1 Nena-ne barakati ma ḏo-ḏogumu ga'a Musa Ma Jou'ongu Madutu 'ai nabi, unanga gena-ge 'o pula'a toma ngowa'a Israel wakutu ti'ara ua unanga 'o sengene.

2 Musa 'o kanau rema betongo so'o ne:

<<Ma JOU 'o sapolo da'a kie Sinai ino

re 'O baolo ra ananga toma tana'a Seir sa'olo wangere ma la'o toma 'orasa da-daini i'a moju;

Unanga rai cahaya toma kie-kie Paran ino,

re Unanga 'o sapolo mamete'e mala'ekata rema cala nyagi; Tai kuwiḏa, 'Ai 'umata 'aḏi oḏi'i 'age u'u leja-lejanga.

3 Mode-mode'e Unanga 'o dadalara 'Ai 'umata;

'Ai ngowa'a mo-moini ga'a siwola i'a ra Unanga, ananga 'aḏi 'ahu rema salamata Tai giama ma sata,

ananga 'aḏi mapagara manga biono Tai rou,

re 'aḏi 'isene mangale 'Ai 'Idini.

4 Ngoi, 'a Musa reto pula'a Ma JOU 'ai hukumu ra ngene,

hukumu gena-ge 'i dadi warisi rimoi lai hali di'a Yakub 'ai ju'uda tala.

5 Ma JOU 'o dadi 'olana toma Yesyurun,

toma 'orasa bangsa ma sae'e 'aḏi sapolo ma lomu, re mamete'e suku Israel mo-moini.

6 'A Musa 'o kanau mangale suku Ruben so'o ne: <<Sieanga i'a ngini gena-ge ni 'ahu re sengene awa,

mada'a ngini ni repe ua.>>

7 'A Musa 'o kanau mangale suku Yehuda so'o ne: <<Ya Ma JOU, sieanga i'a No 'isene 'a Yehuda 'ai go-golo'o,

re dadunu No sirimoi moju reo suku Israel lelegu.

Rani kuasa No site'e ananga,

re No dadi ananga manga ri-riono toma 'orasa talaḏi manga lawana.>>

8 'A Musa 'o kanau mangale suku Lewi so'o ne: <<Ma JOU 'ai Tumim 'i sipula'a toma suku Lewi

re 'Ai Urim* ga'a 'Ani ngowa'a loasa re banari,

ananga ga'a Ma JOU na'u tai'i toma Masa,

re No ma'u lawana ra guna ḇato sebanga ḇanyo Meriba ma la'o;

9 ananga ga'a 'o kanau mangale 'ai ḇaḇa re 'ai ngina:

<Ngoi ta'u mamaha ananga ua>;

unanga ga'a oḏu'u nana'o 'ai ioro re nongoḏu

re siwaro ua tai ngowa-ngowa'a. ✝

Sababu ngowa-ngowa'a Lewi gena-ge pa'i 'aḏi mete'e ḇato 'Ani demo

re 'aḏi siḏagi 'Ani jaji.

10 Ananga 'aḏi doto'o Ma JOU 'ani 'atoranga ra Yakub 'ai ju'uda,

re Hukumu toma ngowa'a Israel;

ananga 'aḏi sigare dupa ma bounu lai sa'i ra Ma JOU 'ani biono

re jou-jou tau'u simoini Tani jou-jou ma ngi'i ma re'u.

11 Ya Ma JOU, No sibarakati suku Lewi singadolo 'aḏi dadi ngowa'a rema-enanga,

re sieanga i'a ananga gena-ge manga munara 'i sisanangi 'Ani 'akala re sinyingara.

Siwejere ngowa'a ga'a lawana ananga

ngowa'a ga'a emono ananga, singadolo ngowa'a gena-ge 'aḏi nga'unu riwara parangi ananga.>>

12 'A Musa 'o kanau mangale suku Benyamin so'o ne:

<<Ngowa'a ga'a Ma JOU ya'u dadalara ga'a tegoro kama mojongo ua marimoi ra Unanga!

Ma JOU 'o saolo ananga kama togumu ua, ananga gena-ge ga'a 'aḏi tegoro tamanga sau-sau ma sigolona.>>

13 'A Musa 'o kanau mangale Yusuf 'ai ju'uda so'o ne:

<<Nyengara gari'a Ma JOU sibarakati manga daeraha

rema gagini da'u diwanga tala,

re ḇanyo lamo'o ga'a toma 'aḏu;

14 reo sowo'o lai rousu ma hasili sababu wangere ma la'o ya 'erese,

re guḏa ma hasili 'i lamo'o toma ngara ma jelele i'a;

15 reo tana'a ma hasili ga'a lai rousu toma kie-kie ino da'a re sino moju,

re hasili ma lamo'o toma sau-sau ino toma 'ua re 'au wali moju,

16 reo 'ori i'a mo-moini ga'a lai rousu toma tana'a re enanga ma dara;

re Ma JOU 'o sibarakati ananga tau-taunu, Unanga ga'a 'O kanau ra ngoi toma goroa dodowo'o toma u'u ma lejanga ma dara ino.

Nyengara gari i'a barakati mo-moini gena-ge 'uci ra Yusuf 'ai ju'uda,

sababu unanga 'o dadi 'ai gia nongoḏu manga sae'e.

17 'A Yusuf 'ai kabasarana ma tero sa'olo sapi ma ngowa nau'u ma jomolo,

'ai de-de'e ma tero sa'olo sapi nga-ngabala ma tadu-tadu'u;

'a Yusuf 'ai ju'uda ḏuanga i'a 'aḏi sisengene manga lawana ma tero sa'olo sapi 'o pake tadu-tadu'u di'a sihedu ma ngowa'a,

ananga gena-ge manga lawana mo-moini toma dungia ma dara, toma dere singadolo toma dere,

'a Yusuf 'ai ju'uda gena-ge ngowa'a suku Efraim ga'a rema sordado cala nyagi,

re ananga gena-ge ḏi'i ngowa'a suku Manasye ga'a rema sordado cala-cala.>>

18 'A Musa 'o kanau mangale suku Zebulon re Isakhar so'o ne: <<Hei suku Zebulon, ngini ni maroanga taninga ḏo-ḏagi ma dara,

re hei suku Isakhar, ngini ni maroanga taninga suyu-suyu'u ma dara.

19 Suku Zebulon re suku Isakhar 'aḏi 'aro'o suku-suku Israel ma lelegu 'aḏi sapolo tamanga kie;

toma ngi'i gena-ge ananga 'aḏi gasa manga jou-jou tola'a ga'a mete'e Ma JOU 'ai hukumu,

sababu ananga 'aḏi sanga ngoloto ma hasili

re 'aḏi sanga dongi ma hasili toma ngoloto ma 'uḏu.>>

20 'A Musa 'o kanau mangale suku Gad so'o ne: << Puji re silamo'o Ma JOU ga'a 'O sidogo lamo'o suku Gad manga daeraha.

Ngowa'a Gad gena-ge 'aḏi tegoro da'a ma tero sa'olo singa

ga'a 'i si'acingi haiwani ma giama re sae'e ma eno'o *

21 Ananga 'aḏi pili tana'a ga'a lai rousu di'a ananga masiretene,

tana'a gena-ge di'a bi-biri'i—bi-biri'i manga balangu.

Wakutu suku Israel bangsa gena-ge manga suku-suku ma sae'e, ananga 'aḏi malomu;

suku Gad 'aḏi siḏagi Ma JOU 'ai mau ga'a 'adili

re 'Ai huku-hukumu mamete'e ngowa'a Israel.>>

22 'A Musa 'o kanau mangale suku Dan so'o ne: <<Suku Dan ma tero sa'olo singa raramasa ie

ga'a toma daeraha Basan, ngini ni magogono kara maḏupaka supu di'a parangi ninga lawana.>>

23 'A Musa 'o kanau mangale suku Naftali so'o ne:

<<Ma JOU 'o siromanga suku Naftali Rai mura re dadalara

re 'O sibarakati reo hali ma la-la lai repe ra ngini.

Ḏegoro daeraha toma talaga Galilea re papolo kore sara taninga daeraha.>>

24 'A Musa 'o kanau mangale suku Asyer so'o ne: <<Nyengara gare i'a Ma Jou'ongu Madutu 'o sibarakati lebe pai'i suku Asyer reo suku-suku Israel ma lelegu;

nyengara gare i'a Unanga gena-ge 'o sijumu 'Ai mura re dadalara lebe lamo'o toma suku Asyer reo 'ai ioro re nongoḏu manga suku ma lelegu,

re nyengara gare i'a ananga manga ate zaitun ma hasili 'i lai lamo'o singadolo ananga nyengara 'aḏi soso'o manga rou rema goroho zaitun gena-ge.

25 Nyengara gare i'a ananga manga limau ma ngalana ma kalamu 'i si'a'a reo ḇesi re tamḇaga,

re tamanga 'ahu ma giḏanga ananga gena-ge 'aḏi basono ogoro.

26 Hei Israel*, Ma Jou'ongu Madutu ga'a ngini ni silamo'o re siḏubuso, Unanga 'o site-tero yoḏu'u reo jou'ongu ma somoara.

Rai kuasa, Unanga 'o mabalene kakamo sa'olo 'Ai kareta di'a 'O riono ngini,

Rai kabasarana, Unanga 'o tagi tola'a i'a diwanga ma dara.

27 Ma Jou'ongu Madutu ga'a 'O 'ahu kasingado-ngadolo i'a, Unanga gena-ge 'o dadi ninga ngi'i ma taḏusu,

re Unanga gena-ge 'o toti'i ngini kasingado-ngadolo i'a.

re Unanga gena-ge 'O dusu'u ninga lawana taninga biono re 'O kanau toma ngowa'a Israel: <Singi-ngiranga ananga!>

28 Dadi bangsa Israel 'aḏi tegoro kama mojongo ua,

'a Yakub 'ai ju'uda 'aḏi tegoro reo ogoro

toma daeraha rimoi ga'a rema gandum re 'anggur ma hasili lai repe;

re ḏi'i diwanga masiretene 'i siguci gagini.

29 Hei Israel, ngini ni sanga bara'utungu masala! Bangsa rimoi i'a mai ua ma tero ngini!

Ngini ga'a Ma JOU nu sisalamata,

Unanga gena-ge ma tero sa'olo ninga ta-taini ga'a 'i saolo ngini

re ḏi'i ma tero sa'olo ninga samaranga ga'a 'i sita'aloko ninga lawana!

Ngini ninga lawana ḏuanga i'a 'aḏi mapagara manga biono ngadolo tana'a ra ngini ninga biono, sababu 'aḏi mojongo,

re ngini ni sito-to'u ananga.>>