João 11

Lazarus 'o sengene

1 'Age rema ngowa’a matengo 'ai lomanga Lazarus ga’a 'o tegoro toma gamu Betania ma wala ḏu moi re 'ai biḏanga nga muḏiḏi, ngo Maria re ngo Marta.✝11:1 Luk. 10:38-39 2 (Ngo Maria gena-ge matengo ga’a mo siba-ba’ala 'ami bou-bounu ra Ma Jou 'ai rou re masipii’i rami utu.) Toma 'orasa gena-ge Lazarus 'o eta’a toma si-siḏi.✝11:2 Yoh. 12:3 3 Dadi ngo Maria re ngo Marta, ananga 'aḏi soma’a ngowa’a matengo 'o tagi re 'o sihabari ra Yesus, "Ma Jou, 'Ani ḏagilomu ga’a no dadalara, unanga 'o siḏi."

4 Wakutu Yesus 'a 'isene habari gena-ge, Unanga 'o kanau, "Si-siḏi gena-ge 'i sigasa toma sengene ua. Gena-ge ri dadi, la ngowa’a 'aḏi oḏi’i Ma Jou’ongu Madutu 'ai kuasa re 'aḏi silamo’o masala ḏi’i Unanga gena-ge 'Ai Ngowa’a Nau’u."

5 Yesus 'O dadalara ngo Marta re ngo Maria re manga iḏanga 'a Lazarus. 6 Sababu gena-ge, wakutu Unanga 'a 'isene habari mangale 'a Lazarus 'o siḏi, Unanga 'o matahana Tai ngi’i wange ḏiḏi moju. 7 Wange ḏiḏi pasala i’a, Yesus 'o kanau Tai me-mete’e, "Ino ngene wo maḏibo toma daeraha Yudea."

8 Ananga ya sangoro, "Mada’a Rabi*11:8 Rabi toma demo Yunani <<Guru>> di’a ngowa’a ga’a 'o sayanga ma jingi’i, 'au ngau i’a ngowa-ngowa’a Yahudi da’a mau 'aḏi poini Jou reo maḏi singadolo no sengene, simara nange-ne Jou no mau maḏibo i’a da’a moju?!"

9 Ḏua Yesus 'o sangoro ra ananga reo 'ade-'ade so’o ne: "Wange moi ma dara 'age jam nyagi moi re romoḏiḏi wakutu 'i tarangi. Ngowa’a ga’a 'aḏi tagi wakutu wa-wangere kama pele’e ua, sababu 'aḏi oḏi’i wangere ma la’o ma tarangi. 10 Mada’a ngowa’a ga’a 'aḏi tagi wakutu lobi’i, ananga 'aḏi pele’e sababu tarangi 'i cua."

11 Togumu i’a Yesus 'o kanau so’o gena-ge, Unanga dadunu 'o kanau moju, "Ngene nanga ḏagilomu 'a Lazarus, unanga 'o otu. Mada’a maha Ngoi to tagi i’a Tu simomi’i."

12 Yesus 'ai me-mete’e ananga 'aḏi kanau, "Ma Jou na’o Lazarus 'o otu, unanga ḏuanga i’a 'o la."

13 Yesus 'ai maksudu 'a Lazarus ro sengene. Mada’a ananga 'aḏi ta’ajiri Unanga 'ai maksudu mangale Lazarus 'o otu biasa.

14 Sababu gena-ge, Yesus 'a sitarangi 'ai maksudu ra ananga, re 'o kanau, "Lazarus ro sengene. 15 Ngoi to sanangi sababu ngoi to cua da’a ra Lazarus. Sababu 'oru ga’a 'i dadi donga rimoi di’a ngini ni ngaku Ngoi. Ino ngene wo tagi wo si’a da’a ra Lazarus."

16 Ḏua 'a Tomas, ga’a ngowa’a 'o si’aro’o unanga 'Ngowa’a Sasalanga', 'o kanau Tai ḏagilomu-ḏagilomu Yesus 'ai me-mete’e, "Ino, ngene wo mete’e Yesus dadi ngene wo sengene mamete’e ra Unanga."

Yesus nga’unu 'o si’ahu moju re 'O pula’a 'ahu toma manusia

17 Wakutu Yesus 'o ngadolo toma ngi’i gena-ge, 'a Lazarus utu rata ḏua toma kubu ma dara. 18 Gamu Betania co-cori limau Yerusalem, ḏa ma giḏanga kilo ro’ange. 19 Ngowa’a Yahudi manga repe 'aḏi sapolo di’a 'aḏi sihiburu ngo Marta re ngo Maria, sababu Lazarus ananga manga iḏanga ro sengene.

20 Wakutu ngo Marta mo 'isene Yesus ro sapolo, munanga mo supu mo ma’u sanga Unanga. Mada’a ngo Maria munanga toma wala ma dara. 21 Marta mo kanau ra Yesus, "Ma Jou, na’o Ma Jou 'ane ḏua toma wangere gena-ge, tantu ḏua 'ari iḏanga 'o sengene ua. 22 Mada’a kalaha so’o gena, ngoi ta waro mangale wangere nange-ne, na’o Ma Jou no golo’o 'oru ḇato ra Ma Jou’ongu Madutu, Unanga No pula’a."

23 Yesus 'o kanau i’a ra munanga, " 'Ani iḏanga dadunu 'o 'ahu moju."

24 Marta ma sangoro, "Ngoi ta waro unanga ḏuanga i’a dadunu 'o 'ahu moju toma Kiamata ma Wangere, wakutu ngowa’a senge-sengene dadunu 'aḏi 'ahu moju."

25 Yesus 'o kanau i’a ra munanga, "Ngoi nena-ne dadunu to si’ahu ngowa-ngowa’a sengene, re To pula’a 'ahu ḏi’i. Kalaha ngowa-ngowa’a raḏi sengene, ananga gena-ge ga’a 'aḏi ngaku Ngoi, dadunu 'aḏi 'ahu moju. 26 Re 'a guna ḇato 'o 'ahu-'ahu ga’a 'o ngaku Ngoi, unanga kama sengene ua nena-ne re si’a. Ngana no ngaku bolo ua, 'oru ga’a Ta kanau?"

27 Marta ma sangoro, "Ya Ma Jou, ngoi to ngaku Ma Jou 'O Kristus, Ma Jou’ongu Madutu 'ai Ngowa’a Nau’u, ga’a Unanga ro sijaji di’a 'O 'utusu toma dungia nena-ne."

28 Wakutu Marta mo kanau ra Yesus togumu i’a, munanga mo ḏibo, mo 'aro’o ngo Maria re mo jujuḏu ra ngo Maria, "Guru ro sapolo, Unanga 'o sano ngana." 29 Wakutu Maria mo 'isene gena-ge, munanga jau-jau mo te’oso, re mo supu mau ma’u sanga ra Yesus. 30 Toma 'orasa gena-ge, Yesus 'o osama nyangu toma gamu Betania, Unanga toma gamu ma ḏuḏunu moju toma ngi’i ga’a ngo Marta mo ma’u sanga re mo jarita ra Unanga. 31 Wakutu ngowa-ngowa’a Yahudi ga’a sihiburu ngo Maria toma wala ma dara, 'aḏi oḏi’i ngo Maria mo supu ca-capati, ananga 'aḏi tagi tu-tuu’u ra munanga 'ami ḏuḏunu, sababu ananga 'aḏi ta’ajiri, ngo Maria mo tagi toma kubu di’a mo rerese ma gaḏi.

32 Wakutu ngo Maria mo ma’u sanga ra Yesus, munanga mo maḏipolono ra Yesus 'ai biono re mo kanau, "Ma Jou, na’o Ma Jou 'ane ḏua, tantu ḏua 'ari iḏanga, 'a Lazarus, 'o sengene ua."

33 Yesus 'ai 'akala re sinyingara 'i kangela wakutu Unanga 'o oḏi’i ngo Maria mo rerese ma gaḏi. Mada’a Unanga 'ai ruta 'i momoto sababu ngowa-ngowa’a Yahudi ga’a 'aḏi siduu’u ngo Maria, ananga mai 'aḏi rerese ma gaḏi ḏi’i. 34 Ḏua Yesus 'o sano ra ananga, "Ngini ni sigare 'ai mayeti le’a?"

Ananga ya sangoro, "Ma Jou, ino re No oḏi’i."

35 Yesus 'ai 'ongoro turono.

36 Ḏua ngowa-ngowa’a Yahudi 'aḏi kanau, "Oḏi’i Unanga 'o dadalara madutu 'a Lazarus!"

37 Mada’a mamuni’a tamanga sigolona 'age 'aḏi kanau, "Ngowa’a hafu matengo, Unanga 'o si-la. I’a sa’olo Unanga 'o si-la 'a Lazarus ua, la 'o sengene awa?"

38 Sababu gena-ge, Yesus 'ai ruta 'i momoto moju, Unanga re ananga mo-moini 'aḏi tagi toma kubu ma aḏu’u ga’a ananga 'o sigare 'a Lazarus 'ai mayeti. Kubu ma aḏu’u gena-ge sidamunu reo maḏi lamo’o.

39 Yesus 'o kanau ra ananga, "Na silage maḏi gena-ge."

Mada’a 'a Lazarus 'ai biḏanga ngo Marta mo kanau, "Ma Jou, wangere rata ḏua, unanga toma kubu ma dara, dadi ro bounu."

40 Yesus 'o kanau ra ngo Marta, "Ngoi reto kanau ra ngana, na’o no ngaku, ngana ḏuanga i’a no oḏi’i kuasa lamo’o ra Ma Jou’ongu Madutu tala."

41 Dadi ananga ya silage ma maḏi kubu ma da-damunu. Gena ḏua, Yesus 'o talaḏi ie diwanga re 'O kanau: "Murasa ma la Baba, sababu Baba rena dawongo ḏua 'Ari go-golo’o. 42 Ngoi to waro Baba na 'isene tau-taunu 'Ari go-golo’o, mada’a Ngoi to kanau so’o gena-ge nange-ne di’a ngowa-ngowa’a ga’a ananga ya oḏi’i, la 'aḏi ngaku Baba reno 'utusu Ngoi." 43 Wakutu Yesus 'o kanau so’o gena-ge togumu i’a, Unanga dadunu 'o kanau ḏi’i 'a siduga-duga: "Lazarus, no supu ino!"

44 Lazarus ga’a ro sengene, unanga 'o supu, 'ai giama re 'ai rou 'i piri’u reo ḇa’a, re 'ai biono mai rema sa-sao. Yesus 'o kanau ra ananga, "Ni woi’i 'ai rou re 'ai giama ma bi-biri’u re 'ai biono ma sa-sao, la unanga 'o tagi re oḏi’i bebasa."