Neemias 13

పొదర్లింకు ఏరు కొరువురొ

1 సే దినొరె తంకె మోసే గ్రందం ప్రజానెకు చదివికిరి సునిపించిసె. సే గ్రందంరె"అమ్మోనీయునె గానీ, మోయాబీయునె గానీ పురువు సమాజమురె కెబ్బుకు ప్రవేసించినాసి. 2 కిరుకుబుల్నే తంకె కైలాంచ, పిలాంచానె దరిగీకిరి ఇస్రాయేలీనెకు ఎదురు పొడునింతె. ఈనె ఇస్రాయేలీనెకు సపించుబులి బిలాము ప్రవక్తకు లంచం దీకిరి పొడదీసె. ఈనెను అం పురువు సే సాపముకు దీవెనగా మార్చిసి" బులి రాసితల్లా విసయం చదివిసె. 3 ఎడకు సునికిరి ఇస్రాయేలు ప్రజానె పొదరె దెసొనె ప్రజానెకు తంకె బిత్తరె దీకిరి ఎలేసిపీసె.

నెహెమ్యా చక్కపర్చివురొ

4 ఎడకు అగరె అం పురువు మందిరముకు చెందిలా గది ఉంపరె యాజకుడు ఎల్యాసీబు టోబీయా దీకిరి బందుత్వం అచ్చి. 5 నైవేద్యానెకు, దూప ద్రవ్యానెకు, పాత్రానెకు, లేవీయునెకు, గిత్తోనె లింకు, ద్వారపాలకునెకు కేటాయించిలా దన్నొరె, నో ద్రాక్సరసంరె, తెల్లొరె యాజకూనెకు దివ్వలిసిలా ప్రతిస్టిత వస్తువూనెకు రొయిదిల్ల గది పక్కరె టోబీయాకు గుటె బొట్ట గదికు సిద్దం కొరిసి. 6 సే సమయంరె మియి యెరూసలేమురె నీ. కిరుకుబుల్నే, బబులోను దెసొరె రొజా అర్తహసస్త పాలన 32 వ బొచ్చుర్రె రొజాకు దిగదీకిరి, కుండె దినోనైలా పొచ్చాడె రొజా పక్కరె అనుమతి కడిగీకిరి యెరూసలేముకు బుల్లికిరి అయించి. 7 యెరుసలేముకు అయిలబెల్లె ఎల్యాసీబు పురువు మందిరము అగరె టోబీయాకు గుటె గది ఏర్పాటు కొరివురొ మూలంగా కొరిలా కీడు కోసం తెలిసిగించి. 8 మెత్తె బడే రగ్గొ అయిసి. సే గదిరె దీకిరి టోబీయారొ వస్తువునె సొబ్బీ తెనిపొక్క పొక్కదీకిరి, గదీనె సొబ్బి సుద్ది కొరుబులి ఆజ్ఞాపించించి. తంకె సాకిరాక కొరిసె. 9 పొచ్చాడె మందిరంరె తల్లా పాత్రనె, నైవేద్యం అర్పించిలా వస్తువునె, సాంబ్రానినెకు యింకా సెట్టుకు దన్నైపించించి. 10 లేవీయునెకు ఐవలిసిలా బాగం తంకు నాఐవురొ వల్లరె గుడిరె పరిచర్య కొరిలా లేవీనె, గాయకూనె తంకె గానెకు బుల్లికిరి బాజీసె బులి తెలిసిగించి. 11 పురువు, గుడికు మైటినాకొరిలందరె అదిపతీనెకు గట్టిగా కొయికిరి, లేవీనె, గాయకూనెకు బుల్లికిరి దన్నైకిరి తంకె చోటూన్రె రొయిదిల్లా ఏర్పాటు కొరించి. 12 సే పొచ్చాడె యూదునె సొబ్బిలింకె దన్నొరె, ద్రాక్సరసంరె, తెల్లొరె దొస్టొవొంతు కజానారె జమ కొరిసె. 13 నమ్మకస్తునె యీలలింకె బులి నా గల్లా యాజకుడు సెలెమ్యా, సాస్త్రి యీల సాదోకు, లేవీయుడైల పెదాయానెకు కజానా వుంపరె అదికారీనె పని నియమించిసి. తంకు సహాయకుడు పని మత్తన్యా నత్తి, జక్కూరు పో హానాను నియమించిబొడిసి. తా స్నేహితునెకు కద్ది బంటదిల్లా పైటి అప్పగించిసి. 14 మో దేవా, యడ బట్టి మెత్తె జ్ఞాపకము రొయిదిగిను. మో పురువురొ ఆలయం కోసం, సడ అమలు కొరిలా పద్దతి కోసం మియి కొరిల పైటీనె పసిరిజేతెనా బులి ప్రార్దన కొరిసి. 15 సే దినోనెరె కుండె లింకె యూదునె విస్రాంతి దినోనెరె ద్రాక్స గెలానెకు తొట్టిరె పొక్కిరి మండువురొ, దన్నొ గింజానె మూటానె గొద్దొనె వుంపరె లొగివురొ దిగించి. ద్రాక్సారసం, ద్రాక్సపొగలానె, అంజూరొ పొగలానె, ఇంక బడే రకాలైలా గొబ్బిరీనె విస్రాంతి దినొనె యెరూసలేముకు దన్నైవురొ దిక్కిరి, సే కద్ది పదార్దానెకు సే దిన్రె బిక్కిలాలింకు గద్దించించి. 16 యెరూసలేమురె రొల్ల తూరు దెసొలింకె విస్రాంతి దినొరె మచ్చొ బడే రకాలైలా వస్తువునె దన్నైకిరి యూదునెకు బిక్కిలీసె. 17 మియి యూదునెరె నాయకునెకు గద్దించికిరి, తంకె సంగరె "విస్రాంతి దినోరె అపవిత్రం కొరికిరి, ఎడపనా చెడ్డ పైటీనె కైంకి కొరిలీసొ? 18 తొం పూర్వికునె యాకిరి కొరికిరి అం ఉంపరకు, అమె పట్టనమునె ఉంపరకు పురువు దిక్కిరి కీడు కలిగిలాపని కొరిసె నీ. తొమె విస్రాంతి దినొకు అపవిత్రం కొరికిరి ఇస్రాయేలీయునె ఉంపరకు పురువు రగ్గొ బడే బూతు దన్నైపించిలీసొ" బులి కొయించి. 19 విస్రాంతి దినొకు అగరె దినొ రత్తి యీలబెల్లె యెరూసలేము తలుపూనె బుజ్జిగీకిరి తమ్మంచి బులి, విస్రాంతి దినొ యీజెల్లా జాంక తలుపూనె కడినాసి బులి ఆజ్ఞాపించించి. విస్రాంతి దినొకు కెటె గొబ్బిరీనె బిత్తరకు నాయికుంటా తలుపునె పక్కరె మో పైటిలింకె బిత్తరె కుండిలింకు జొగులొ రొయిదీంచి. 20 బొంజొకారీనె, రకరకానె వస్తువునె బిక్కితె గుట్టె దీట బెల్లె యెరూసలేము గోడానె బయల్రె బస కొరిసె. 21 మియి తంకు గద్దించికిరి యాకిరి కొయించి "తొమె గోడానె పక్కరె కిరుకు బస కొరిలీసొ? యింగుటెబెల్లె యాకిరి కొరినె తొముకు దరిగుంచి" బులి హెచ్చరించించి. ఈనె యింకా కెబ్బుకు తంకె విస్రాంతి దినొరె అయిలానింతె. 22 సెల్లె తంకు తంకె సుద్ది కొరిగీకిరి, విస్రాంతి దినొ ఆచరించితె తలుపునె పక్కరె ఎదురు దిగిమంచి బులి లేవీయునెకు ఆజ్ఞాపించించి. మో దేవా, ఏ విసయం వల్లరె మెత్తె గుర్తు రొయిదిగీకిరి తో కనికరం చొప్పురె మెతె రక్సించు. 23 సే దినోన్రె కుండిలింకె యూదునె అస్డోదు, అమ్మోను, మోయాబు పట్టనానెరొ తిల్డ్రపిల్లానెకు బ్యా కొరిగిల్లాపని మెత్తె తెలిసిసి. 24 తంకె పోనెరె సకంలింకె అప్డోదు బసొ కొతలగిలీసె. తంకె రకరకాలైల అన్య బసోనె కొతలగిలీసె, తంకె బిత్తరె కాకు యూదునెరొ బసొ అయిని. 25 సెల్లె మియి తంకె దీకిరి వాదించికిరి, తంకు గల్దీంచి. కుండిలింకు మరించి. తంకరొ కన్నొనె దరించి "తొమె తంకె పోనెకు తొం జొనెకైనా, తొం పోనెకు తంకె జొనెకు దిన్నాసి, కడిగిన్నాసి" బులి తంకె అత్తరె పురువు నారె ప్రమానం కొరిపించించి. 26 తంకె సంగరె యింకా యాకిరి కొయించి. "యాట పైటీనె కొరికిరి ఇస్రాయేలీనె రొజా సొలొమోను పాపం కొరిసి నీనా. లొకొరొ ప్రజానెరె తా పనా రొజా యింక జొర్నైనీ, సెయ్యె తా పురువురొ ప్రేమకు దిక్కిరి. పురువు తా ఇస్రాయేలీయునెకు రొజా పనికిరి నియమించినన్నా అన్య తిల్డ్రిపిల్లానె తా సంగరె పాపం కొరిపించిసె నీనా? 27 ఎత్తె గొప్ప కీడు కలిగిలా, అం పురువుకు వ్యతిరేకంగా పాపం కొరిలాపని పొదరె దెసొ తిల్డ్రపిల్లానెకు బ్యా కొరిగిల్ల తొం పనాలింకెరొ కొతానె అమె సునిమంచినా?" బులి పొచ్చిరించి. 28 ప్రదాన యాజకుడు ఎల్యాసీబు పొ మోయాదా పోనెరె జొనె హోరోను గారొ మనమ సన్బల్లటు జోకు బ్యా కొరిగించి. యడవల్లరె మియి తాకు మో పక్కరె దీకిరి గొడ్డదీంచి. 29 మో దేవా, తంకె యాజక వ్రుత్తికు, యాజకూనె, లేవీనె ఒప్పందముకు అపవిత్రం కొరిసె సడకు తంకు జ్ఞాపకము కొరుగును. 30 యాకిరి తంకె కే పొదరొ మానమానె దీకిరి నామిసికుంటా తంకు సుద్ది కొరికిరి, సొబ్బి యాజకుడూ, లేవీయుడూ తంకె దర్మం ప్రకారం సేవ జరిగించితె నిర్నయించించి. 31 యింకా, అర్పనానె కోసం నియమించిలా సమయమురె కట్టోనె అయిలాపని, మానమానె క్రమంగా ప్రదమ పలమూనె దన్నైలా పని ఏర్పాటు కొరించి. మో దేవా, బొల్ట జరిగిలా పని మెతె గుర్తు కొరుగును.