1 'A Musa 'o kanau moju toma ngowa'a Israel mo-moini. 2 Re unanga 'o kanau ra ananga rema betongo so'o ne: <<Ngoi nange-ne 'ari 'umuru musungu latu moi nyagi romoḏiḏi. Ngoi nga'unu to tagi i'a da'a yoḏu'u. Sidogo ḏi'i Ma JOU ro singadolo 'Ai putusanga pasala ḏua ra ngoi so'o ne: <Ḇanyo Yordan, ḏuanga i'a ngana nyengara na iwanga ua.>✝ 3 Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge masiretene ḏuanga i'a 'O iwanga Ḇanyo Yordan taninga biono. Unanga ḏuanga i'a 'O singi-ngiranga bangsa-bangsa ga'a ḏegoro toma Ḇanyo Yordan da'a kaci moi, singadolo ngini nyengara ni dusu'u ninga lawana re ḏegoro tamanga daeraha. 'A Yosua, unanga ḏuanga i'a 'o sibi-biri'i taninga biono wakutu ngini ni iwanga ḇanyo Yordan, ma tero sa'olo Ma JOU 'o siajele ḏua. 4 Ma JOU ḏuanga i'a 'o singi-ngiranga ananga gena-ge ma tero sa'olo Unanga 'o singi-ngiranga 'a Sihon re 'Og, ngowa'a Amori manga 'ola-'olana mamete'e ḏi'i ananga manga sordado-sordado re manga daeraha. 5 Ma JOU ḏuanga i'a 'o sipula'a bangsa ra ngini singadolo ngini ni sita'alako ananga ga'a 'aḏi ḏegoro toma tana'a gena-ge. Re ngini balasu ni siḏagi ra ananga mete'e Ma JOU 'ai parenta di'a singi-ngiranga ananga ga'a ngoi, 'a Musa to siajele ra ngini. 6 Site'e ninga 'akala re sinyingara re ni nau'u. Awa ni mojongo re awa ni sawana ananga, sababu Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'o tagi mamete'e ra ngini. Unanga 'o sieanga i'a ngini ua mada'a 'O marimoi ra ngini ua.>>

7 Ḏua Musa 'o 'aro'o 'a Yosua re 'o kanau ra unanga toma ngowa'a Israel mo-moini manga biono: <<Site'e 'ani 'akala re sinyingara re no nau'u, * sababu ngana ḏuanga i'a no osama mamete'e bangsa Israel nena-ne toma tana'a ga'a Ma JOU ro 'a'a jaji rema sasi di'a 'A sipula'a taninga ngimo-ngimono. Re ngana ḏuanga i'a no sibi-biri'i ananga singadolo ananga 'aḏi ḏegoro toma tana'a gena-ge. 8 Sababu Ma JOU, Unanga masiretene 'o tagi sisiḏa tani biono, re Unanga gena-ge ḏuanga i'a 'o tagi mamete'e ra ngana. Unanga 'o sieanga i'a ngana ua mada'a 'O marimoi ra ngana tau-taunu. Sababu gena-ge, mojongo awa bolo awa 'ani 'akala re sinyingara 'i kangela.>>

9 Gena ḏua, 'a Musa 'o lefo Ma JOU 'ai hukumu, pasala i'a unanga 'a sipula'a toma 'imam-'imam toma suku Lewi, ananga ga'a 'aḏi sitede Ma JOU 'ai burua jaji, re toma ngowa'a Israel manga ngowa'a bi-biri'i ḏi'i. 10 Re 'a Musa 'o parenta ra ananga, so'o ne: <<Toma musungu ma soi tumudingi ma ḏo-ḏogumu,✝ toma wakutu ga'a sitatapu ḏua toma musungu singi-ngiranga banyatoro,✝ gena-ge Wangere lamo'o Da-daḏusu ma laya, 11 ngowa'a Israel mo-moini ḏuanga i'a 'aḏi sapolo di'a 'aḏi talaḏi ra Ma JOU toma ngi'i ga'a Unanga ra sitantukanga,✝ Unanga gena-ge Ma Jou'ongu Madutu ga'a ngini ni silamo'o re siḏubuso. Toma 'orasa gena-ge, Ma JOU 'ai hukumu nena-ne 'i sibaca toma ngowa'a Israel manga biono, la ananga ya 'isene. 12 'Aro'o ngowa'a Israel mo-moini 'aḏi malomu: na-nau'u, we-were'a re ngowa 'olo, re ngowa'a tagi-tagi ino ga'a 'age taninga sigolona di'a ananga mo-moini 'aḏi 'isene Ma JOU 'ai hukumu gena-ge. Rema duhu so'o gena, ananga gena-ge 'aḏi madoto'o di'a silamo'o re mojongo Ma JOU, Ma Jou'ongu Madutu, Unanga gena-ge ga'a ngini silamo'o re siḏubuso, re ananga 'aḏi siḏagi tau-taunu 'Ari hukumu mo-moini nena-ne. 13 Rema duhu so'o gena-ge, ananga manga ju'uda ga'a 'aḏi waro nyangu, nyengara 'aḏi 'isene di'a ananga ḏi'i 'aḏi madoto'o di'a silamo'o re mojongo Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso. Ma di'ara ngini ni 'ahu toma tana'a gena-ge ga'a ḏuanga i'a ni tagi iwanga ḇanyo Yordan di'a na ḏegoro, ngini balasu ni si'a'a so'o gena-ge.>>

14 Gena ḏua, Ma JOU 'o kanau ra Musa ma betongo so'o ne: <<Mode-mode'e ma 'orasa ri co-cori mangale ngana ti'ara riwara no sengene. Dadi 'aro'o 'a Yosua re ngini ngamu ḏiḏi ni made-de'oso toma Suyu'u Lo-lomu ma dara, la Ngoi, Ma JOU, to sisolano unanga sa'olo 'ani nga-ngali.>> Ḏua 'a Musa re 'a Yosua, ananga ngamu ḏiḏi 'aḏi tagi made-de'oso toma Suyu'u Lo-lomu ma biono. 15 Re Ma JOU 'o masijumu 'Ai diri toma ngasu'u kakamo ma dara, re ma ngasu'u kakamo gena-ge 'i made-de'oso toma suyu'u ma ngalana ma da-daku ma biono. 16 Ma JOU 'o kanau ra Musa: <<Ngana na waro, ti'ara riwara ngana no sengene re no mamete'e 'ani ngimo-ngimono. Gena ḏua bangsa nena-ne ḏuanga i'a 'aḏi soloto Ma JOU. Ananga ma tero sa'olo ma were'a ga'a 'i dadi we-were'a su-sudala sababu ananga gena-ge 'aḏi silamo'o re siḏubuso jou'ongu ma somoara toma daeraha ga'a ananga ya tegoro. Ananga 'aḏi sisoi'i tala Ngoi re 'aḏi sitola'a 'Ari jaji ga'a Ngoi ta si'a'a ra ananga. 17 Toma 'orasa gena-ge, Ngoi, Ma JOU ḏuanga i'a To sijumu 'Ari duruta ga'a 'i lejanga ma tero sa'olo u'u; re Ngoi ḏuanga i'a to sisoi'i tala ananga re Ta'u gogono 'Ari biono singadolo Ta'u riono riwara singadolo ananga 'aḏi moini. Re ananga gena-ge 'aḏi sanga bahala ma repe re 'aḏi eta'a toma susa re sangisara. Ḏua toma 'orasa gena-ge ananga ḏuanga i'a 'aḏi kanau so'o ne: <Tero mode'e bahala 'i nga'unu ngene, sababu Ma Jou'ongu Madutu ga'a ngene wo silamo'o re siḏubuso, Unanga gena-ge 'O cua ra ngene nanga sigolona!> 18 Mada'a toma 'orasa gena-ge, Ngoi ḏuanga i'a To gogono 'Ari biono mode-mode'e singadolo To riono ananga riwara, sababu ananga manga kajahatana mo-moini: gena-ge ananga raḏi silamo'o re siḏubuso jou'ongu ma somoara.

19 Sababu gena-ge, nange-ne 'a Musa re Yoshua, ngini ni lefo ma nyanyi nena-ne re sidoto'o toma ngowa'a Israel, la ananga ya sidaioranga awa. Rema duhu gena-ge, nyanyi nena-ne 'i dadi sakisi re si'elingi 'oru ga'a Ngoi ta soma'a ngowa'a Israel, la ananga gena-ge kamanga 'alasana ua di'a mete'e 'Ari hukumu ua. 20 Sababu ti'ara ua, Ngoi ḏuanga i'a to gasa ananga toma tana'a lai rousu ga'a ri romanga reo haiwani piara re tana'a ma hasili lai repe. Gena-ge 'i dadi mete'e 'Ari jaji Ngoi reta 'a'a rema sasi di'a 'A sipula'a taminga ngimo-ngimono. Toma tana'a gena-ge, ananga ḏuanga i'a 'aḏi basono 'ahu sanangi re 'aḏi oromo singadolo ḏugala. Mada'a ananga ḏuanga i'a 'aḏi sicelolo ḏuḏunu ra Ngoi di'a 'aḏi siḏagi jou'ongu ma somoara ma mau singadolo ananga 'aḏi dawongo Ngoi riwara singadolo ananga 'aḏi sitola'a jaji ga'a Ngoi ta 'a'a ra ananga. 21 Ḏua toma 'orasa gena-ge, ananga manga ju'uda 'aḏi sanga bahala re ḏi'i susa re sangisara ma repe, nyanyi nena-ne ma demo ananga ḏuanga i'a ya 'elingi sababu ananga ya madoto'o ḏua nyanyi nena-ne. Dadi nyanyi 'i dadi bukti mangale Ngoi, Ma JOU to sihukumu ananga. Sababu kalaha nyangu moju Ngoi to gasa ananga toma tana'a di'a ananga ga'a Ngoi reto 'a'a jaji rema sasi pasala ḏua, Sababu, Ngoi reta waro manga rancana tamanga 'akala re sinyingara ma dara toma wangere nange-ne.>> 22 Dadi Musa 'o lefo nyanyi nena-ne re unanga 'a sidoto'o toma ngowa'a Israel toma wangere ma tero.

23 Ḏua, Ma JOU 'o sipula'a kuasa ra Yosua, unanga gena-ge 'a Nun 'ai ngowa'a nau'u. Re Ma JOU 'o kanau ra unanga gena-ge rema betongo so'o ne: <<Site'e ninga 'akala re sinyingara re ni dadi nau'u, sababu ngana ḏuanga i'a no sigasa ngowa'a Israel toma tana'a ga'a Ngoi to 'a'a jaji rema sasi di'a 'A sipula'a ra ananga, re Ngoi ḏuanga i'a To sieanga i'a ngana ua.>>

24 Wakutu Ma JOU 'ai hukumu ma demo mo-moini gena-ge 'a Musa 'a lefo togumu ḏua toma boku rimoi, 25 unanga gena-ge 'o parenta toma ngowa-ngowa'a suku Lewi ga'a 'aḏi tede Ma JOU 'ai burua jaji, unanga 'o kanau rema betongo so'o ne: 26 <<'Oro ino Ma JOU 'ai boku hukumu nena-ne re ya sigare ra Ma JOU 'ai burua jaji ma gagoro, Unanga gena-ge Ma Jou'ongu Madutu ga'a ngini ni silamo'o re siḏubuso.>> Gena ḏua, 'a Musa 'o celelo toma ngowa'a Israel re 'o kanau so'o ne: <<Boku gena-ge 'age sa'olo sakisi di'a si'elingi ngini mangale Ma JOU 'ai hukumu. 27 Sababu ngoi, 'a Musa, reto waro ninga sae'e lai te'e re tukanga ma lawana. Mada'a nange-ne, wakutu ngoi to 'ahu moju ra ngini ninga sigolona, ngini reni sijumu ngini sa'olo tukanga ma lawana ra Ma JOU! Tantu ḏua ngini ḏuanga i'a ni si'a'a ga'a ma lawana tau-taunu ra Ma JOU wakutu ngoi to sengene palisi'i i'a!>> 28 Gena ḏua, 'a Musa 'o kanau toma ngowa'a suku Lewi gena-ge rema betongo so'o ne: <<Soma'a ninga suku-suku ma bi-biri'i mo-moini re ninga pagawe mo-moini, ananga gena-ge 'aḏi malomu tari biono, la ngoi mau to siajele hali-hali nena-ne ra ananga re diwanga re tana'a 'i dadi sakisi mangale ananga ḏuanga i'a 'aḏi waro 'oru balasu ya siḏagi. 29 Sababu ngoi reto waro mangale wakutu ngoi to sengene palisi'i i'a, ngini ninga de'oso re ḏegoro, demo re ganau, enanga gena-ge 'i cira madutu re ni mete'e riwara 'ahu ma ngo'omo ga'a ngoi to parenta ra ngini. Sababu gena-ge toma 'orasa ma biono i'a 'o bahala ḏuanga i'a 'i nga'unu ngini, sababu ngini ḏuanga i'a 'a'a 'ori i'a ma jira ra Ma JOU 'ai momina singadolo 'ori i'a gena-ge 'i si'a'a Unanga 'o dadi ruta madutu sababu ngini ninga 'ahu.>>

30 Gena ḏua, 'a Musa 'o singadolo nyanyi gena-ge ti-tiai toma ngowa'a Israel ga'a 'aḏi malomu tai biono, ananga ya 'isene singadolo 'ai demo ma ḏo-ḏogumu.