1 'A Musa 'o kanau moju toma ngowa-ngowa'a Israel rema betongo so'o ne: <<Na'o ni oḏi'i ngowa'a Israel matengo i'a taninga bangsa rimoi, unanga gena-ge 'ai sapi ma nau'u bolo doba ga'a 'i iranga, awa ni masa-sakala na waro ua, mada'a balasu ni gasa haiwani gena-ge toma enanga ma dutu. 2 Na'o haiwani gena-ge ma dutu 'ai wala 'i kiḏanga ra ngini, bolo ngini ni waro ua ma dutu 'a guna, ngini ni gasa haiwani gena-ge tani wala singadolo haiwani ma dutu 'o sapolo 'a disa, kara ni pula'a haiwani gena-ge ra unanga. 3 So'o gena-ge ḏi'i, na'o ngini ni sanga keledai, pakeanga bela moi, bolo 'oru ḇato ta ngowa'a taninga bangsa rimoi ga'a unanga 'a siiranga, awa ni masa-sakala na waro ua.

4 Na'o ngini ni oḏi'i ngowa'a Israel matengo i'a taninga bangsa rimoi, unanga gena-ge 'ai keledai bolo sapi ma nau'u 'i ruba toma ngo'omo, awa ngini ni masa-sakala na waro ua. Ngini balasu ni riono unanga gena-ge 'o side'oso 'ai haiwani.>>

5 We-were'a matengo awa mo pake na-nau'u manga baju re na-nau'u matengo awa 'o pake we-were'a manga baju, sababu 'a guna ḇato ga'a 'a si'a'a so'o gena-ge Ma JOU 'u emo-emono, Unanga gena-ge Ma Jou'ongu Madutu ga'a ngini ni silamo'o re siḏubuso. 6 Na'o ngini ni tagi-tagi re oḏi'i namo diwanga ma ngi'i toma ate ḏu moi bolo toma tana'a re toma dara 'age namo ma ngowa re namo ma gosi, re ma ngina ya worongo, awa na 'oro ma ngina simete'e rema ngowa. 7 Ngini balasu ni sibebasa ma ngina, mada'a ma ngowa nyengara na 'oro. Rema duhu gena-ge, ngini ḏuanga i'a ni 'ahu la-la re ni tegoro ti'ara toma daeraha gena-ge. 8 Na'o ngini ni side'oso wala su-sungi, balasu ni 'a'a hisa ma ḇoko'o toma wala ma re'u ga'a rata, la awa ngini ni dadi sala na'o ngowa'a 'aḏi eta'a toma taninga wala ma re'u kara 'aḏi sengene. 9 Taninga guḏa 'anggur awa ni so'ana joro ma lelegu, pa'i ni so'ana 'anggur ḇato. Na'o ngini ni so'ana joro ma lelegu, awa na 'oro guḏa gena-ge enanga ma hasili, bae 'anggur bolo joro ma lelegu ma hasili, sababu mo-moini gena-ge 'i siwola i'a sa'olo jou-jou ra Ma JOU. 10 Awa ninga pajeko siidala sapi nau'u rimoi re keledai rimoi.* 11 Awa ninga pakeanga rimoi 'i si'a'a reo ḇa'a wol re ḇa'a linen.

12 Si'a'a lawe sianga re sigare taninga baju ma kiḏanga ma dere-dere ma ḇuḇuku rata. ✝

13 Na'o na-nau'u matengo 'o molo'ara we-were'a matengo, re togumu i'a munanga unanga mi nyafusu riwara. 14 Re unanga 'o sikalaki sa-sakala mangale munanga re sijira 'ami lomanga re 'o kanau so'o ne: <<Ngoi to sanga we-were'a sa'olo 'ai were'a mada'a toma 'orasa ngomi mi otu ma lomu ngoi to waro kalaha munanga mo molo'ara nyangu, munanga mo waro nau'u ḏua.

15 Sababu gena-ge, were'a 'ami bi-biri'i balasu 'aḏi 'oro geri molo'ara manga ḇa'a ga'a rema ngaunu kara ananga balasu 'a sijumu toma limau ma bi-biri'i—bi-biri'i toma limau ma ngalana ma lamo'o. Enanga gena-ge 'i dadi bukiti mangale manga ngowa'a were'a gena-ge mo waro nau'u nyangu. 16 Ngowa'a were'a 'ami ḇaḇa gena-ge balasu 'o kanau toma bi-biri'i so'o ne: <Ngoi reto pula'a 'ari ngowa'a were'a ra unanga nena-ne di'a mo dadi 'ai were'a, mada'a nange-ne unanga mi nyafusu riwara; 17 unanga 'o sikalaki sa-sakala re 'o kanau so'o ne: <<Ngoi to sanga bukiti ua munanga mo waro nau'u nyangu.>> Mada'a nena-ne enanga ma bukiti mangale 'ari ngowa'a were'a mo waro nau'u nyangu.> Re ananga 'aḏi welanga geri molo'ara manga ḇa'a rema ngaunu gena-ge talaḏi toma limau ma bi-biri'i—bi-biri'i.> 18 Dadi limau ma bi-biri'i 'aḏi cako'o ma na-nau'u gena-ge re 'aḏi ca'olo unanga reo ja-ja'olo. 19 Ananga ḏi'i singa'unu bo-bangu pipisi salaka latu moi ra unanga gena-ge, re unanga 'o pula'a pipisi gena-ge tai dedono nau'u, sababu unanga ro sijira munanga gena-ge 'ami lomanga, were'a Israel ga'a mo waro nau'u nyangu. Re ḏi'i were'a gena-ge tatapu unanga 'ai were'a, re ma'u tola'a yoḏu'u singadolo sengene. 20 Mada'a si'ade-'ade i'a 'ai kalaki gena-ge 'i tero re ma bukiti 'i cua, gena-ge ma ngale munanga gena-ge mo waro nau'u ḏua wakutu mo molo'ara nyangu. 21 Dadi were'a gena-ge balasu sigasa tami ḇaḇa re ngina manga wala ma ngalana. Toma ngi'i gena-ge ngowa-ngowa'a na-nau'u tami limau, ananga gena-ge balasu 'aḏi poini munanga reo maḏi singadolo mo sengene. Were'a gena-ge remo 'a'a 'ori i'a ga'a 'i sipula'a mara'a toma ngowa-ngowa'a Israel sababu munanga mo 'a'a ga'a ma tero sa'olo we-were'a su-sudala wakutu munanga mo tegoro tami ḇaḇa re ngina manga wala moju. Rema duhu gena-ge, ngini ni singi-ngiranga kajahatana taninga sigolona.

22 Na'o na-nau'u matengo ngowa'a 'u cako'o toma 'orasa unanga 'o otu malomu reo ngowa'a nau'u lelegu 'ai were'a, ananga nga muḏiḏi balasu sanga hukumu sengene. Rema duhu so'o gena-ge ngini ni singi-ngiranga kajahatana taninga sigolona.

23 Na'o na-nau'u matengo toma limau ma dara unanga 'o ma'u sanga mosolese matengo ga'a 'age rami ga-ganau ḏua kara ananga nga muḏiḏi gena-ge 'aḏi otu malomu. 24 Dadi ananga nga muḏiḏi, ngini balasu na'u gasa toma limau ma ḏuḏunu re poini reo maḏi singadolo 'aḏi sengene. Sababu kalaha hali gena-ge 'i dadi toma limau ma dara, mosolese gena-ge mo poa'a ua di'a golo'o riono. Re ma na-nau'u sababu unanga 'o dongotu mosolese ga'a ngowa'a Israel lelegu 'ai ga-ganau. Rema duhu so'o gena-ge ngini ni singi-ngiranga kajahatana.

25 Mada'a na'o na-nau'u matengo i'a 'o ma'u sanga mosolese matengo ga'a ngowa'a lelegu 'ai ga-ganau toma daeraha ma rurubu ga'a kiḏanga toma ngowa-ngowa'a manga wala. Ḏua unanga 'o pakisa di'a otu ma lomu reo munanga. Na'o so'o gena-ge pa'i ma na-nau'u ḇato ga'a sanga hukumu sengene. 26 Awa ni 'a'a hukumu 'oru ḇato ra mosolese gena-ge. Munanga mo 'a'a ga'a ma rapu ua ga'a 'i patasa di'a sanga hukumu sengene. Hali gena-ge ma tero sa'olo hali mangale ngowa'a 'o sisengene ngowa'a Israel lelegu, 27 sababu mosolese unanga nimi pakisa misilulu toma daeraha ma rurubu ga'a 'i kiḏanga toma ngowa-ngowa'a manga wala. Dadi kalaha mosolese gena-ge mo poa'a di'a golo'o riono, matengo i'a mai ua 'o sapolo riono munanga.

28 Na'o na-nau'u matengo i'a 'o ma'u sanga mosolese matengo ga'a 'ami ga-ganau cua moju re munanga unanga nimi cako'o re pakisa nimi dongotu; kara ngowa'a lelegu 'aḏi waro 'oru ga'a 'i sidadi. 29 Gena ḏua, unanga gena-ge balasu 'o fangu ma lamo'o pipisi salaka guḏi romotoa toma mosolese gena-ge 'ami ḇaḇa. Mosolese gena-ge mo dadi unanga 'ai were'a sababu munanga unanga pakisa nimi dongotu re ma'u to-tola'a yoḏu'u singadolo sengene.

30 Na-nau'u matengo i'a 'o otu yoḏu'u tai ḇaḇa 'ai were'a, sababu gena-ge unanga 'o sipula'a mara'a tai ḇaḇa sababu ḇaḇa 'ai were'a unanga masiretene 'ai hak.