1 Teemb ndeem, ŋ hotta teere ŋ yaahi ñaahmiŋ Yi ɓoof ŋ ɓoofoha-buuri, wa raakeen fiis ŋ ɗooƴi na ɗafki, wa ñaakɗuusa na ndaɗ yasna-kanak ne wa rangu, ndaɗ nu nik raakka mandargaani teeɓoh ne teerndi ranguuɗ ŋ tiikiŋ Kooh. 2 Ŋ hotta malaaka raakiɗ hatil leehkeeɗa an : « A ɓa yeyyoo nihis ndaɗ ci, a rangis teerndi ? » 3 Waaye yi yeyyoo rangis teerndi a marak ɗooƴi, raakɗi ; wa ŋ Asamaan haa, wa ŋ kehƴi haa, wa ŋ ooɓ kehƴi haa.

4 Ŋ fuɗeeɗa fuɗ miskiɗ ŋ ini ali ɓo' yeyyooɗi rangis teerndi, ɓo' yeyyooɗi marak ŋ ɗooƴi. 5 Yakak yino ŋ yakak ca woosa so ne : « Kina fuɗ. Marka, gayndeeniŋ cuuɓiŋ Yudaa, yi setiŋ Dawuuda saahiɗ ɓi sang ɗe ; a yeyyoo'iɗ nihis ndaɗ ci yasna-kanak ci, a rangis teerndi. »

6 Weɗ ŋ hotoh kuy mbaal ƴin. A tufkee ŋ leernaŋ ɓoofoha-buura ; pesiɗ ca nikiis ca na yakak ca willa ɗe. A mandee na ini hoosu ; a raakee wiic yasna-kanak na has yasna-kanak, ceɗ Fuuɗis ciŋ Kooh yasna-kanak ci✝ woosohu ŋ kehƴi jen. 7 Kuyaŋ Mbaala ƴina kaɗta, a ɓayya teernda nikee ŋ yaah-ñaahmiŋ Yi ɓoof ŋ ɓoofoha-buuri.

8 Wa a ɓaya, pesiɗ ca nikiis ca na yakak ca ndaŋkiyaah-kanak ca na nikiis ca (24) ƴekiɗta Kuyaŋ Mbaala ƴina. Raak yaa nu nga ambiɗ koora na kaas urus riifiɗ na cuuraay, cuuraay ceem ceɗ kiim ciŋ ɓo'-Kooh ci. 9 Ɓa ƴeekeeɗa ƴeek as an :

« Fu yeyyoo'iɗ ɓay teerndi,

fu nihis ndaɗ ci.

Laam fu hoosuuɗ ne fu seeƴkohu

te na ñif miŋ ɗa

fu tosiɗ wuu Kooh ɓo' laayiɗ,

ngaŋ heet ci jen na peɗeem ci jen,

cuuɓ ci jen na kur ci jen.

10 Fu tumiɗ ɓa Nguur,

fu tummba ɓa seeƴkiɗoh wuu Koohiŋ ɓoo

te ɓa hey nike buur ŋ kehƴi jen. »

11 Ŋ markissa, ŋ kerahha hooso malaaka laayoh na laayoh, ɓa nikee ɓi milyongi milyong malaaka, ɓa willa ɓoofoha-buura, na pesiɗ ca na yakak ca. 12 Ca ƴeekeeɗa ŋ ɗafka an :

« Kuyiŋ Mbaali ƴini hoosu

eɗaah hatil,

na raak-raak,

na liiɓohaaɗ moɗiɗ,

na doole,

a yi eɗaah cir,

a yakɗaah

a yi ƴeekaah. »

13 Ŋ nammba kerah in ci Kooh fer ŋ Eel ci, na kehƴi na ooɓ kehƴi na ɗooƴ cookmi, in ci nik ŋ Adina jen ƴeekeeɗa an :

« Yi ɓoof ŋ ɓoofoha-buuri

na Kuyiŋ Mbaali ƴini,

ƴeeksaat, ɓa yakɗassaat,

ɓa eɗu cir na hatil

po faw ! »

14 Pesiɗ ca nikiis ca woyeeɗa ne « Amiin ! » Te yakak ca raɗukka ñar, ñaamkeeɗa.