1 'A Musa 'o kanau moju <<Na'o ngini ni mete'e tau-taunu Ma JOU 'ai iḏingi, Unanga gena-ge Ma Jou'ongu Madutu ga'a ngini ni silamo'o re siḏubuso, re ni siḏagi mode-mode'e 'Ai parenta mo-moini ngoi, Musa ta singadolo ra ngini toma wangere nange-ne, Ma JOU, Unanga gena-ge Ma Jou'ongu Madutu ga'a ngini silamo'o re siḏubuso, Unanga ḏuanga i'a 'O sitede ngini sie toma bangsa mo-moini toma dungia nena-ne. 2 Na'o ngini mode-mode'e ni mete'e Ma JOU 'ai iḏingi, Unanga gena-ge Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O pula'a barakati mo-moini nena-ne ra ngini re barakati mo-moini nena-ne ngini na sanga tau-taunu: 3 Ma JOU ḏuanga i'a 'O sibarakati ngini ninga munara: bae toma limau bolo guḏa. 4 Ma JOU ḏuanga i'a 'O sibarakati ngini singadolo ninga ju'uda ma hasili ma dogo-dogo, ninga tana'a ma hasili ma dogo-dogo re ninga haiwani piara ma dogo-dogo: bae ninga sapi ma ngowa bolo ninga 'abingi re doba ma ngowa. 5 Ma JOU ḏuanga i'a 'O sibarakati ngini singadolo ninga karajanga ma dara 'i siromanga reo gandum re ninga ngo-ngoromo ma repe. 6 Ma JOU ḏuanga i'a 'O sibarakati ninga munara mo-moini: bae taninga wala ma dara bolo taninga munara ma ngi'i.

7 Ma JOU 'o si'a'a ngini ni sita'aloko ninga lawana ga'a 'aḏi parangi ngini. Ananga gena-ge 'aḏi marimoi na'o 'aḏi parangi ngini, mada'a ḏuanga i'a ananga matai wiḏi taninga biono. 8 Ma JOU ḏuanga i'a 'o siromanga ninga titila ma dara reo gandum re Unanga 'o sibarakati ninga munara mo-moini ma hasili. Unanga ḏuanga i'a 'O sibarakati ngini toma daeraha ga'a Ma JOU ḏuanga i'a 'A sipula'a ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso. 9 Na'o ngini ni siḏagi Ma JOU 'ai parenta, Unanga gena-ge Ma Jou'ongu Madutu ga'a ngini ni silamo'o re siḏubuso, re ninga 'ahu ma ngo'omo 'i mete'e Unanga 'ai huku-hukumu, Ma JOU ḏuanga i'a 'O sitatapu ngini ga'a Unanga 'o siwola i'a di'a 'Ai 'umata masiretene, ma tero sa'olo Unanga Ro 'a'a jaji rema sasi ra ngini. 10 Dadi bangsa mo-moini toma dungia 'aḏi oḏi'i mangale ngini Ma JOU 'ai 'umata masiretene, re ananga ḏuanga i'a 'aḏi mojongo ngini. 11 Ma JOU ḏi'i ḏuanga i'a 'O sibarakati madutu ninga 'ahu singadolo ninga ju'uda ma dogo-dogo, ninga haiwani piara ma ngowa ma dogo-dogo re ngini ninga tana'a ma hasili ma dogo-dogo. Ma JOU ḏuanga i'a 'O si'a'a gena-ge toma daeraha Unanga ro 'a'a jaji rema sasi taninga ngimo-ngimono di'a 'A sipula'a ra ngini. 12 Ma JOU ḏuanga i'a 'O siwelanga ḇanyo ma ngi'i toma diwanga ga'a Unanga 'A sigogono besa'a di'a sioḇoso ninga tana'a wakutu ma 'orasa 'i ngadolo. Re ḏi'i Unanga 'o sibarakati ninga munara mo-moini, singadolo ngini ḏuanga i'a ni sibau toma bangsa-bangsa lai repe, mada'a ngini masiretene ḏuanga i'a ni mabau ua. 13 Re Ma JOU ḏuanga i'a 'O 'a'a ngini ni dadi sae'e, mada'a ma di'imi ua singadolo bangsa-bangsa 'aḏi parenta ngini ua mada'a ngini ni parenta ananga gena-ge. Ngini ḏuanga i'a ganapu ni pere re ni 'uci ua singadolo ngini ninga 'ahu ganapu dogo rousu re kama kuranga ua. Gena-ge 'i dadi, na'o ngini ni mete'e Ma JOU 'ai parenta mo-moini, Unanga gena-ge Ma Jou'ongu Madutu ga'a ngini ni silamo'o re siḏubuso, re ngini ni siḏagi mode-mode'e 'Ai parenta gena-ge ngoi, Musa ta singadolo ra ngini wangere nange-ne, 14 re ḏi'i na'o ngini ni siḏagi kama rapu ua Ma JOU 'ai parenta gena-ge rimoi i'a ngoi Musa ta singadolo ra ngini wangere nange-ne re awa ngini ni silamo'o re siḏubuso jou'ongu ma somoara re ni siḏagi enanga ma mau.

15 <<Mada'a na'o ngini ni mete'e ua Ma JOU 'ai iḏingi, Unanga gena-ge Ma Jou'ongu Madutu ga'a ngini ni silamo'o re siḏubuso, re ni siḏagi mode-mode'e ua 'Ai parenta re Ai 'atoranga, ngoi Musa ta singadolo ra ngini toma wangere nange-ne, ḏua hukumana mo-moini nena-ne Unanga ḏuanga i'a 'o sipula'a ra ngini re enanga gena-ge ngini na sanga tau-taunu: 16 Ma JOU ḏuanga i'a 'O sihukumu ninga munara: bae toma limau bolo taninga guḏa. 17 Ma JOU ḏuanga i'a 'O sihukumu ngini singadolo ninga gandum ma hasili pa'i ceka'a ua ḇato dadi ninga ngo-ngoromo 'i ngadolo ua. 18 Ma JOU ḏuanga i'a 'O sihukumu ngini singadolo sanga ngowa'a repe ua, tana'a ma hasili pa'i ceka'a ua ḇato, re ninga sapi, 'abingi re doba sanga ngowa repe ua. 19 Ma JOU ḏuanga i'a 'O sihukumu ngini singadolo ngini ninga munara mo-moini ma hasili pa'i ceka'a ua ḇato: bae taninga wala ma dara bolo taninga munara ma ngi'i.

20 <<Na'o ngini ni 'a'a kajahatana sababu ngini reni sisoi'i tala Ngoi, Ma JOU, 'oru ḇato ngini ni sitai'i 'a'a, Unanga gena-ge masiretene 'O sidingoto bodito ra ngini re 'O siruwahe ngini toma parangi ma dara. Ngini pa'i sanga sangisara ḇato taninga lawana singadolo ngini ni iranga caiti re ni moini. 21 Ma JOU ḏuanga i'a 'O singa'unu si-siḏi ma jira ra ngini mo-moini singadolo ngini ni iranga ḏua taninga tana'a ga'a ngini ni osama re ḏegoro. 22 Ma JOU ḏuanga i'a 'O singa'unu ngini reo si-siḏi ga'a 'i si-la yoḏu'u, gagama lai siḏi re robo-roboso. Unanga 'o 'a'a karawiana sau'u 'i wusu singadolo joro-joro 'i wa'alo re 'i dadi cira; enanga mo-moini gena-ge ngini na sanga singadolo ngini ni iranga. 23 Re diwanga taninga re'u 'i dadi te'e ma tero sa'olo tamḇaga singadolo besa'a kama sapolo ua kara ninga tana'a toma 'aḏu 'i dadi lai dudungu singadolo 'i dadi te'e ma tero sa'olo ḇesi. 24 Ma JOU 'o sisapolo besa'a ua mada'a korou'u re dongi tamanga daeraha; mo-moini gena-ge 'i sapolo da'u diwanga tala ra ngini ninga re'u, singadolo ngini ni iranga.

25 Ma JOU 'o sieanga i'a ngini singadolo ninga lawana 'aḏi sita'aloko ngini. Ngini marimoi ni supu tagi parangi ananga, mada'a ngini ḏuanga i'a ni wiḏi matai are taninga lawana manga biono, singadolo wakutu bangsa-bangsa 'aḏi 'oḏi'i 'oru ga'a 'i dadi ra ngini sababu Ma JOU, ananga gena-ge 'aḏi dadi sawana madutu. 26 Re ninga mayeti ḏuanga i'a 'i dadi ma ngo-ngoromo di'a namo diwanga mo-moini re haiwani nga-ngabala toma tana'a, re matengo ua nga'unu 'a kadusana. 27 Ma JOU ḏuanga i'a 'o singa'unu ngini reo si-siḏi bu'u ma tero toma Mesir,✝ reo gigianga re kaḏuḏi re ninga eno'o 'i la'oro, mo-moini gena-ge ngini na si-la yoḏu'u. 28 Ma JOU ḏuanga i'a 'o si'a'a ngini ni dadi pona, la'o hafu, re ni waro ninga gogare riwara 29 singadolo toma 'orasa wangere 'olana, ngini ni tagi ma paha-paha di'a disa ma ngo'omo ma tero sa'olo ngowa'a hafu ga'a 'orasa wangere 'olona ma tero 'orasa lobi'i. Ngini ninga munara ma 'utungu cua, mada'a pa'i ngini pa'i sanga sito'u-to'u ḇato re ngini ngowa'a nu'u ra-rabasa tau-taunu, mada'a matengo i'a mai ua sapolo di'a riono ngini. 30 Ngini ḏuanga i'a reninga ga-ganau reo mosolese matengo, mada'a ngowa'a lelegu mi sipakisa ni dongotu. Ngini ḏuanga i'a ni side'oso wala, mada'a na ḏegoro ua. Ngini ḏuanga i'a ni 'a'a guḏa 'anggur, mada'a na sanga ma hasili ua. 31 Ninga sapi ngowa'a ḏuanga i'a ya tola'a taninga biono, mada'a ngini na oromo ma la-la'eme ua. Ninga keledai ngowa'a ḏuanga i'a ya rabasa taninga biono, re ya siḏibo riwara ra ngini. Ninga 'abingi re doba ngowa'a ḏuanga i'a ya sipula'a taninga lawana mada'a matengo i'a mai ua sapolo di'a riono ngini. 32 Ninga ngowa'a nau'u re ninga ngowa'a were'a, ananga ḏuanga i'a sipula'a toma bangsa lelegu taninga biono di'a 'aḏi dadi manga budaka. Wangere jelele i'a, ngini ni 'elingi lai siḏi ananga 'aḏi maḏibo, mada'a ngini ni 'a'a 'ori i'a yoḏu'u di'a siḏibo ananga. 33 Bangsa rimoi ga'a ngini na nana'o ua, ananga ḏuanga i'a ya oromo ninga tana'a ma hasili re ninga munara ma hasili mo-moini. Ananga 'aḏi nu'u sikangela ngini re 'aḏi sito-to'u ngini tau-taunu. 34 Ngini ḏuanga i'a ni dadi pona sababu ngini ni oḏi'i mo-moini gena-ge reninga la'o. 35 Ma JOU ḏuanga i'a 'o singa'unu ngini reo bu'u-bu'u ma jira taninga bolono re busu'u, re ḏi'i taninga rou ma sata singadolo toma sae'e mada'a bu'u-bu'u gena-ge ngini na si-la yoḏu'u.

36 Ngini rema 'olana matengo ga'a ngini ni cumutu ḏua, Ma JOU ḏuanga i'a Nu sigasa toma bangsa ga'a ngini ninga ngimo-ngimono 'aḏi nana'o ua. Toma ngi'i gena-ge, jou'ongu ma somoara ga'a 'i si'a'a re'o ate re maḏi, ngini ḏuanga i'a na siḏagi enanga ma mau. 37 Toma daeraha Ma JOU ga'a 'A sigasa ngini, ngowa'a 'age ananga gena-ge ḏuanga i'a 'aḏi dadi sawana madutu wakutu ananga 'aḏi 'oḏi'i 'oru ga'a 'i dadi ra ngini sababu Ma JOU. Toma ngi'i le'a ḇato ga'a ngini ni tegoro, ngini ḏuanga i'a ni dadi ma tero sa'olo do-doto'o rimoi, re ngini ngowa'a nu'u nye-nyelo'o. 38 Gisisi ma repe ga'a ngini na so'ana toma guḏa, mada'a ma hasili ngini sanga pa'i ceka'a ua ḇato, sababu sasaba ḏuanga i'a ya oromo. 39 Ngini 'a'a ninga guḏa-guḏa 'anggur re na jaga la-la, mada'a ngini na malomu ua 'anggur bolo ni ka'e ua 'anggur ma ḇanyo, sababu gararama ya oromo. 40 Taninga daeraha mo-moini, ḏuanga i'a 'age ngini ninga zaitun ma lese-lese, mada'a ngini ni masi'ese ua reo zaitun ma goroho; sababu ma sowo'o ḏuanga i'a 'i turono wakutu 'i la'ere nyangu. 41 Ngini ḏuanga i'a ni sanga ngowa'a nau'u re ngowa'a were'a, mada'a ananga 'aḏi iranga ra ngini, sababu ananga gena-ge 'aḏi sanga dawana di'a ninga lawana. 42 Ninga ate-ate ma sowo'o re ninga tana'a ma hasili mo-moini ḏuanga i'a 'o sasaba ya oromo. 43 Ngowa'a tagi-tagi ino taninga sigolona ananga gena-ge ganapu dadi ngowa'a rema-enanga re 'aḏi lebe kuasa ra ngini, mada'a ngini ganapu ni dadi ngowa'a ma dinga'unu ua re ni dadi kuranga kuasa ra ananga. 44 Ngowa'a tagi-tagi ino gena-ge ḏuanga i'a 'aḏi sibau ra ngini, mada'a ngini ni sibau ua ra ananga. Dadi, ananga gena-ge ḏuanga i'a 'aḏi parenta ngini re ngini ni ta'aloko ra ananga. Gena-ge ma tero sa'olo ananga gena-ge ḏuanga i'a 'aḏi dadi ninga sae'e re ngini ni dadi manga di'imi.

45 Hukumana gena-ge mo-moini ḏuanga i'a 'i sapolo ra ngini, 'i kunu'i ngini re 'i nga'unu ngini ma tero sa'olo haiwani nga-ngabala 'i simoini ngini. Gena-ge 'i dadi sababu ngini ni 'isene ua Ma JOU 'ai 'Idini, Unanga gena-ge Ma Jou'ongu Madutu ga'a ngini ni silamo'o re siḏubuso re ngini na mete'e ua 'Ai parenta re 'atoranga ga'a Unanga gena-ge 'A pula'a ra ngini. 46 Mo-moini gena-ge 'i dadi nana'o re didina'o heranga re ga'a 'i hera-heranga taninga sigolona mangale Ma JOU 'o sihukumu ngini re ninga ju'uda di'a kasingado-ngadolo i'a.>>

47 <<Kalaha Ma JOU ro sibarakati ngini singadolo ngini sanga pai-pai'i toma 'oru ḇato, ngini ni oḏu'u siḏagi Ma JOU 'ai mau reninga roanga re 'akala re sinyingara ma sanangi, Unanga gena-ge Ma Jou'ongu Madutu ga'a ngini ni silamo'o re siḏubuso. 48 Sababu gena-ge, Ma JOU ḏuanga i'a 'o soma'a lawana di'a 'aḏi parangi singadolo 'utungu ra ngini. Dadi ngini ḏuanga i'a ni de-de'oso lawana sa'olo manga budaka. Ḏua ngini ḏuanga i'a 'aḏi dadi sawini, ninga camala dudungu re ni wa-watolo. Re ḏi'i Ma JOU 'o sieanga i'a ananga 'aḏi sito-to'u lai siḏi ngini ma tero sa'olo pasangana ḇesi taninga totolo singadolo ngini ni iranga. 49 Ma JOU ḏuanga i'a 'o sisapolo bangsa rimoi toma giḏanga ra ngini, toma dungia ma bati, ma tero sa'olo namo kareba 'i tumunu da'u tala mau 'apoto. Re bangsa rimoi gena-ge manga demo ngini na sahe ua. 50 Bangsa ga'a manga biono lai seramu, ananga 'aḏi silamo'o ua ngowa'a bi-biri'i re 'aḏi sijumu ua mura re dadalara toma ngowa 'olo. 51 Ananga ḏuanga i'a 'aḏi simoini ninga haiwani ma ngowa re ninga tana'a ma hasili, singadolo ngini ni iranga. Ananga 'aḏi sisoi'i tala 'ori i'a ceka'a i'a mai ua ra ngini: gandum, re 'anggur ma ḇanyo bolo zaitun ma goroho, bolo sapi piara ma ngowa, bolo ninga doba re 'abingi ma ngowa taninga duo-duo, singadolo ngini ni iranga.

52 <<Ananga gena-ge ḏuanga i'a 'aḏi sigoloḏi ninga limau mo-moini re ni wiḏi yoḏu'u, singadolo ninga limau ma gegelo ma te'e re ma kau'u ga'a ngini na sigare ninga ngo-ngaku di'a saolo ngini, enanga gena-ge ninga lawana ḏuanga ya ruba toma daeraha mo-moini ga'a Ma JOU ra pula'a ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso. 53 Ma di'ara ḏua, toma 'orasa ananga 'aḏi sigoloḏi ninga limau-limau singadolo ngini ḏuanga i'a ninga ngo-nganono 'i iranga sababu ngini sanga susa re sangisara lai tubuso ga'a ninga lawana gena-ge 'aḏi 'a'a ra ngini, ngini ḏuanga i'a ni oromo ninga ngowa-ngowa'a madutu: gena-ge ninga ngowa'a nau'u re ninga ngowa'a were'a manga la-la'eme, ananga gena-ge ga'a Ma JOU ro pula'a ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso. 54 Re ngowa'a na-nau'u ga'a manga 'akala re sinyingara ma mereoso re 'ai tabeata la-la taninga sigolona, unanga gena-ge ḏuanga i'a 'o dadi ruta singadolo 'o pula'a ngo-ngoromo ua tai ioro bolo ma nongoḏu bolo tai were'a ga'a mi dadalara bolo tai ngowa-ngowa'a ga'a 'ahu moju, 55 singadolo matengo i'a mai ua ga'a 'age tamanga sigolona, ngowa'a na-nau'u gena-ge ya'u pula'a ceka'a i'a mai ua ma ngowa'a manga la-la'eme ga'a unanga masiretene ya oromo, sababu ngo-ngoromo ma jingianga ri cua. Gena-ge 'i dadi toma 'orasa ananga 'aḏi sigoloḏi ninga limau-limau, ngini ḏuanga i'a ninga ngo-nganono ceka'a i'a mai ua sababu ngini sanga susa re sangisara lai tubuso ga'a ninga lawana gena-ge 'aḏi 'a'a ra ngini. 56 So'o gena-ge ḏi'i, ngowa'a were'a ga'a 'ami 'akala re sinyingara ma mereoso re 'ami tabeata ma la-la taninga sigolona, ga'a 'ami rou ma sata soi moi i'a mai nyangu 'i eanga tami tarupa, ḏuanga i'a munanga mo dadi ruta singadolo pula'a ngo-ngoromo ua tami nau'u mu dadalara bolo tami ngowa'a nau'u bolo ngowa'a were'a. 57 Munanga gena-ge mo oḏu'u sibalangu dodome'e ga'a supu toma ngowa'a ma ngi'i bolo ngowa'a kiau ga'a aro siḏe-ḏegoro i'a sababu munanga kami ngo-ngoromo ua. Dadi munanga ḏuanga i'a mi oromo ngowa'a kiau bolo dodome'e sigo-gogono. Gena-ge 'i dadi toma 'orasa ninga lawana 'aḏi sigoloḏi ninga limau-limau, ngini ḏuanga i'a ninga ngo-nganono ceka'a i'a mai ua sababu ngini sanga susa re sangisara lai tubuso ga'a ananga gena-ge ya 'a'a ra ngini.

58 'A Musa 'o kanau moju toma ngowa-ngowa'a Israel rema betongo so'o ne: <<Na'o ngini ni siḏagi mode-mode'e ua Ma JOU 'ai hukumu ga'a 'i silefo toma boku nena-ne, re ngini ni silamo'o re mojongo lomanga ua ga'a mulia re ma pari cua nena-ne, gena-ge Ma JOU, Ma Jou'ongu Madutu ga'a ngini ni silamo'o re siḏubuso, 59 ḏua Ma JOU ḏuanga i'a 'O singe-ngeta'a hukumana hera-heranga ra ngini re ninga ju'uda so'o ne: bahala ga'a lai tubuso re lai ti'ara re si-siḏi—si-siḏi ma jira re lai ti'ara. 60 Ma JOU ḏi'i 'o singa'unu si-siḏi mo-moini ga'a 'i dadi toma Mesir 'au nga'ene ra ngini ga'a ngini na mojongo lai siḏi singadolo na'o ngowa'a sanga si-siḏi gena-ge, matengo i'a mai ua ya'u si-la. 61 Re ḏi'i si-siḏi ma rupa ma repe re hukumana ga'a 'i silefo ua toma hukumu ma boku nena-ne, Ma JOU ḏuanga ia 'A singa'unu ra ngini singadolo ngini ni iranga. 62 Ma siḏa ngini lani repe ma tero mumuḏungu toma diwanga, mada'a toma 'orasa gena-ge pa'i ngini gena-ge mamuni'a ḇato ḏuanga i'a 'ahu moju, sababu ngini ni 'isene ua Ma JOU 'ai 'Idini, Unanga gena-ge Ma Jou'ongu Madutu ga'a ngini ni silamo'o re siḏubuso. 63 Ma JOU 'o sanangi madutu ra ngini singadolo Unanga 'o 'a'a la-la ra ngini re 'o si'a'a ngini ni dadi repe. So'o gena-ge ḏi'i Ma JOU 'o sanangi madutu di'a 'O siiranga ngini toma tana'a, ga'a ngini na osama di'a ḏegoro ma tero sa'olo ngowa'a guḏa 'aḏi wuru'u rurubu toma tana'a.

64 <<Ḏua Ma JOU ḏuanga i'a 'O siare ngini toma bangsa mo-moini toma dungia sitabi donga. Toma ngi'i gena-ge ngini ḏuanga i'a ni siḏagi jou'ongu ma somoara ma mau ga'a ngini bolo ninga ngimo-ngimono ḏi'i 'aḏi nana'o ua re enanga gena-ge 'i si'a'a toma ate re maḏi. 65 Ngini ninga 'akala re sinyingara 'i ogoro ua toma bangsa-bangsa gena-ge ma sigolona re ni sanga ua ngi'i ga'a na tegoro tatapu. Re Ma JOU ḏuanga i'a 'o si'a'a ngini ninga 'akala re sinyingara 'i mojongo, ninga ngo-nganono 'i iranga re ngini ninga 'akala re sinyingara ma dara 'i rapo'o. 66 'Orasa toma biono, ninga 'ahu 'i tatapu ua, lobi'i re wangere ngini ni basono sawana re ni dodato mangale ninga 'ahu. 67 Toma 'orasa ma daini i'a ngini ḏuanga i'a ni kanau so'o ne: <Jobilaha nena-ne lobi'i ḇato!> re toma 'orasa lobi'i ngini ḏuanga i'a ni kanau so'o ne: <Jobilaha nena-ne wangere ḇato!> sababu ninga 'akala re sinyingara 'i basono sawana, sababu Ma JOU 'ai hukumana gena-ge ga'a ngini ni oḏi'i. 68 Kalaha Ma JOU ro siajele mangale ngini Unanga nu siḏibo riwara toma Mesir,✝ Unanga ḏuanga i'a 'o gasa ngini toma Mesir reo kapala ga'a 'i pake sidete. Toma ngi'i gena-ge, ngini ḏuanga i'a ni tai'i mawu'unu ninga diri taninga lawana sa'olo budaka na-nau'u bolo we-were'a, mada'a matengo i'a mai ua mau tibo ngini.>>