Zahéri 7

144,000 Isráili re moór mara giyéh

1 Yárbaade añí deikkí de, duniyair sair kunat sair gwá fírista tíyaiya, ziíne sairó kunar boiyar ore támai raikké, zeéne zobin ot, doijjat yáh honó gas ot boiyar no baá. 2 Hétunot añí ar eggwá fírista deikkí, zibá fuk mikká ttu uormikká uṛí aiyér, zibár hañse zinda Allar moór maroni asé. Ze sair gwá fírista re zobin edde doijja re hóti goríbar kémota diiya giyéh, híin ore íba ye ḍoóñr abase guzori-guzori 3 hoór de, "Zobin, doijja yáh gasgusála ókkol ore otókkal hóti no goijjó, zetókkal añára añárar Allar gulam ókkol ore ítarar kuwal ot moór nó mari." 4 Baade añí fúinni de, zetará re moór mara giyéh ítara muṭmaṭ ek lak salic sair ázar zon, zetará óilde Boni Isráil or fottí háandan ottu:

5 Yohúdahr háandan ottu moór mara giyéh de baró ázar ore,

héndilla Ruben or háandan ottu baró ázar ore,

Gad or háandan ottu baró ázar ore.

6 Acer or háandan ottu baró ázar ore,

Nafṭalir háandan ottu baró ázar ore,

Manasér háandan ottu baró ázar ore.

7 Símiyon or háandan ottu baró ázar ore,

Leévir háandan ottu baró ázar ore,

Yissákar or háandan ottu baró ázar ore.

8 Zebulun or háandan ottu baró ázar ore,

Yusúf or háandan ottu baró ázar ore,

Binyamin or háandan ottu baró ázar ore, moór mara giyéh.