1,2 Ngoi, Paulus, to lefo surata nena-ne ra ngana, Timotius, ga'a ma tero ḇato sa'olo ngoi 'ari ngowa'a madutu, sababu ngana re ngoi, ngene rewo ngaku Ma Jou Yesus. Ngoi to dadi Kristus Yesus 'ai so-soma'a mete'e Ma Jou'ongu Madutu 'ai parenta, Unanga ga'a nanga Salamata ma Cimi, re ḏi'i mete'e Yesus Kristus 'ai parenta, Unanga ga'a nanga ngo-nganono.✝

Ngoi to golo'o ra Ma Jou'ongu Madutu nanga Ḇaḇa re Yesus Kristus nanga Jou di'a 'aḏi sijumu 'akala re sinyingara ma la-la re 'aḏi pula'a mura re dadalara re ḏi'i dame ra ngana.

3 Timotius, ngoi to golo'o mode-mode'e ngana no tegoro si toma limau Epesus, ma tero sa'olo ngoi to kanau ḏua wakutu ngoi to tagi nyangu toma daeraha Makedonia. 'Age ngowa'a lelegu toma limau gena-ge 'aḏi doto'o do-doto'o ma rapu. Sababu gena-ge, ngoi to mau ngana no soma'a ananga balasu matogumu 'aḏi doto'o 'ori i'a ma rapu gena-ge. 4 Ngana balasu no siajele toma ngowa'a lelegu gena-ge, la 'aḏi matogumu 'aḏi upa'a manga wakutu tau-taunu di'a 'aḏi jarita sa-sakala re jarita manga 'asala ga'a kama togumu ua. Mo-moini gena-ge, pa'i dadi ma'u rubutu ḇato ga'a 'i siriono ngowa'a ua di'a si'a'a Ma Jou'ongu Madutu 'ai 'akala ma mau. Ma Jou'ongu Madutu 'ai 'akala ma mau nena-ne: Ananga 'aḏi sidoto'o 'Ai do-doto'o, la ngowa'a ḏuanga i'a 'aḏi 'ahu mete'e manga ngo-ngaku ra Ma Jou Yesus. 5 Ngoi to soma'a ngana so'o gena-ge, la ngowa'a ngaku Yesus mo-moini 'aḏi dadi ngowa'a ga'a manga 'akala re sinyingara 'i boloto re 'akala re sinyingara ma kanau 'i 'ofi-'ofi, re nyengara 'aḏi ngaku mode-mode'e ra Ma Jou, re 'aḏi waro mangale 'ori i'a ma jira re ma la-la, singadolo ananga nga'unu 'aḏi ma'u dadalara mode-mode'e. 6 'Age rema ngowa'a 'aḏi 'ahu so'o gena-ge ua. Ananga gena-ge 'aḏi iranga ngo'omo, sababu 'aḏi rubutu mangale 'ori i'a ma faeda 'i cua. 7 Ananga 'aḏi mau dadi guru-guru 'agama. Momongolo ua, ananga masiretene ya nana'o ua demo-demo ga'a ananga ya sikanau re 'oru ḇato ga'a ananga ya siajele mode-mode'e ya sahe ua ḏi'i.

8 Ngene wa waro Musa 'ai hukumu lai rousu na'o ngene wa si'a'a mode-mode'e mete'e Ma Jou'ongu Madutu 'ai 'akala ma mau. 9 Balasu wa 'elingi Musa 'ai hukumu gena-ge 'i si'a'a di'a 'a guna? Di'a ngowa'a loasa re banari?! So'o gena-ge ua?! Mada'a di'a ngowa'a ga'a 'aḏi mete'e hukumu ua re ngowa'a ma jira, ngowa'a ga'a silamo'o re siḏubuso Ma Jou'ongu Madutu ua, re ngowa'a baraḏosa, ngowa'a kama 'agama ua, re ngowa'a 'aḏi mete'e dungia ma nyafusu, ngowa'a 'aḏi sisengene manga ḇaḇa re manga ngina re ngowa'a lelegu ga'a 'aḏi sisengene ngowa'a. 10 Ngowa'a su-sudala, homoseks, ngowa'a ga'a tori-tori'i ngowa'a, tukanga sa-sakala, sakisi-sakisi sa-sakala re 'a guna ḇato 'aḏi madaga'a 'ori i'a 'i mete'e ua do-doto'o banari. 11 Ngene nga'unu wa sanga toma do-doto'o so'o gena-ge toma Habari Roanga ra Ma Jou'ongu Madutu toma Gau'u ga'a 'O patasa di'a 'o dawongo ngowa'a manga puji re silamo'o. Unanga gena-ge 'o cumutu ngoi di'a ta singadolo Habari Roanga.

12 Ngoi to sibere ie 'ari murasa ma la ra Kristus Yesus, nanga Jou, sababu Unanga 'o cumutu ngoi patasa ta siḏagi 'Ai munara. Re Unanga ro pula'a de-de'e ra ngoi, la ngoi tu siḏagi 'Ai munara gena-ge. 13 'Au wali, wakutu ngoi to ngaku Yesus nyangu, ngoi to je-jengere Unanga re to sisikisa kama sijumu ua 'akala re sinyingara ma la-la toma ngowa'a ngaku Yesus. Kalaha so'o gena, Ma Jou'ongu Madutu 'o sijumu 'Ai 'akala re sinyingara ma la-la, sababu ngoi ta waro ua 'oru ga'a ngoi ta 'a'a sababu ngoi to ngaku Yesus nyangu.✝ 14 Re sidogo ḏi'i, Unanga 'o pula'a 'ai mura re dadalara pai-pai'i ra ngoi singadolo ngoi nga'unu to ngaku Unanga re to dadalara ngowa'a lelegu, ma la-lamo'o i'a ngowa'a ngaku Yesus. Gena-ge 'i dadi ḏi'i di'a ngowa'a mo-moini ga'a wo marimoi ra Kristus Yesus. 15 'Age demo ma betongo so'o ne: "Kristus Yesus 'o sapolo toma dungia di'a 'O sisalamata ngowa-ngowa'a baraḏosa." Demo gena-ge 'i tero re balasu wa dawongo re wa ngaku mode-mode'e. Ngoi masiretene 'ari ḏosa lai lamo'o toma ngowa'a baraḏosa mo-moini. 16 Kalaha ngoi 'ari ngari so'o gena-ge, Kristus Yesus 'o sijumu 'Ai 'akala re sinyingara ma la-la, sababu unanga gena-ge 'o nga'unu sibaiti 'ai 'akala ma ḇanyo kama ḏogumu ua. Enanga gena-ge 'i dadi sa'olo nana'o rimoi di'a ngowa-ngowa'a, la ḏuanga i'a ananga ḏi'i nyengara 'aḏi sanga salamata re 'aḏi sanga 'ahu kasingado-ngadolo i'a, na'o ananga 'aḏi ngaku Yesus.

17 Ngene balasu silamo'o re siḏubuso Ma Jou'ongu Madutu re silamo'o 'Ai lomanga kasingado-ngadolo i'a, sababu Unanga 'o 'Olana da'a re sino moju ga'a 'O 'ahu kasingado-ngadolo i'a, re ngene wo oḏi'i yoḏu'u, Unanga pa'i matengo. 'Amin.

18 Timotius, 'ari ngowa'a nau'u, nange-ne ngoi tini pula'a bererongo nena-ne: Ngoi mau tini si'elingi 'oru ga'a 'au nga'ene 'o nabi-nabi toma jama'ata ya siajele pasala ḏua ra Ma Jou'ongu Madutu ino. Wakutu no talaḏi ngowa'a, ga'a 'aḏi singadolo habari sa-sakala re 'aḏi ngaku ua Kristus Yesus, ngana nyengara na sipake demo gena-ge sa'olo 'ani dare rimoi ma tero sa'olo sordado toma parangi ma dara, 19 no macako'o namo-namoto 'ani ngo-ngaku ga'a banari rani 'akala re sinyingara ma kanau 'i 'ofi-'ofi. 'Age rema ngowa'a 'aḏi madaga'a mete'e ua manga 'akala re sinyingara ma kanau singadolo manga ngo-ngaku 'i dadi cira. 20 'Age nga muḏiḏi tamanga sigolona ga'a manga ngo-ngaku 'i cira: 'a Himeneus re 'a Aleksander. Ngoi ta'u sieanga i'a 'Iblisi ya'u kuasa. Gena-ge 'i dadi do-doto'o rimoi ra ananga, la 'aḏi matogumu 'aḏi sije-jengere Ma Jou'ongu Madutu sababu ananga 'aḏi doto'o 'ori i'a ma rapu gena-ge, ga'a 'i ma'u lawana 'ori i'a banari ra Unanga ino.