1 Timotius 5

17 Jama’ata ma bi-biri’i--bi-biri’i ga’a 'aḏi cufala ya siḏagi manga munara, gena-ge enanga ma ngi’i ngowa’a ya’u silamo’o mode-mode’e re ya’u pula’a ngogele, ma la-lamo’o i’a ngowa’a ga’a 'aḏi singadolo bolo 'aḏi doto’o mangale Habari Roanga. 18 Sababu silefo ḏua toma Boku 'Ofi-'Ofi ma dara so’o nena-ne: "Sapi ga’a sipake ruju gandum, awa na sao ma madanga."*5:18 Enanga gena-ge, la sapi gena-ge nyengara 'i oromo toma munara ma dara. Ma siḏa, sapi sipake ruju gandum, kara ngowa’a 'aḏi sitaro’o gandum singadolo 'i 'ofi (Mat. 3:12). So’o gena ḏi’i 'i silefo ḏua so’o nena-ne: "Ngowa’a ga’a 'aḏi munara, manga haku 'aḏi sanga enanga ma ngogele."✝5:18 Dad. 25:4; Mat. 10:10; Luk. 10:7