యాకోబు 5

పలియ గల్లాటకు హెచ్చరిక

1 ఇదిగొ పలియ తల్లాలింకె, సునోండి. తొమంపరకు అయిలా కొస్టోనుకు తలించిగీకిరి వేదన సంగరె కేకానె పొగండి. 2 తొం పలియ చెడిజేసి. తొం కొన్నానె సిరిజేకిరి సెదకైపీలీసి.

3 తొం వెండి సున్నా తుప్పుదరిపీసి. సే తుప్పాక తొమంపరె సాక్స్యం పలిక్కుంటా నియ్యపనికిరి తొం దేనుకు పుడ్డిపూసి, తొమె చివరి దినోండ్రె పలియ కూర్చిగీకిరి కుప్ప కొరిగిచ్చొ. 4 ఇదిగొ తొం బిల్లొ కట్టిలా పైటికారీనుకు నాదీకుంట, తొమె మోసముగా బిగదర్లా కూలి దొందర్లీసి. తొం బిల్లొకట్టిలాలింకెరొ కేకానె సైన్యములుకు అదిపతియీల ప్రబువురొ కన్నోనె బిత్తురుకు జేకిరి అచ్చి.

5 తొమె బూమంపరె సుకముగా జీతే సుకబోగీనె యీకిరి సిక్స దినొ కోసం తొం మనుసునుకు పోసించిగిల్లీసొ.

6 తొమె నీతి మంతుడుయీలాటకు సిక్స పొక్కిరి మొరదిల్లీసొ, సెయ్యె తొముకు ఎదిరించినీ.

ఓపిక సంగరె ప్రార్దన కొరొండి

7 ఈనె అన్నబయినె అప్పబొయినీనె, ప్రబువు అయిలా జాంక ఓపిక సంగరె తమ్మాసి. రైతు తొలకరి బొరొసొ, ఆకరి బొరొసొ అయిలాజాంక పచ్చ కోసం ఓపిక సంగరె ఎదురు దిక్కుంటా జొగ్గీకిరి తాసినీకిరా. 8 ప్రబువు అయివురొ పక్కరాకచ్చి ఈనె తొమ్మెకూడ ఓపిక సంగరె తైకిరి, తొం మనుసునె స్తిరముగా తమ్మురోండి. 9 అన్నబయినె, జొనంపరె జొనె సనిగితెనాండి, సెత్తెలె తొమంపరకు తీర్పు అయిని. ఇదిగొ న్యాయాదిపతి పొదరె టారెకిరి అచ్చి. 10 మో అన్నబయినె, ప్రబువునారె బోదించిలా ప్రవక్తానె ఎదిరిగిల్లా హింసానుకు, ఓపికకు ఆదర్సంగా రొగ్గునోండి.

11 సహించిలాలింకు దన్యూనె బులి కొయిగిల్లించొనీకిర? తొమె యోబు సహనము గురించి సునిసొ. యోబు విసయమురె పురువురొ ఉద్దేసానెకు తెలిసిలా తొముకు సే కెత్తో జాలి, కనికరం గల్లాట బులి తొమె తెలిసిగీకిరచ్చొ.

12 మో అన్నబయినె, గుటె ముక్యమైలా సంగతి కిరబుల్నే, మెగొ తోడుబులి, బూమి తోడుబులి యింకా కెడ తోడుబులి ఒట్టు నొగితెనాండి, తొమె "వైబులి తన్నె వైబులి, నీనే నీబులి" తమ్మాసి సాకిరినీనే తొమె తీర్పు బిత్తురుకు ఆసొ.

13 తొముకు కాకెనెను కొస్టొ అయిసినా? సే ప్రార్దన కొరివాసి; కాకెనెను సంతోసం కలిగిసినా? సే గిత్తోనె గైయివాసి. 14 తొంబిత్తరె కేసైనన్నా జబ్బుపొడికిరి అచ్చినా? సెయ్యె సంగమురొ బొడిలింకు డక్కిగినివాసి, తంకె ప్రబువు నారె తాకు తెల్లొ మక్కికిరి తాగురించి ప్రార్దన కొరివాసి.

15 విస్వాసం సంగరె కూడిల ప్రార్దన జబ్బుగల్లాటకు బొలుకొరుసి. ప్రబువు తాకు ఉటుపించుసి, సెయ్యె పాపం కొరికిరి తన్నె తాకు పాపక్సమాపన మిలుసి.

16 ఈనె తొం పాపోనెకు జొనెకు జొనె ఒప్పిగునోండి, తొమె స్వస్తత పొందితె జొనె కోసం జొనె ప్రార్దన కొరోండి. సెత్తెలె తొముకు స్వస్తత యీవొచ్చు, నీతిమంతుడురొ విజ్ఞాపన బడే బలమైలాట. సడ కెత్తో బలమైలాట.

17 ఏలీయా అంపనా స్వబావము తల్లా మనమాక. బొరొసొ నాఅయిలపనికిరి సెయ్యె ప్రార్దన ఆసక్తి సంగరె కొరిలందరె తింట బొచ్చురోనె చో మసొనె బూమంపరె బొరొసొ పొడిలానీ.

18 ఏలీయా యింకా ప్రార్దన కొర్లాబెల్లె మెగొ బొరొసొకు దీసి, బూమి తా పలము దీసి.

19 మో అన్నబయినె అప్పబొయినీనె, తొం బిత్తరె కేసైనన్నా సత్యం తీకిరి తొలిగిజెన్నె యింకజొనె తాకు యింకా సత్యముకు మల్లించిమాసి.

20 కేసైనన్నా పాపికు తా తప్పుబట్టొ తీకిరి మల్లించిలాట తాకు మొర్నొతీకిరి తాకు రక్సించికిరి బడేంచైలా పాపోనెకు బుజ్జిపీలీసి బులి తెలిసిగిమ్మాసి.