27 Wa Yeesu yipuk, ƴaar gen kur ka kaɗta coha na ɗe, ca jiini ambee ɗe. A gijeen ɓekuk kulɓa te a nikeeɗi ŋ kahan, a genee ruy-ruy ca. 28 A hotta Yeesu, a ƴekka ŋ fikiice a leehkeeɗa ŋ ɗafka, a woosa ne : « Yeesu Kuɓkiŋ Kooh yi ŋ ɗafka ɗafka, fu nar ye nga so ? Mi yii kiim ɗa ne fu tumuu so miskiɗ. »

29 Laam raak Yeesu woyiɗ jiiniica na hoolaaɗiika ca hoolaaɗi, ne ca pulaat ŋ ƴaara. Ca meeɗeen ɗe amb waas laayiɗ. Ca ammba ɗe ɗah, ɓa tok yaah ci na kot ciŋ ɗe na ceen, ɓa niiɗee ɗe. Hondohɗi a nguɗ ceen ceem te jiiniica hiir ɗe ne a kaɗ ɗaaya ŋ nduufa.

30 Yeesu meekissa ƴaara ne : « Fu teeku na ? » A loffa ne « Ŋ teeku Lesiyong*8:30 lesiyong : ŋ ɓi Rom ɗeɓgaan, weɗ soldaar junni junni.. » Ca jiini gooñ nikee na ɗe, weɗ tah a woosa ineem. 31 Jiiniica kiimeeɗa Yeesu ne a kinaat ca tuuƴ ŋ nunga nooɗɗa ca na hee torhiɗohse. 32 Raak ŋ serooɓa, ŋ tangoora, gat mbaam-huk yakak nikee ñameeɗa nga. Jiiniica kiimmba Yeesu keeh-keeh ne a on ca ca aas ŋ mbaam ca ; a onnda ca ineem. 33 Ca pulla ŋ ƴaara, ca aassa ŋ mbaam ca, gata jen giirukka, hunnda na mbartala, faɗsukka ŋ cookma, mbaam ca lappa nga.

34 Wa ɓooɓa niiɗee mbaam ca hot ineem, ɓa nuppa, ɓa kaɗtaa woya ŋ kur-taaha na kur ca ƴin ca. 35 Ɓooɓa hayeeɗa marke ini raak. Ɓa reesa, ɓa raakka ƴaara jiiniica puloh nga ɗe ɓoofiɗ ŋ kot ciŋ Yeesu, ɓekkiɗ kulɓa, a hunnda na sagooniŋ ɗe ; ɓa neƴƴohha.