1 'A Musa 'o kanau moju toma ngowa'a Israel ma betongo so'o ne: <<Ngini balasu ni dadalara Ma JOU Ma Jou'ongu Madutu ga'a ngini silamo'o re siḏubuso, re ni siḏagi 'Ai munara, Ai huku-hukumu, 'Ai 'atoranga-'atoranga re 'Ai parenta-parenta, mo-moini gena-ge tau-taunu. 2 Ni 'elingi wangere nange-ne ngoi, Musa, to kanau taninga ngowa-ngowa'a ua, ananga gena-ge ga'a 'aḏi oḏi'i ua bolo basono ua 'oru ga'a Ma JOU 'a pake di'a 'O doto'o ngini. Mada'a ngoi to kanau ra ngini gena-ge ga'a ni sisakisi tala Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'Ai kabasarana re 'Ai kuasa re 'Ai de-de'e 3 re didina'o-didina'o heranga re 'Ai ga'a Ma JOU 'a si'a'a toma Mesir talaḏi Firaun, 'olana Mesir re tai daeraha mo-moini. 4 Re pa'i ngini gena-ge ḇato reni 'oḏi'i 'oru ga'a Ma JOU 'o si'a'a toma sordado Mesir simete'e manga jarana re kareta parangi. Re toma 'orasa ananga gena-ge 'aḏi kunu'i ngini, Unanga 'o si'a'a Ngoloto Gelagah 'i 'uisi tamanga ma re'u mo-moini singadolo sordado mo-moini 'aḏi jala re Unanga ya'u singi-ngiranga singadolo wangere nange-ne. 5 Re ngini reni oḏi'i ḏi'i 'oru ga'a Unanga 'a si'a'a ra ngini toma daeraha baulaco singadolo ngini ni sapolo toma ngi'i nena-ne; 6 re 'oru ga'a Unanga 'a si'a'a ra 'a Datan re Abiram, 'a Eliab 'ai ngowa-ngowa'a nau'u, re Eliab 'a Ruben 'ai ngowa'a nau'u. Ngini ni oḏi'i Ma JOU 'o si'a'a tana'a 'i welanga singadolo ananga mamete'e remanga ngitu re ngale, manga suyu-suyu'u re manga falalomu re haiwani biara mo-moini, enanga gena-ge mo-moini eta'a toma tana'a ma dara kara tana'a 'i damunu moju tamanga re'u ma tero sa'olo ngowa'a 'aḏi nyamolo ngo-ngoromo! Mo-moini gena-ge 'i dadi toma ngowa'a Israel manga sigolona.✝ 7 Dadi ngini masiretene ni oḏi'i Ma JOU 'Ai didina'o hera-heranga mo-moini ga'a Unanga 'a si'a'a.>>

8 <<Ti'ara ua, ngini ḏuanga i'a ni tola'a i'a Ḇanyo Yordan re osama tana'a da'a kaci moi. Sababu gena-ge, na'o ngini ni siḏagi mo-moini toma parenta rimoi ma dara ga'a ngoi, Musa, ta singadolo ra ngini wangere nange-ne ngini ḏuanga i'a ni dadi te'e singadolo ngini nga'unu ni ḏegoro tana'a gena-ge. 9 Re ngini ḏuanga i'a ni 'ahu ti'ara toma tana'a lai rousu ga'a ri romanga reo haiwani piara re tana'a ma hasili lai repe. Tana'a gena-ge ga'a Ma JOU ro 'a'a jaji rema sasi taninga ngimo-ngimono re tamanga ju'uda tala. 10 Tana'a ga'a ḏuanga i'a na osama di'a ḏegoro ma tero ua toma Mesir, ga'a nga'ene ngini na tegoro. Toma ngi'i gena-ge ngini balasu ni munara rema galasau'u mode-mode'e di'a siosama ḇanyo taninga guḏa-guḏa uge toma 'orasa so'ana gisisi. 11 Mada'a tana'a ga'a ngini ḏuanga i'a na dongosama di'a ḏegoro 'age rema kie-kie re picaru-picaru ga'a ma tana'a 'i sioḇoso reo besa'a da'u diwanga tala. 12 Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge 'O jaga re kadiarata tau-taunu tana'a gena-ge toma musungu ma giḏanga.

13 <<Dadi siḏagi 'Ai parenta-parenta tau-taunu ga'a ngoi ta singadolo ra ngini wangere nange-ne: Dadalara Ma JOU Ma Jou'ongu Madutu ga'a ngini silamo'o re siḏubuso re ni siḏagi Unanga 'Ai mau reninga 'akala re sinyingara mo-moini re reninga fikirana mo-moini. 14 Na'o ngini ni si'a'a so'o gena-ge, Ma JOU ḏuanga i'a 'O sisapolo besa'a da'u diwanga tala toma 'orasa,* gena-ge toma 'orasa ma so'ana* singadolo toma 'orasa ma konyo* singadolo ngini ninga gandum, 'anggur re zaitun ma goroho, mo-moini gena-ge ma hasili 'i repe. 15 Re ḏi'i Unanga ḏuanga i'a 'o pula'a rurubu di'a ninga haiwani biara ma ngo-ngoromo re ngini ḏuanga i'a ni oromo singadolo ḏugala. 16 Awa ni maki-kiḏanga ra Ma JOU sababu ninga 'akala re sinyingara 'i sihaga ngini singadolo ni siḏagi jou'ongu ma somoara ma mau re silamo'o re siḏubuso enanga gena-ge. 17 Na'o ngini ni 'a'a so'o gena-ge, Ma JOU 'Ai duruta ga'a ma tero sa'olo u'u, enanga ḏuanga i'a 'i leja-lejanga ra ngini singadolo Unanga ro sisapolo besa'a riwara. Dadi ngini ninga tana'a 'i dadi dudungu tore-tore singadolo ninga joro ma hasili cua kara ngini capati ni sengene toma tana'a ma rousu i'a ga'a ti'ara ua Ma JOU ḏuanga i'a 'A pula'a ra ngini.

18 Sababu gena-ge, 'Elingi re totoho la-la ino 'Ari parenta gena-ge taninga 'akala re sinyingara re fikirana. Sipiri'u enanga gena-ge taninga giama re sipiri'u ḏi'i taninga memese * sa'olo nana'o, la na 'elingi tau-taunu. 19 Sidoto'o 'Ari demo-demo gena-ge taninga ngowa-ngowa'a: Sijarita gena-ge ra ananga gena-ge wakutu tegoro toma wala ma dara bolo ni sisoi'i tala wala re ni tagi rou, toma 'orasa mau otu bolo wakutu ni momi'i ḏua. 20 Silefo demo-demo gena-ge re singosama toma ngi'i ma ceka'a kara enanga gena-ge sipata toma wala ma ngalana ma ngasu'u ma kuwiḏa re toma ngalana lamo'o taninga limau, 21 la ngini re ninga ngowa'a, ngini gena-ge ḏuanga i'a ni tegoro ti'ara toma tana'a ga'a Ma JOU ro 'a'a jaji rema sasi taninga ngimo-ngimono. Ma di'ara rema diwanga toma dungia ma re'u, ma di'ara tana'a gena-ge ngowa'a Israel manga warisi.

22 Na'o ngini mode-mode'e ni siḏagi mo-moini toma parenta rimoi ma dara ga'a ngoi, Musa, ta singadolo ra ngini: Dadalara Ma JOU Ma Jou'ongu Madutu ga'a ngini silamo'o re siḏubuso singadolo ninga 'ahu ma ngo'omo 'i mete'e 'Ai huku-hukumu re ni macako'o namo-namoto tau-taunu ra Unanga,✝ 23 ḏua Ma JOU ḏuanga i'a 'O dusu'u bangsa mo-moini gena-ge taninga biono, la ngini ḏuanga i'a nga'unu ni ḏegoro toma bangsa-bangsa gena-ge manga tana'a, ananga gena-ge ga'a lebe lamo'o re lebe te'e ra ngini. 24 Ma ngi'i rimoi-rimoi ga'a ngini na to'u, ḏuanga i'a 'i dadi ta ngini. Ninga tana'a enanga ma giḏanga mulai toma daeraha baulaco toma papolo kore sara singadolo toma kie-kie Libanon toma papolo kore mie, re mulai toma ḇanyo Efrat toma wangere ma la'o singadolo toma ngoloto golona toma wangere ma soḏu. 25 Toma tana'a gena-ge mo-moini, matengo i'a mai ua nga'unu matahana talaḏi ngini sababu Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ḏuanga i'a 'O 'a'a ngowa-ngowa'a gena-ge matai mojongo singadolo terewete ma tero Unanga gena-ge 'O 'a'a jaji ḏua.

26 <<Wangere nange-ne ngini nyengara ni cumutu barakati bolo kutuki: 27 Ngini ḏuanga i'a sanga barakati na'o ni siḏagi Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'Ai parenta-parenta, ga'a wangere nange-ne ngoi ta singadolo ra ngini. 28 Re ngini ḏuanga ni sanga kutuki na'o ngini ni mete'e ua Ma JOU 'ai parenta-parenta Unanga gena-ge, Ma Jou'ongu Madutu ga'a ngini ni silamo'o re siḏubuso, mada'a ngini ni sisoi'i tala toma 'ahu ma ngo'omo ga'a Ngoi ta parenta ḏua wangere nange-ne, la ni mete'e re silamo'o re siḏubuso jou'ongu ma somoara, enanga gena-ge ngini na nana'o ua soi moi i'a mai ua. 29 Palisi'i i'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O gasa ngini osama toma tana'a ga'a ngini ḏuanga i'a na ḏegoro, ma barakati gena-ge balasu 'a siajele toma Kie Gerizim re ma kutuki gena-ge siajele toma Kie Ebal. 30 Kie romoḏiḏi gena-ge 'age toma ḇanyo Yordan ma wangere ma soḏu, gena-ge tana'a ga'a ngowa'a Kanaan 'aḏi tegoro toma Picaru Yordan, papolo wangere ma soḏu kiḏanga ua. Ḏi'i kie romoḏiḏi gena-ge cori toma ate karamata ḏu moi ga'a ngi'i di'a silamo'o re siḏubuso jou'ongu ma somoara toma gamu More ✝re cori limau Gilgal. 31 Ti'ara riwara, ngini ḏuanga i'a ni iwanga ḇanyo Yordan di'a osama re ni ḏegoro tana'a ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ḏuanga i'a 'A pula'a di'a ngini. Wakutu ngini na ḏegoro tana'a gena-ge re ni tegoro 'age, 32 ngini balasu ni totoho la-la singadolo ni siḏagi mode-mode'e hukumu mo-moini re 'atoranga-'atoranga mo-moini ga'a ngoi ta singadolo ra ngini wangere nange-ne.>>