1 Tarfore añí asman ot arekkán nicán deikkí ziyán ḍoóñr edde ammúikka: háñt twa fírista, ítarar át ot háñt tan afot asé ziín óilde ahéri gún, kiyólla-hoilé afot híine beh Allar guccá fúra. 2 Yárbaade añí ooin miyáilla aainar doijjar ḍóilla kessú deikkí; hé aainar doijjar farot Allar diiya bina dóri uitará tíyaiya asé zetará háyowan ore, yíbar mutti re, edde yíbar nam or nombór ore ziti aiccé. 3 Ítara Allar gulam Muúsar seér edde Bérasóol-or-Sóor war seér gaiyé, endilla,

"Ó Mabud, hárr Kudurutwala Kúda,

Tuáñr ham hotó ḍoóñr aar taajuippa!

Ó koum ókkol or Baáñcca,

hotó insáfi aar sóiyi Tuáñr rasta!

4 Ó Mabud, hon asé Tuáñre no ḍooraibó dé?

Hon asé Tuáñr nam or mohíma no goríbo dé?

Kiyólla-hoilé siríf Tuñí beh pak.

Tamám koum ókkole aái Tuáñr muúntu sóida foribó,

kiyólla-hoilé Tuáñr insáfi ham ókkol toh zahér óiye."*; Córiyot-nama 32:4; Yarmíyah 10:7; Zobur 86:9; 98:2.

5 Híin baade añí saái deikké de, asman ot ebaadot-hána gán, yáni Allar Házirir Ṭambu gán kúlagiye, 6 aar hé ebaadot-hána ttu háñt twa fírista uúin neeliaiccé ziín ottu háñt tan afot asé; ítara sáf edde sosoikka hoor findá aar ítarar sínat cúnar faṭṭi beráiya. 7 Sairó zandár gún ottu eggwá ye háñt twa fírista híin ore cúnar háñt twa fiyala diiyé; híin Allar guccá lói furaiya, zibá abadulabad hámica zinda asé. 8 Ebaadot-hána gán Allar mohíma ttu edde kudurut ottu aiyér de dúañ lói bórigiyegoi; aar hé ebaadot-hánat otúkkun foijjonto honókiye góli nó fare zetukkún háñto wa fíristar háñt tan afot tun nó fúra.