1 आखरी मैं, हम जाकै और नाय सहन कर सकथैं। इसलै हम एथेंस मैं इकल्ले रहन को फैसला करे हैं✝ 2 जब हम तीमुथियुस कै पनारे, हमरो भईय्या जो मसीह के बारे मैं परमेस्वर को सुसमाचार सुनान मैं सहकर्मी है, हम बाकै तुमकै बिस्वास मैं सांति देन ताहीं पनारे हैं, 3 ताकी जे कलेसन की बजह से तुम मैं से कोई पच्छू ना हटै, तुम खुद जानथौ, कि ऐसे कलेस हमरे ताहीं परमेस्वर की मरजी को हिस्सा हैं। 4 जबले हम तुमरे संग रहैं, हम तुमसे कहे करत रहैं, कि हमैं कलेस उठान पड़ंगे, और ऐसो भौ है; और तुम अच्छी तरह से जानथौ, बहे भौ। 5 इसलै मोकै तीमुथियुस कै भेजन पड़ो। मैं जाकै अब और सहन नाय कर सकत रहौं, इसलै मैं बाकै तुमरे बिस्वास के बारे मैं पता लगान के ताहीं भेजो। ऐसो हुइये नाय सकथै कि सैतान लालच से तुमकै लुभाई ना होबै, और हमरी पूरी मेहनत बेकार हुई गई होबै!

6 अब तीमुथियुस बापस आयगौ है, और बौ हमकै तुमरे बिस्वास और प्रेम के बारे मैं सुसमाचार दई है। बौ हमकै बताई कि तुम हमेसा हमरे बारे मैं अच्छो सोचथौ, और तुम हमैं उतनोई देखन ताहीं उतावले हौ, जितनो हम तुमकै देखन कै उतावले हैं।✝ 7 इसलै भईय्यौ और बहेनियौ, हमरी हर परेसानी और दुख मैं हमैं तुमरे बारे मैं प्रोत्साहित करो गौ, जौ तुमरो बिस्वास रहै, जो हमैं प्रोत्साहित करी, 8 अब हम बास्तव मैं जीथैं, अगर तुम प्रभु के संग अपनी जिंदगी मैं मजबूत रहबौ। 9 अब हम तुमरे ताहीं हमरे परमेस्वर को धन्यवाद दै सकथैं। हमरी खुसी जो तुमरी वजह से परमेस्वर के सामने है, जाके ताहीं हम परमेस्वर को धन्यवाद करथैं। 10 हम रात-दिन परमेस्वर से पूरे दिल से बिनती करथैं, कि हम तुमकै आमने-सामने देखैं, और जो तुमरे बिस्वास मैं जरूरी है, बौ घटी कै पूरो करै।

11 हमरे परमेस्वर और दऊवा खुद और हमरे प्रभु ईसु हमरे ताहीं तुमरे झोने आन को रस्ता तैयार कर सकथै! 12 प्रभु ऐसो कर दे, कि जैसो प्रेम हम तोसे करथैं; बैसिये तेरो प्रेम भी आपस मैं, सब जनी के संग बढ़ै, और बढ़ते जाबै। 13 ऐसे बौ तुमकै मजबूत करैगो, कि जब हमरो परम प्रभु ईसु अपने पवित्र लोगन के संग आबै, तौ बे हमरे परमेस्वर और दऊवा के सामने तुमरे मन और पवित्रता मैं सच्चे और निर्दोस निकरैं।*