1 पौलुस के घाँईं से जो, परमेस्वर की इच्छा से ईसु मसीह को प्रेरित है, और भईय्या तीमुथियुस के घाँईं से, 2 मसीह मैं बे पवित्र और विस्वासी भईय्यन के नाओं जो कुलुस्से मैं रहेत रहैं: हमरे दऊवा परमेस्वर के घाँईं से तुमकै अनुग्रह और सांति मिलत रहबै।

3 हम तुमरे ताहीं प्रार्थना करकै अपने प्रभु ईसु मसीह के दऊवा परमेस्वर कै हमेसा धन्यवाद करथैं। 4 काहैकि हम सुने हैं ईसु मसीह मैं तुमरो बिस्वास है। और सब पवित्र लोगन से प्रेम रखथौ। 5 जब सच्चो संदेस, सुसमाचार, पहली बार तुमरे झोने आओ, तौ तुम बौ आसा के बारे मैं सुने जो जौ प्रदान करथै। तौ तुम्हारो बिस्वास और प्रेम बाके ऊपर आधारित है जोकी तुम आसा करथौ, जो तुम्हारे ताहीं स्वर्ग मैं सुरक्छित रखो जाथै। 6 सुसमाचार जो पूरी दुनिया मैं फैलो है और फल लाए रौ है। बौ बढ़तै जाथै, जो दिन से तुम बाकै सुने, सच्चाई से परमेस्वर के अनुग्रह कै समझे, बौ तुम्हऊँ मैं काम करत जाए रहो है। 7 बहे की सिक्छा तुम हमरे प्रिय साथी सेवक इपफ्रास से पाए, जो हमरे ताहीं मसीह को भरोसेमंद सेवक है। 8 बहे तुमरे प्रेम कै जो आत्मा तुमकै दई है हमरे ऊपर दिखाई।

9 काहैकि जो दिन से जौ सुने हैं, हमउँ तुमरे ताहीं प्रार्थना और बिनती करन से नाय चूकथैं कि तुम परमेस्वर की इच्छा और सब ग्यान और समझ जो आत्मा देथै, बासे परिपूर्ड़ हुई जाबौ। 10 ताकी तुमरो चाल-चलन प्रभु के लायक होबै और सब तरहन से खुस होबौ, तुम मैं अच्छे काम के फल लगैं और तुम परमेस्वर की पहचान मैं बढ़ते चले जाबौ, 11 बाकी महिमा की सक्ति के अनुसार सब तरहन जैसी सामर्थ्य और ताकतबर होते जाबौ, हिंयाँ ले कि खुसी के संग सब तरहन से धीरज और सहनसीलता दिखाए सकौ। 12 और दऊवा को धन्यवाद करत रहबौ, जो हमकै जौ लायक बनाई कि जोती मैं पवित्र लोगन के संग उत्तराधिकार मैं सहयोगी होमैं। 13 बहे हमकै जौ अंधकार कि सक्ति से छुड़ाय कै अपने प्रिय लौड़ा के राज्य मैं आन दई, 14 जामैं हमकै छुटकारा मतलब पापन कि माफी मिलथै।

15 मसीह अद्रस्य परमेस्वर को दृस्य प्रतिरूप है और बौ पूरी दुनिया मैं पहलोठो है। जो सब निर्मित वस्तुन से स्रेस्ठ है। 16 काहैकि बहे मैं सबै चीजन कै बनाओ गौ, चाहे स्वर्ग की होमैं या पृथ्वी की, या देखी या बगैर देखी, या आत्मिक सक्ति, सिंहासन होबै या प्रभुता, का प्रधानता, का अधिकार, सबै चीज बहे से और बहे के ताहीं सिरजी गई हैं। 17 मसीह सब चीजन मैं पहले है, और बाके संग सब चीजन को एक सई ठिया रहै। 18 बौ अपने सरीर को मुखिया है, मतलब कलीसिया को मूड़; बहे तौ सरीर की जिंदगी को स्रोत है। बौ पहलोठो लौड़ा है। जहे मारे बाकै मरन से उठाओ गौ रहै। ताकी बौ सबै चीजन मैं पहली जघा पाबै। 19 काहैकि जौ परमेस्वर के खुद के फैसला से रहै, कि खुद लौड़ा मैं परमेस्वर को पूरो स्वभाव बास करै। 20 तौ, परमेस्वर पूरे विस्व कै अपने लौड़ा के जरिया, बापस लान को फैसला करी। परमेस्वर अपने लौड़ा के खून के जरिया क्रूस पर सांति स्थापित करी ताकी पृथ्वी और स्वर्ग कि सब चीजैं क्रूस के जरिया मेल कर सकैं।

21 तुम जो पहले पराए रहौ और तुमरे सोचे भै और बुरे कामन कि बजह से मन से बैरी रहौ। 22 फिर भी बौ अपनी सारीरिक सरीर मैं मरन के जरिया तुमसे मेल कर लई कि तुमकै अपने सामने पवित्र, निस्कलंक और निर्दोस बनाएकै लाबै। 23 जौ तभई हुई सकथै जब तुम बिस्वास के बुनियाद मैं मजबूत हुईकै बने रहबौ और सुसमाचार की बौ आसा कै जो तुम सुने हौ मत छोड़ौ, जोको प्रचार आसमान के तरे सब लोगन कै करौ गौ; और जोको मैं पौलुस सेवक बनो।

24 अब मैं बे दुखन की बजह से खुसी मनाथौं, जो तुमरे ताहीं दुख उठाथौं, और मसीह के कलेस की घटी बाके सरीर के ताहीं जैसो कि कलीसिया के ताहीं अपने सरीर मैं पूरी कर देथौं। 25 परमेस्वर मोकै कलीसिया को सेवक बनाई, और जौ काम तुमरो मोकै दई कि मैं तुम्हारी भलाई के ताहीं करौं, जौ काम बाको संदेस पूरी तरह से फैलाय सकौं। 26 जो कि बौ रहस्य है जोकै बौ सबै इंसानन से पिछले सबै युग मैं लुकाई रहै लेकिन अब अपने पवित्र लोगन के सामने प्रकट करी है। 27 परमेस्वर की योजना है कि बौ अपने लोगन कै अपनो रहस्य बताबै, जौ समृद्ध और गौरवसाली रहस्य जो बाके पास सब जनी के ताहीं है। और रहस्य जौ है कि मसीह तुमरे मन मैं बास करथै, जोको मतलब है कि तुम परमेस्वर की महिमा मैं आस रखथौ। 28 इसलै हम सबन कै मसीह को प्रचार सुनाथैं। हर संभव ग्यान के संग हम उन्हैं चितौनी देथैं और सिखाथैं ताकी हर एक कै मसीह मैं एक होन के बजह से परिपक्क आदमी के रूप मैं परमेस्वर की उपस्थिति मैं लाओ जाए सकै। 29 जाकै पूरो करन के ताहीं मैं बौ महान सक्ति को इस्तमाल करकै परिस्रम और संघर्स करथौ, जो मोकै मसीह से मिलथै और जो मेरे मैं काम करथै।