1 Hei diwanga, welanga ninga ngau'u, ngoi mau to kanau,

hei tana'a, 'isene 'ari demo ga'a supu tari madanga.

2 Nyengara gari'a 'Ari do-doto'o 'i sapolo ma tero sa'olo besa'a,

'ari demo-demo 'i tege ma tero sa'olo gagini,

ma tero besa'a furai nga'unu so'a ma j̱imutu,

re ma tero nga'unu besa'a toma joro-joro*

3 Sababu Ma JOU 'ai lomanga ngoi mau ta simulia;

Puji re silamo'o Ma Jou'ongu Madutu ga'a ngene wo silamo'o re siḏubuso!

4 Ma JOU ma tero sa'olo Kie Maḏi di'a saolo ngoi, Unanga 'Ai munara 'i ti-tiai,

sababu 'Ai ga'a mo-moini 'i 'adili

Ma Jou'ongu Madutu ga'a 'Ai jaji 'i ngali ua, re soi moi nyangu Unanga 'o si'a'a jaji ma sakala,

Unanga gena-ge 'o 'adili re banari.

5 Mada'a ngini, ngowa'a Israel ni si'a'a ma kajahatana ra Unanga,

ngini ni patasa riwara sa'olo Unanga 'ai 'umata sababu ngini ninga sala gena-ge,

ngowa-ngowa'a gena-ge ga'a manga 'akala re sinyingara 'i boloto ua re 'aḏi nyanyaḏi sihaga ngowa'a.

6 I'a sa'olo Ma JOU ngini nu sibalasa so'o gena-ge!

Hei bangsa ga'a haga re ngowa'a ma pake ua

Unanga gena-ge ngini ninga ḇaḇa ga'a 'o tuhu ngini,

ga'a sidadi re site'e ngini!

7 'Elingi 'oru ri dadi toma 'orasa nga'ene moju,

totoho la-la ino nanga ju'uda-ju'uda manga musungu ma siḏa,

ngini ni sano taninga ḇaḇa, re unanga ḏuanga i'a 'o siajele ra ngini mangale 'orasa ma siḏa gena-ge,

re taninga bi-biri'i, re ananga ḏuanga i'a 'aḏi kanau ra ngini mangale 'orasa ma siḏa gena-ge.

8 Wakutu Ma Jou'ongu Madutu, Unanga gena-ge toma Gau'u ga'a 'O sibalangu tana'a toma bangsa-bangsa,

Toma 'orasa Unanga 'o siwola i'a manusia manga ngowa-ngowa'a,

dadi Unanga 'a sitatapu bangsa-bangsa manga daeraha ma ḇati mete'e Israel manga ngowa-ngowa'a ma nyo-nyoimi.*

9 Mada'a Ma JOU 'ai balangu masiretene; enanga gena-ge Unanga 'A sitantukanga ngowa-ngowa'a Israel sa'olo 'Ai ngowa-ngowa'a.

'A Yakub 'ai ju'uda; ananga gena-ge Ma JOU ya'u cumutu sa'olo 'Ai warisi.

10 Unanga 'o sanga ananga gena-ge toma 'orasa 'aḏi tagi-tagi toma daeraha baulaco,

toma daeraha kama rurubu-rurubu mai ua re karawiana 'i wusu lai te'e,

ananga Unanga ya'u saolo re ya'u palihara,

Unanga 'o jaga ananga ma tero sa'olo 'Ani la'o masiretene ma moi'i,

11 Ma JOU ma tero namo kareba 'i jaga ma ngowa toma ngi'i,

ga'a 'i lai-lairi toma re'u,

Ma JOU 'o sela 'ai kalatu'u di'a 'O cako'o 'Ai ngowa-ngowa, na'o 'i eta'a,

re Ya'u sigasa Tai kalatu'u ma re'u.

12 Pa'i Ma JOU masiretene ḇato 'O sibi-biri'i ananga,

re ngowa'a lelegu manga jou'ongu ma somoara 'i cua ga'a mamete'e ananga.

13 Ma JOU 'o si'a'a ananga 'aḏi parenta daeraha kie-kie,

ananga 'aḏi oromo manga guḏa ma hasili;

Unanga 'o si'a'a ananga 'aḏi ka'e madu ga'a 'aḏi 'oro toma sau maḏi ma sigolona,

re goroho zaitun ga'a ma lese 'i konyo toma kie ma maḏi,

14 Ananga Ma JOU ya'u pula'a sapi ma susu ma rousu re 'abingi re doba ma susu,

re doba ma ngowa-ngowa ma gaji;

re doba ma nau'u, sapi re sapi ma nau'u toma Basan ino re 'abingi-'abingi ma nau'u.

re ngini sanga gandum lai la-la;

re ni ka'e ḏi'i 'anggur ma ḇanyo ma la-la.

15 Ḏua * Ma JOU 'ai 'umata 'aḏi dadi ngowa'a rema-enanga mada'a ananga ḏi'i 'aḏi dadi ngowa'a ma lawana Unanga gena-ge,

ananga manga lese 'i dadi lamo'o, ḇululu re 'aḏi basono ḏugala taunu;

re ananga 'aḏi sisoi'i tala Ma Jou'ongu Madutu ga'a ro sidadi ananga,

ananga 'aḏi sipa-pake ua Ma Jou'ongu Madutu ga'a ma tero sa'olo Kie Maḏi ga'a 'i saolo ananga, Unanga gena-ge ga'a 'O sisalamata ananga.

16 'Ai 'umata 'aḏi si'a'a Ma JOU 'o sijumu 'Ai duruta sababu 'aḏi silamo'o re siḏubuso bangsa lelegu manga jou'ongu ma somoara,

ananga 'aḏi si'a'a Unanga 'o dadi ruta madutu, sababu manga jou'ongu ma somoara ga'a Unanga 'a emo-emono,

17 ananga 'aḏi sitola'a haiwani sa'olo manga jou-jou mada'a 'aḏi sidoa'a ua ra Ma Jou'ongu Madutu. Siḏibo ḏi'i ananga ya sidoa'a toma ngowa'a Kanaan manga jou'ongu ma somoara.

2 Jou'ongu ma somoara gena-ge ga'a 'aḏi nana'o ua,

jou'ongu ma somoara ma su-sungi ga'a ananga aro ya waro,

ga'a ma siḏa ninga ete re dotumu ya silamo'o re mojongo ua.

18 Ma Jou'ongu Madutu ma tero sa'olo Kie maḏi ga'a 'o sidadi ananga ma tero sa'olo manga ḇaḇa, mada'a ananga 'aḏi sidaioranga Unanga.

re ananga raḏi sisoi'i tala Ma Jou'ongu Madutu ga'a 'O si'ahu ananga ma tero sa'olo manga ngina.

19 Wakutu Ma JOU 'o oḏi'i ananga raḏi sisoi'i tala Unanga, dadi Unanga 'o si'aro'o riwara ananga gena-ge sa'olo 'Ai 'umata,

sababu kalaha ananga gena-ge 'Ai ngowa-ngowa'a nau'u re ngowa-ngowa'a were'a, ananga gena-ge raḏi si'a'a Unanga 'o ruta madutu.

20 Re Ma JOU 'o kanau so'o ne: <Ngoi to sigogono 'Ari biono re to palihara ananga riwara,

re mau Ta oḏi'i manga 'ahu ma ḏo-ḏogumu,

sababu ananga gena-ge nani ga'a manga 'akala re sinyingara 'i boloto ua

ananga ma tero sa'olo ngowa-ngowa'a ga'a mete'e Ngoi ua.

21 Ananga 'aḏi si'a'a Ngoi to sijumu 'Ari duruta ra ananga sababu ananga 'aḏi silamo'o re siḏubuso ngowa'a Kanaan manga jou'ongu ma somoara;

ananga 'aḏi si'a'a Ngoi to dadi ruta madutu sababu 'aḏi silamo'o re siḏubuso manga jou'ongu ma somoara ma dulada.

Sababu gena-ge, Ngoi ḏuanga i'a ta si'a'a ananga manga 'akala re sinyingara 'i hamu toma bangsa lelegu

re ḏi'i Ngoi ḏuanga i'a to si'a'a ananga manga 'akala re sinyingara 'i ruta toma bangsa ga'a haga.

22 Sababu 'Ari ruta 'i 'uci ma tero sa'olo u'u ma lejanga,

re 'i leja-lejanga singadolo toma ngowa'a senge-sengene manga ngi'i toma 'aḏu ma dutu;

u'u gena-ge 'i siro'u tana'a re ma hasili mo-moini,

re 'i siro'u singadolo kie-kie ma ba-bangini.

23 Ngoi ḏuanga i'a To singa'unu bahala tau-taunu ra ananga,

'Ari bahala gena-ge ma tero sa'olo coimi ma doto ga'a enanga mo-moini Ta sicoimi ra ananga.

24 Ananga ḏuanga i'a 'aḏi sengene sababu sawini re sa-sau'u madutu,

re si-siḏi ma jira,

Ngoi ḏuanga i'a to siḏingoto haiwani nga-ngabala ra ananga

re ḏi'i cuku'u ma racimi di'a sisengene ananga.

25 Ngowa'a Israel manga lawana 'aḏi sisengene ananga gena-ge reo samaranga toma wala ma ḏuḏunu,

re ngowa'a toma wala ma dara, ananga 'aḏi basono mojongo lai siḏi singadolo 'aḏi sengene,

tubaie re mosolese, ngowa kiau re ngowa'a ga'a manga utu ri buḏo, ananga mo-moini 'aḏi sengene.

26 Ngoi, Ma JOU nyengara 'o kanau so'o ne: <<Ngoi ḏuanga i'a Ta'u singi-ngiranga ananga,

singadolo matengo i'a mai ua 'o 'elingi ananga moju,>>

27 mada'a To kanau ua so'o gena sababu Ngoi to mau ua sipula'a donga di'a ngowa'a Israel manga lawana 'aḏi sije-jengere Ngoi,

awa-awa manga lawana 'aḏi sahe ma rapu,

awa-awa ananga 'aḏi kanau so'o ne: <<Minga giama ga'a 'i sita'aloko ananga,

Ma JOU ga'a 'O si'a'a ua mo-moini nena-ne.>> >

28 'A Musa 'o kanau moju rema betongo so'o ne: <<Sababu bangsa Israel gena-ge bangsa rimoi ga'a kama 'akala soro'unu ua,

re manga wo-waro lai ngido ua.

29 Sababu na'o ananga ngowa'a 'akala soro'unu, tantu ḇato ananga 'aḏi sahe hali nena-ne,

re ananga ya fikiri tala 'oru manga 'ahu ma ḏo-ḏogumu toma biono i'a!

30 Sanga ua sordado lawana matengo i'a 'o kunu'i sordado Israel nga cala moi,

re sanga ua ḏi'i sordado lawana ngamu ḏiḏi 'aḏi si'a'a sordado Israel nga cala nyagi moi 'aḏi wiḏi,

gena-ge pa'i nyengara 'i dadi ḇato sababu Ma JOU ga'a 'O saolo sordado Israel ma tero sa'olo manga Kie Maḏi, Unanga gena-ge Ro sieanga i'a ananga ḏua

re Ma JOU ro sipula'a sordado Israel gena-ge tamanga lawana.

31 Sababu ananga manga jou'ongu ma somoara manga kie maḏi 'i te'e ma tero ua nanga Kie Maḏi; gena-ge Ma JOU ga'a ngene wo silamo'o re siḏubuso.

re ḏi'i ngowa'a Israel manga lawana masiretene mai 'aḏi 'akoru!

32 Mode-mode'e, ananga manga lawana ma tero sa'olo ate 'anggur ma 'asala toma Sodom,✝

re toma Gomora ma guḏa-guḏa;

ananga manga ga'a ma tero sa'olo ate 'anggur ma sowo'o ga'a rema racimi,

re ma 'anggur ma 'oki ga'a mamaḏi;

33 ananga manga 'anggur ma ḇanyo ma tero sa'olo cuku'u ma racimi,

re ḏi'i cuku'u tedungu ma racimi ga'a 'i sisengene ngowa'a caiti.

34 Ma JOU 'o kanau so'o ne: <<'Ari rancana di'a ngowa'a Israel re manga lawana, enanga gena-ge 'i gogono mode-mode'e ra Ngoi,

re Ta sidaioranga yoḏu'u sababu Ta jaga la-la ma tero sa'olo 'Ari harata!

35 Ananga, Ngoi ḏuanga i'a Ta'u balasa Rari 'akala re sinyingara ma gugutu re Ngoi ḏuanga i'a To sihukumu ananga.

kage-kage ananga manga rou 'i tila,

sababu 'orasa bahala 'i ganapu cori,

'oru ga'a sidodahe di'a ananga, enanga ḏuanga i'a 'i sapolo caiti.

36 Sababu Ma JOU ḏuanga i'a 'O kanau 'Ai 'umata manga sala 'i cua

re sijumu 'Ai dadalara Tai falalomu-falalomu, gena-ge ngowa'a Israel;

toma 'orasa Unanga 'o oḏi'i ananga gena-ge raḏi te'e riwara,

re ngowa'a Israel raḏi cua: bae budaka bae budaka ua.*

37 Dadi Unanga ḏuanga i'a 'o kanau so'o ne: <Ananga manga jou'ongu ma somoara ri cua!

Enanga gena-ge ma tero sa'olo kie maḏi ga'a ananga 'aḏi ta'ajiri enanga gena-ge ya'u saolo.

38 jou'ongu ma somoara gena-ge ga'a 'i oromo ananga manga jou-jou tola'a ma gaji,

ga'a 'i ka'e ananga manga jou-jou 'anggur ma ḇanyo.

Sieanga i'a enanga 'i sapolo riono ngini;

sieanga i'a enanga 'i saolo ngini!

39 << <Nange-ne ngini ni oḏi'i, mangale Ngoi, Ngoi nena-ne Unanga.

Pa'i Ngoi ḇato Ma Jou'ongu Madutu; ma lelegu cua.

Ngoi nena-ne ga'a To sisengene re si'ahu ngowa'a,

Ngoi reta sinyaboto re si-la ngowa'a,

re matengo i'a mai ua ga'a 'o bebasa Tari kuasa.

40 Ngoi To tede 'Ari giama sie,

re Ngoi to 'a'a jaji rema sasi sa'olo Ngoi ga'a To 'ahu kasingado-ngadolo i'a:

41 Ngoi ḏuanga i'a to joma'a 'Ari samaranga singadolo ja-jamanga re mangono,

re To ḏu-ḏuanga ḏua di'a sihukumu ananga,

Ngoi ḏuanga i'a to sibalasa 'Ari lawana rari 'akala re sinyingara ma gugutu,

re To sihukumu ngowa'a ga'a 'aḏi emono Ngoi.

42 'Ari lawana manga ngaunu ma repe ḏuanga i'a 'i tege tari coimi ma doto'o,

re 'Ari samaranga ḏuanga i'a si'oto ngowa'a mo-moini:

bae ngowa-ngowa'a ga'a sanga nyaboto bolo ngowa-ngowa'a ga'a sanga dawana,

re ḏi'i lawa-lawana ma sordado manga sae'e ga'a manga utu kiḏanga.>*

43 Hei bangsa mo-moini, ngini balasu ni maulili mamete'e Ma JOU 'ai 'umata,

sababu Ma JOU 'o sihukumu ananga ga'a raḏi sisengene 'Ai 'umata ,

Unanga 'a sibalasa Rai 'akala re sinyingara ma gugutu Tai lawa-lawana,

re 'Ai 'umata manga tana'a, Unanga 'a sigofi ra ananga manga ḏosa.>>

44 Ḏua Musa 'o sapolo mamete'e rea Yosua, unanga gena-ge 'a Nun 'ai ngowa'a nau'u, re 'a Musa 'o singadolo nyanyi nange-ge enanga ma demo-demo mo-moini toma bangsa Israel.

45 'A Musa 'o kanau toma ngowa'a Israel mo-moini togumu i'a, 46 unanga 'o kanau ra ananga rema betongo so'o ne: <<Totoho la-la 'ari demo-demo ga'a ta singadolo ra ngini toma wangere nange-ne, la ngini nyengara ni singadolo taninga ngowa-ngowa'a di'a siḏagi tau-taunu Ma JOU 'ai hukumu gena-ge mo-moini. 47 Sababu Ma JOU 'ai hukumu ma demo-demo gena-ge ma faeda ua. Siḏibo ḏi'i, demo gena-ge nyengara 'i sipula'a 'ahu. Sababu na'o ngini ni siḏagi hukumu gena-ge, ngini ninga 'umuru ḏuanga i'a 'i dadi kiḏanga toma tana'a toma Ḇanyo Yordan ma kaci moi ga'a ti'ara riwara ngini na iwanga di'a na ḏegoro.>>

48 Toma wangere gena-ge, Ma JOU 'o kanau ra Musa rema betongo so'o ne: 49 <<No tagi toma kie-kie Abarim, toma tana'a Moab, da'a limau Yerikho kaci moi. Pere sie toma kie Nebo re no oḏi'i tana'a Kanaan ga'a ti'ara riwara Ngoi ḏuanga i'a to pula'a toma ngowa'a Israel di'a manga warisi. 50 Re ngana ḏuanga i'a no sengene toma kie gena-ge ma tubu, ga'a ḏuanga i'a no pere gena-ge, la ngana no silomu tani ngimo-ngimono, ma tero 'a Harun, 'ani ioro, ga'a ro sengene toma kie Hor re silomu taninga ngimo-ngimono ḏi'i.* 51 sababu ngini ngamu ḏiḏi reni mete'e ua Ngoi 'ari demo toma ngowa'a Israel manga sigolona, co-cori toma ḇanyo Meriba ma waloro toma limau Kadesh toma daeraha baulaco Zin. Rema duhu gena-ge kalaha Ngoi nena-ne Ma Jou'ongu Madutu, ngini ngamu ḏiḏi reni silamo'o Ngoi ua toma ngowa'a Israel ma sigolona. * 52 Sababu gena-ge, ngana nyengara pa'i na oḏi'i daeraha gena-ge ḇato ma giḏanga. Mada'a no osama i'a yoḏu'u toma daeraha ga'a Ngoi ḏuanga i'a to pula'a di'a ngowa'a Israel.>>