1 कुरिन्थियों 8

मूर्तियन कै चढ़ाओ भौ खान के बारे मैं सबाल

1 अब मूर्तियन के अग्गु चढ़ाई भइ बलि के बारे मैं हम जानथैं।

की हम सबन कै ग्यान है: ग्यान घमंड पैदा करथै, लेकिन प्यार से उन्नति होथै। 2 अगर कोई समझै, कि मैं कछु जानथौं, तौ जैसो जाननो चहाईये बैसो अब तक नाय जानीं। 3 अगर कोई परमेस्वर कै प्यार करथै, तौ बाकै परमेस्वर जानथै।

4 तौ मूर्तियन के अग्गु चढ़ाई बलि कै खान के बारे मैं हम जानथैं, की मूर्ति दुनिया मैं कोई चीज नाय है, और एक कै छोड़कै कोई परमेस्वर हईये नाय। 5 अगर स्वर्ग और धरती मैं निरे ईस्वर कहे जाथैं, जैसे कि निरे ईस्वर और निरे प्रभु हैं, 6 तहुँओं हमरे झोने तौ एकै परमेस्वर है, मतलब; दऊवा परमेस्वर जोके घाँईं से सबै चीज हैं, और हमउँ बहे के ताहीं हैं, और एकै प्रभु है, मतलब ईसु मसीह जोसे सब चीज हैं और हमउँ बहे से हैं।

7 लेकिन सबन कै जौ ग्यान नाय है; पर कित्ते तौ अब तक मूरत कै मन मैं कछु समझथैं, मूर्तियन के अग्गु बलि करी भइ चीजन कै समझकै खाथैं। उनके ऐसो करन से उनकी आत्मा कमजोर होन के बजह से असुद्ध हुई जाथै। 8 खानु हमकै परमेस्वर के झोने नाय लै जागो, अगर हम बाकै नाय खाथैं तौ कछु नुकसान नाय, और अगर खांए तौ कछु फायदा नाय।

9 पर चौकन्ने रहबौ, ऐसो ना होबै कि, तुमरो जौ अधिकार कहूँ बिस्वास मैं कमजोरन के ताहीं ठोकर ना हुई जाए। 10 अगर तैं "अग्यानी" कै मूर्ति के मंदिर मैं बलि खात देखै, और बौ बिस्वास मैं कमजोर है, तौ का बाके मन मैं मूर्ति के अग्गु चढ़ाई भइ चीज कै खान की हिम्मत नाय हुई जागी? 11 ऐसे तेरे ग्यान के बजह से बौ कमजोर भईय्या जोके ताहीं मसीह मरो, अपने ग्यान के ताहीं नास हुई जागो! 12 तौ मसीह भईय्यन के गलती करन से और बाके कमजोर मन कै चोट लगान से तुम मसीह के ताहीं पाप करथौ। 13 जौ बजह से अगर खानु मेरे भईय्या और बहेनिया कै ठोकर खबाबै, तौ मैं कहु कैसियौ रीति से सिकार नाय खांगो, ऐसो ना होबै कि मैं अपने भईय्या के ताहीं ठोकर को बजह बनौ।