1 'A Musa 'o kanau toma ngowa-ngowa'a Israel rema betongo so'o ne: <<Na'o ngini ni tagi ma'u parangi talaḏi ninga lawana, mojongo awa na'o ni oḏi'i kareta parangi re manga jarana ga'a repe re ḏi'i manga sordado ma nyo-nyoimi lebe repe i'a reo ngini sababu Ma JOU, Ma Jou'ongu Madutu ga'a ngini ni silamo'o re siḏubuso Unanga gena-ge ga'a 'O sigasa ngini supu toma Mesir, Unanga ḏuanga i'a 'O mamete'e ngini. 2 Wakutu parangi 'i mulai nyangu, 'imam matengo balasu 'o sapolo ino re 'o kanau ra ngini rema betongo so'o ne: 3 <Ioronongoḏu mo-moini ni 'isene! Wangere nange-ne ngini ni tagi ma'u parangi taninga lawana: Awa ni mojongo bolo ninga 'akala re sinyingara ce-ceka'a bolo ni terewete bolo ninga 'akala re sinyingara 'i ruwahe. 4 Sababu Ma JOU, Ma Jou'ongu Madutu ga'a ngini ni silamo'o re siḏubuso, Unanga ḏuanga i'a 'O mamete'e ngini di'a parangi taninga lawana, re Unanga ḏuanga i'a 'O pula'a 'utungu ra ngini.>

5 Gena ḏua, sordado ma sae-sae'e balasu 'aḏi singadolo demo-demo nena-ne ra ngini so'o ne: <'A guna ḇato taninga sigolona ga'a aro simomi'i wala, mada'a ya siwola i'a nyangu ra Ma Jou'ongu Madutu di'a 'Ai saolo re barakati, unanga nyengara 'o maḏibo si. Sababu na'o unanga sordado ma lawana 'u sisengene toma parangi ma dara, ngowa'a lelegu ḏuanga i'a 'aḏi siwola i'a 'ai wala ra Ma Jou'ongu Madutu. 6 'A guna ḇato taninga sigolona ga'a aro so'ana 'anggur tai guḏa 'anggur re ma 'orasa 'utu'u ma sowo'o nyangu, unanga nyengara 'o maḏibo si. Sababu na'o unanga sordado ma lawana 'u sisengene toma parangi ma dara, ngowa'a lelegu ḏuanga i'a 'aḏi ka'e 'anggur ma ḇanyo ma hasili. 7 'A guna ḇato taninga sigolona ga'a rema ninga ga-ganau re ma'u molo'ara nyangu, unanga nyengara 'o maḏibo. Sababu na'o unanga sordado ma lawana 'u sisengene toma parangi ma dara, ngowa'a lelegu ḏuanga i'a 'aḏi molo'ara 'ai ga-ganau.

8 Ḏua, sordado-sordado ma sae'e ananga 'aḏi balasu siajele nena-ne ra ngini so'o ne: <'A guna ḇato taninga sigolona ga'a mojongo re 'akala re sinyingara ce-ceka'a, unanga nyengara 'o maḏibo, la awa sordado lelegu 'ai nau'u 'i iranga ḏi'i. 9 Sordado-sordado ma sae'e 'aḏi kanau tamanga sordado-sordado togumu i'a, balasu sitede manga sordado ma bi-biri'i—bi-biri'i toma toropo moi-toropo moi.

10 Na'o ngini ni tagi parangi limau rimoi, pula'a donga siḏa toma limau ma manusia di'a ananga 'aḏi golo'o dame kamanga parangi ua. 11 Na'o ananga gena-ge 'aḏi welanga ngala-ngalana lamo'o sa'olo nana'o ananga 'aḏi golo'o dame kamanga parangi ua, ananga mo-moini balasu 'aḏi dadi ngini ninga budaka-budaka re 'aḏi munara tubuso di'a ngini. 12 Na'o limau ma manusia gena-ge 'aḏi oḏu'u golo'o dame mada'a nyanyaḏi parangi, ngini balasu ni sigoloḏi di'a parangi limau gena-ge. 13 Gena ḏua, wakutu Ma JOU Ma Jou'ongu Madutu ga'a ngini ni silamo'o re siḏubuso Unanga gena-ge 'O si'a'a ngini nyengara ni sita'aloko limau gena-ge, ngini balasu ni sisengene limau gena-ge ma na-nau'u mo-moini. 14 Mada'a ma we-were'a, re manga ngowa 'olo, haiwani re ananga manga 'ori i'a rana 'oru ḇato toma limau gena-ge ma dara, ngini nyengara na 'oro. Ninga lawa-lawana manga 'ori i'a rana ngini nyengara na pake. Ma JOU Ma Jou'ongu Madutu ga'a ngini ni silamo'o re siḏubuso, mo-moini Unanga gena-ge 'A pula'a ra ngini. 15 Dadi rema duhu so'o gena-ge, ngini ni si'a'a toma limau-limau mo-moini ga'a 'i kiḏanga ra ngini ninga ngi'i, limau gena-ge ga'a ngowa'a Kanaan manga bangsa ua ma limau.

16 Mada'a na'o limau gena-ge 'age taninga daeraha Kanaan ga'a Ma JOU 'a pula'a ra ngini sa'olo ninga warisi, Unanga gena-ge Ma Jou'ongu Madutu ga'a ngini ni silamo'o re siḏubuso, ngini balasu ni sisengene mo-moini ga'a 'ahu toma limau gena-ge. 17 Ngini balasu ni singi-ngiranga ngowa-ngowa'a Het, Amori, Kanaan, Feris, Hewi, re Yebus singadolo ngowa'a matengo i'a mai riwara ga'a 'ahu. Gena-ge mete'e Ma JOU 'a parenta, Unanga gena-ge Ma Jou'ongu Madutu ga'a ngini ni silamo'o re siḏubuso. 18 Rema duhu so'o gena-ge, sisengene ananga, la awa ananga 'aḏi 'a'a ngini ni siḏagi ḏosa ra Ma JOU Ma Jou'ongu Madutu ga'a ngini silamo'o re siḏubuso sababu ananga gena-ge 'aḏi sidoto'o ngini ni si'a'a ga'a Ma Jou'ongu Madutu 'a emo-emono wakutu ananga 'aḏi silamo'o re siḏubuso manga jou'ongu ma somoara.

19 Na'o ngini ni sigoloḏi re parangi limau rimoi lai ti'ara, awa ni tawele manga ate-ate sowo'o 'age toma limau ma ḏuḏunu. Ni oromo ḇato manga ate-ate ma sowo'o, re awa na sijira ma lese, sababu ate-ate gena-ge ninga lawana ua. 20 Pa'i ate-ate ma lelegu ḇato, mo-moini nyengara na tawele di'a si'a'a ninga ngute re manara singadolo limau gena-ge ma manusia, ngini na'u sita'aloko.>>