1 'A Musa 'o kanau moju toma ngowa'a Israel rema betongo so'o ne: << Ngini ḏuanga i'a ni tegoro toma bangsa-bangsa lelegu manga sigolona ga'a Ma JOU 'o siare ngini toma bangsa le'a ḇato, Unanga gena-ge Ma Jou'ongu Madutu ga'a ngini ni silamo'o re siḏubuso. Re toma bangsa gena-ge ma dara, barakati re hukumana mo-moini gena-ge ga'a ngoi ta sitarangi ra ngini, Ma JOU ḏuanga i'a 'A sieanga gena-ge 'i dadi ra ngini: bae barakati ga'a Unanga 'a sipula'a ra ngini bolo hukumana ga'a Unanga 'a singe-ngeta'a ra ngini. Ḏua, ngini ni 'elingi barakati re hukumana gena-ge taninga 'akala re sinyingara ma dara gena-ge, 2 singadolo ngini re ninga ju'uda, ananga gena-ge 'aḏi maḏibo toma ngo'omo boloto ra Ma JOU, Unanga gena-ge Ma Jou'ongu Madutu ga'a ngini silamo'o re siḏubuso, re ananga gena-ge 'aḏi mete'e remanga 'akala re sinyingara mo-moini re manga fikirana mo-moini Unanga gena-ge 'Ai iḏingi re mo-moini ga'a ngoi ta parenta ngini toma wangere nange-ne. 3 Dadi Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O sitogumu sihukumu ananga. Re Unanga gena-ge ḏuanga i'a 'o sijumu 'Ai dadalara lai lamo'o singadolo Unanga ḏuanga i'a 'o lomu ananga moju toma bangsa mo-moini, ga'a toma ngi'i le'a ḇato ga'a Unanga 'A siare ngini pasala ḏua. 4 Kalaha ngini re ninga ju'uda, ananga 'aḏi are toma dungia sitabi donga, Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'o lomu ananga moju da'a re sino re siḏibo ananga gena-ge. 5 Re ma duhu so'o gena-ge, Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'o gasa osama ngini re ninga ju'uda, toma tana'a ga'a manga ete re dotumu 'aḏi ḏegoro ḏua, la ngini gena-ge ḏuanga i'a na ḏegoro ḏi'i. Re Unanga ḏuanga i'a 'O si'a'a ngini re ninga ju'uda gena-ge lebe repe reo ananga manga ete re dotumu. 6 Kalaha ngini re ninga ju'uda, ananga manga 'akala re sinyingara 'i te'e madutu, Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O si'a'a ananga gena-ge manga 'akala re sinyingara 'i mete'e mode-mode'e 'Ai parenta. Dadi Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ngini Nu dadalara reninga 'akala re sinyingara mo-moini, ḏi'i reninga fikirana mo-moini. Rema duhu gena, ngini ḏuanga i'a ni 'ahu tau-taunu toma tana'a gena-ge. 7 Ḏua Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga 'O singe-ngeta'a hukumana mo-moini taninga lawana ga'a raḏi sito-to'u ngini. 8 Re ngini dadunu ni 'isene moju Ma JOU 'ai iḏingi singadolo ni siḏagi 'Ai parenta mo-moini ga'a ngoi, Musa ta singadolo ra ngini toma wangere nange-ne. 9 Ḏua Ma JOU, Ma Jou'ongu Madutu ga'a ngini ni silamo'o re siḏubuso ḏua, Unanga gena-ge 'o si'a'a ngini ninga munara rema hasili lai repe, ngini ḏuanga i'a sanga ngowa'a lai repe, ninga sapi ma ngowa lai repe re ninga guḏa rema hasili lai repe. Sababu Ma JOU ḏuanga i'a dadunu 'o maroanga moju di'a 'O pula'a 'utungu ra ngini, ma tero ma siḏa Unanga 'o maroanga di'a 'O pula'a 'utungu taninga ete re dotumu, 10 na'o ngini ni 'isene Ma JOU 'ai iḏingi, Unanga gena-ge Ma Jou'ongu Madutu ga'a ngini silamo'o re siḏubuso, singadolo ni siḏagi 'Ai parenta re 'atoranga, ga'a 'i silefo toma boku Hukumu nena-ne ma dara. Ngini balasu dadunu ni macelolo moju ra Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso singadolo ngini ni mete'e Unanga gena-ge reninga 'akala re sinyingara mo-moini re ninga fikirana mo-moini.>>

11 'A Musa 'o kanau moju rema betongo so'o ne: <<Parenta-parenta nena-ne ga'a ngoi ta singadolo ra ngini toma wangere nange-ne, parenta gena-ge ngini nga'unu na mete'e sababu enanga 'i kangela siḏi ua di'a ngini re ḏi'i parenta gena-ge ngini nga'unu na sahe sababu enanga 'i kiḏanga woḏi ua ra ngini. 12 Parenta gena-ge toma diwanga ua, singadolo ngini ni kanau so'o ne: <Matengo i'a mai ua nga'unu 'o pere toma diwanga la 'a 'oro di'a ngene, la ngene wa 'isene re ngene wa siḏagi!> 13 Re ḏi'i parenta gena-ge da'a ngoloto kaci moi ua, singadolo ngini ni kanau so'o ne: <Matengo i'a mai ua nga'unu 'o iwanga da'a kaci moi la 'a 'oro di'a ngene wa 'isene, re ngene wa siḏagi!> 14 Siḏibo ḏi'i Ma JOU 'ai parenta-parenta gena-ge 'i cori madutu ra ngini ma tero sa'olo enanga gena-ge taninga madanga ma dara re taninga 'akala re sinyingara ma dara. Dadi parenta gena-ge ngini na sahe ḏua re nyengara na kanau ḏua, la ngini nyengara na siḏagi.

15 'Elingi, toma wangere nange-ne ngoi, 'a Musa to sipula'a cumutu romoḏiḏi ra ngini: 'ahu re bara'utungu bolo se-sengene re bodito. 16 Toma wangere nange-ne, ngoi, 'a Musa to pula'a parenta ra ngini so'o ne: Dadalara Ma JOU, Ma Jou'ongu Madutu ga'a ngini silamo'o re siḏubuso singadolo ninga 'ahu ma ngo'omo 'i mete'e 'oru ḇato ga'a Ma JOU ra sijumu, re ni siḏagi 'Ai huku-hukumu re putusanga- putusanga re 'Ai 'atoranga. Rema duhu so'o gena-ge, ngini ni 'ahu tau-taunu re ni madogo-dogo repe re Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a sibarakati ngini toma tana'a ga'a ngini ḏuanga i'a na osama re ḏegoro. 17 Mada'a na'o ngini ninga 'akala re sinyingara 'i masoloto Ma JOU singadolo ni mete'e Unanga ua, mada'a ngowa'a toma bangsa lelegu 'aḏi sihaga ngini singadolo ni silamo'o re siḏubuso jou'ongu ma somoara re ni siḏagi jou'ongu ma somoara gena-ge ma mau, 18 ḏua ngoi, 'a Musa to siajele re ngini toma wangere nange-ne, mangale tantu ḏua ngini ḏuanga ni iranga toma tana'a gena-ge. Ngini ninga 'ahu ḏuanga i'a 'i ti'ara ua toma tana'a ga'a ngini na ḏegoro wakutu ngini ni iwanga ḇanyo Yordan palisi'i i'a. 19 Ḏua toma wangere nange-ne, diwanga re tana'a 'i dadi sakisi mangale ngoi reto sipula'a cumutu romoḏiḏi ra ngini: 'ahu bolo se-sengene, barakati bolo hukumana. Sababu gena-ge, ngini balasu ni cumutu 'ahu, la ngini ni 'ahu: bae ngini bolo ninga ju'uda. 20 Sababu gena-ge, dadalara Ma JOU, Ma Jou'ongu Madutu ga'a ngini ni silamo'o re siḏubuso, singadolo ngini ni 'isene 'Ai iḏingi re ni macako'o namo-namoto ra Ma JOU. Rema duhu so'o gena ngini ninga 'ahu ḏuanga i'a 'i kiḏanga toma tana'a ga'a Ma JOU 'o 'a'a jaji rema sasi di'a 'A sipula'a taninga ngimo-ngimono: ananga gena-ge 'a Abraham, Ishak re 'a Yakub.>>