మత్తయి 22

మొర్నొదీకిరి జీకిరి అయివురొ కోసం ప్రస్న

23 సే దినాక, సద్దూకయ్యునె యేసు పక్కు అయికిరి మొరిజిల్లాలింకె జీకిరి అయినింతె బులి వాదించిలాలింకు యాకిరి కొయిసి. 24 "బోదకా! జొనెమొట్ట పిల్లానె నీకిరి మొరిజిన్నే, తా బయి సే వితంతువుకు బ్యా కొరిగీకిరి మొరిజిల్లా అన్నకు సంతానం కలిగించిమాసిబులి మోసే కొయిసినీనా బులి పొచ్చరిసె. 25 అంబిత్తరె ఏడుగురు బయినె గుటె కుటుంబంరె అచ్చె. అగరె రొల్లట బ్యా కొరిగీకిరి పిల్లానె నీకుంటా మొరిజేసి. ఈనె సే వితంతువుకు మొరిజిల్లాటరొ బయి బ్యా కొరిగీసి. 26 సాకిరాక అగరోట, తింటొట, ఏడుగురు కూడా సాకరాక తాకు బ్యా కొరిగీకిరి పిల్లానెనీకుంటా మొరిజీసె. 27 చివరకు సే మొట్ట కూడా మొరిజీసి. 28 ఈనె ఉంచినె సే ఏడుగురు సే మొట్టకు బ్యా కొరిగిచ్చెనీ, ఈనె పునరుత్తానం తరవాతరె సెయ్యె సే ఏడుగుర్రె కాకు నైపోగా తాసి?"

29 యేసు తంకె సంగరె "తొముకు లేకనానె గాని పురువురొ సక్తి గాని నాజనికిరి అపార్దం కొరిగిల్లీసొ. 30 పునరుత్తానంరె బ్య కొరిగివురొ గాని, నాకొరివురొ గాని తన్నీ. తంకె పరలోకంరె దేవదూతానెపనికిరి తాసె. 31 ఈనె మొరిజిల్లాలింకె జీవురొ కోసం పురువు తొముకు కిర కొయిసివొ తొమె చదివిలానింతోనా? బులి సెయ్యె పొచ్చిరిసి. 32 ‘మియ్యి అబ్రాహాముకు పురువు, ఇస్సాకుకు పురువు, యాకోబుకు పురువు’ బులి కొయిసి. మియి మొరిజిల్లాలింకు పురువు నీ, జీలాలింకాక మియి పురువు."

33 సెల్లె యే బోద సున్లాలింకల్లా ఆచ్చర్యపొడిసె.