1,2 Wa raakeen ƴaar teeku Lasaar, a kosaayya. A genee Betani, a yi na taambɗoh ciŋ ɗe ɓitiɓ ci Mari na Marta. Mari, a yi yiifan kot ciŋ Yeesu laackoloñ, a moos ca na findiŋ ɗe. E taambɗoh ce Lasaar kosaaye. 3 Taambɗoh ciŋ Lasaar ɓeem woosohha ŋ Yeesu ne a woysaat ne nawleece kosaayiɗ.

4 Wa Yeesu woyuu wa, a woosa ne : « Kosaay keem hay ne wa ap haa ; waaye wa na hee teeɓohe yaki Kooh yak, jaar yaki Kuɓkiŋ Kooh yak hotuk nga. » 5 Raak Yeesu nawle'koheen na Marta na taambɗoh ciŋ ɗe Mari na Lasaar.

6 Waaye wa a kerah ne Lasaar kosaayiɗ, a ɓoofissa neeh kanak ŋ ɗiska a nike ; 7 ƴutta, a woosa taalubeeciŋ ɗe ne : « Ɓoo dokkaat Yudee. » 8 Taalubeeciŋ ɗe woosa ɗe ne : « Jangɗohohi, maañaaɗi an Yawuut ci waaɗee ɗa tapsoh atoh ne ɓa ap ɗa, fu dokkissee nga e ? » 9 A woosa ɓa ne : « Ca wahtu ndaŋkiyaah na kanak (12) ceɗ raak ŋ mbehi. Ɓo' nu tiind na noh ɗah, a hey hote siñaariŋ Adina, a kafndukanɗi. 10 Waaye ɓo' nu tiind na wek ɗah, a raakanɗi siñaari niitɗan ɗe, a hey kafnduke. »

11 Wi a woo ineem, a degga nga ne : « Lasaar nawle ɓoo neehiɗ, waaye maa kaɗ ɗe yuna. » 12 Taalubeeci woosa ɗe ne : « Kilifaani, nik ne a neehiɗ ɗah, a hey wire. » 13 Yeesu woyee ɓa ndeem ne Lasaar kaaniɗ waaye ɓa liiɓee ne a woo neeh moɗoɗ. 14 Weɗi a woyoh ɓa hooliɗ ne : « Lasaar kaaniɗ ; 15 te ŋ sumiɗ saguuɗu ŋ ini ŋ nikeeɗi ndaam. Ŋ ineem, ɗu hey yo mine kos. Ɗiski wa nik, ɓoo kaɗaat nga ɗe. » 16 Ŋ ineem Tomaa, yi na woyse Siisi, woosa taalubeeci ɓinooɓi ne : « Ɓoo kaɗaat, ɓoo nama kaan na kilifaani. »

17 Wa Yeesu kaɗ po a reesa ɗiska, a hotta ne Lasaar tumiɗ neeh nikiis ŋ ruy-ruya. 18 Betani useeɗi Yerusalem, harmban ca joyeen nik kilomeet kaahay. 19 Te Yawuut laayiɗ hayeen ŋ Marta na Mari ne ɓa corok ɓa ŋ kakaan kiŋ taambɗoh ɓa Lasaar.

20 Wa Marta kerah ne Yeesu yaa hay, a kaɗta coha na ɗe. Mari tassa ŋ kahna. 21 Marta woosa Yeesu ne : « Heɗi, fu nikeen nga ɗah, taambɗoh ho heeɗi kaane. 22 Waaye po ɗiski wa nik sah, ŋ inhiɗ ne in nu fu kiim Kooh ɗah, a on ɗa wa. » 23 Yeesu woosa ɗe ne : « Taambɗoh fu hey hulte. » 24 Marta woosa ɗe ne : « Ŋ inhiɗ ne a hey hulte ŋ hultaŋ kaaniɗ ca ngaŋ mbeha mirndoh. » 25 Yeesu woosa ɗe ne : « A mi hultuki, a mi kipes ki. Ɓo' nu kos so ɗah, a hey pese, ali a kaan sah. 26 Te ɓi na pese jen, kossa so, ɓa heyɗi kaane muk. Fu kosiɗ ineem e ? » 27 Marta woosa ɗe ne : « Ee, Heɗi, ŋ kosiɗ ne a fu Mucɗohi Gapohse, Kuɓkiŋ Kooh, yi joyee hay Adina. »

28 Wa Marta woo ineem, a kaɗta, a ɓeeɗukka taambɗoh ce Mari, a woosa ɗe ŋ kehƴi ne : « Jangɗohohi hayiɗ, a woo ne fu tahsaa ɗe. » 29 Mari kerah kerah woo keem rek, a jaarra kuruk, a kaɗeeɗa ŋ Yeesu, 30 raak Yeesu aasɗi kur ka paaɗ, a risee ŋ ɗiska Marta cohee na ɗe. 31 Yawuut laayiɗ nikeen na Mari ŋ kahna giifɗeeɗa ɗe. Wa ɓa hot ɗe gooñkiɗ pulla, ɓa ñaakiɗta ɗe, ɓa liiɓee ne a na kee fuɗa ŋ ruy-ruya.

32 Wa Mari ree, a hot hot Yeesu, a keennda ŋ kot ciŋ ɗe, a woosa ɗe ne : « Heɗi, fu nikeen nga ɗah, taambɗoh ho heeɗi kaane. » 33 Wa Yeesu hot Mari rooyeeɗa, a yi na Yawuut ca hunee na ɗe, a fuuppa sagu ayruk, wa yoondiɗta ɗe po a yegiɗtaa faaniŋ ɗe. 34 A woosa ɓa ne : « Ɗu ɗaak ɗe ŋ winde ruy-ruy ? » Ɓa woosa ɗe ne : « Kilifaani, haya fu hot. » 35 Yeesu fuɗta. 36 Weɗ Yawuut ca woyoh ne : « Markaat rek findi a waaɗohee ɗe ! » 37 Waaye raakka ɓa woo ne : « A yi hotiɗ fuulɗi, a mineeɗi nam tum po Lasaar kaanuu e ? »

38 Yeesu fuupissa sagu ayruk, a kaɗta ruy-ruya ; wa nikee hur atoh, wa ranguusa na atoh yakak. 39 Yeesu woosa ne : « Nihsaat atoh fi. » Marta, taambɗoh kaanɗa woosa ɗe ne : « Heɗi, a joyiɗ raak het, ina a ɗaakohu ndii wa tumiɗ neeh nikiis. » 40 Yeesu woosa ɗe ne : « Ŋ wooɗi ɗa ne fu kos ɗah, fu hey hote findi Kooh yakoh e ? »

41 Ŋ ineem ɓa nihissa atoh fa, Yeesu taaknukka ŋ Eel ci, a woosa ne : « Baab, mi yii corkiɗ ɗa ŋ ini fu teyɗukiɗ to. 42 Ŋ inhiɗ ne fu gen ndo teyɗukiɗ, waaye ŋ woyiɗ sagu mboolndi wil lo, ne ɓa min kos ne a fu woos so. » 43 Wi a ƴut woo ineem, a leehukka ŋ ɗafka ne : « Lasaar, pula fu hay ndii. » 44 Kaanɗa pulla na kot ciŋ ɗe na yaah ciŋ ɗe liwuuɗ na uuf, fikiiriŋ ɗe muuruusa na piis. Yeesu woosa ɓa ne : « Toksaat ɗe, ɗu faɗ ɗe a coot. »

45 Yawuut laayiɗ ŋ ɓa hayee ŋ Mari te ɓa hotta in ca Yeesu haɓiɗ, kossa ɗe. 46 Waaye raakka ɓa kaɗ ŋ Farisen ca, ɓa woosa ɓa in ca Yeesu haɓiɗ. 47 Weɗi kilifaacaŋ seeƴkiɗoh ca na Farisen ca cohɗohoh saangnaŋ atte'oh ca* Musaa. Ɓa mineen ambɗuk ɓo' waaye ɓa mineeɗi ɗe apoot ne ɓa hot ne a joy joy apu ɗah, ɓa meeɗ ɗe ɓay ŋ atte'oh ci nikiɗ Rom ŋ ndaam., ɓa woosa ne : « Ɓoo joy na tum ? Ƴaarii keemaan ci a na tume ca ɗii laay kat ! 48 Ɓoo faɗ ɗe an ɗah, ɓooɓi jen hey ɗe kose te ɓi Rom hey haye yahrohe Ɗiskiŋ ɓoo Hooliɗi, ɓa sañ cuuɓiŋ ɓoo. »

49 Ƴaar nga ɓa teeksee Kayif, a yi nikee seeƴkiɗoha yakka ŋ kiis kaam, a woosa ɓa ne : « Ɗu inahɗi ini raak. 50 Ɗu inahɗi ne ɓo' yino kaan wuu cuuɓi, weɗ ngisoh nga ɗu, kur ki jen sañu. » 51 A woyiɗ woo keem waaye wa pulohɗi nga ɗe. Nika a nikee seeƴkiɗoha yakka ŋ kiis ka, weɗ tah a yegɗohha findi woosuuɗ ne Yeesu hey kaane wuu cuuɓi. 52 Wa nikɗi ne a joyee kaan wuu cuuɓi dong, waaye a kaaniɗ ne a cohɗoh kuɓuuciŋ Kooh pasarkohiɗ ci, ɓa nik cuuɓ yino.

53 Mbaɗi, weɗ ɓa tufkoh ne ɓa hey ɗe ape. 54 Ŋ ineem Yeesu tiindtiɗohisɗi halang ŋ ɗooƴ Yawuut ca. A pulohha ndaam, a kaɗta ŋ kur teeku Efrayim ŋ sero kehƴa hulanga ; a nikka nga a yi na taalubeeciŋ ɗe.

55 Wa raak feetiŋ Paakiŋ Yawuut ci reɓeeɗa, ɓo' laayiɗ pulohha kur caŋ ɓa kaɗeeɗa Yerusalem ne ɓa farsuka bala feeti reyan. 56 Ɓa waakeeɗa Yeesu te ŋ ɗiska ɓa nikee ŋ Kahan Kooh ɓa meeksoheeɗa ŋ harmban ɓa ne : « Ɗu hotoha na ? Ɗu liiɓiɗ ne a hey haye ŋ feeti e ? » 57 Waam kilifaacaŋ seeƴkiɗoh ca na Farisen ca nakoheen ne, ɓo' nu inah ɗiski Yeesu nik ɗah, ɓa woyaat ɓa wa, ne a min ambu.