబానె ఉంపరె తొం మొజిరె నీకుంట నాసనం కొరిమి. సెత్తెలె తీకిరి తొమ్మె అత్తొనె సంగరె కొర్లా సడనెకు మొక్కినెంతొ. 14 తొం ఆసేరా దేవతాకు స్తంబాలకు తొం మొజిరె నీకుంట సడనెకు పెల్లిగించిమి. తో పట్టనం బుల్లట గానెకు పొక్కిదిమ్మి. 15 మీ బడే రగ్గొసంగరె , ఉగ్రత సంగరె మో కొతా నా సునిల దెసోనెకు ప్రతికారం కొరిమి."