1 Nena-ne demo-demo toma jaji ga'a Ma JOU 'o soma'a 'a Musa 'o singadolo toma ngowa'a Israel wakutu ananga 'age toma tana'a Moab moju. Jaji gena-ge ma dogo toma jaji ga'a Ma JOU 'o 'a'a toma ngowa'a Israel toma kie Horeb.

2 'A Musa 'o soma'a ngowa'a Israel 'aḏi malomu, re unanga 'o kanau ra ananga gena-ge ma betongo so'o ne: <<Ngini rena oḏi'i reninga la'o masiretene 'oru ga'a Ma JOU 'o si'a'a mo-moini toma 'olana Firaun re 'ai pagawe re toma ngowa'a Mesir mo-moini: 3 'ori i'a gena-ge ga'a bahala-bahala lamo'o, re ga'a 'i hera-heranga ga'a lamo'o re didina'o-didina'o heranga. 4 Mada'a singadolo nange-ne Ma JOU 'o simaha ua ngini ni sahe maksudu di'a 'oru ga'a ngini na oḏi'i reninga la'o masiretene bolo 'isene reninga ngau'u. 5 Ma di'ara musungu nyagi rata, Ngoi to sibi-biri'i ngini toma ḏo-ḏagi ma dara mete'e daeraha baulaco; mada'a ninga baju 'i 'acingi mai ua taninga lese, re ninga tarupa 'i tola'a mai ua taninga rou. 6 Ngini kama oromo roti mai ua, ka'e 'anggur ga'a 'etolo mai ua bolo ngo-ngo'e ga'a 'etolo, la ngini ni waro mangale Ngoi nena-ne Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso. 7 Wakutu ngini reni ngadolo toma ngi'i nena-ne, ma 'olana Hesybon, 'a Sihon, re 'olana Basan, 'a 'Og ananga 'aḏi supu parangi ngene, mada'a ngene wa'u sita'aloko. 8 Ngene wo rabasa manga daeraha re wa sipula'a toma suku Ruben, suku Gad, re suku Manasye ma jule sa'olo ananga gena-ge manga warisi. 9 Sababu gena-ge, ngini balasu ni siḏagi mode-mode'e demo-demo toma jaji nena-ne. Rema duhu gena-ge, ngini ḏuanga i'a ni sanga 'utungu toma 'oru ḇato ga'a ngini na si'a'a.

10 Wangere nange-ne ngini mo-moini ni made-de'oso talaḏi ra Ma JOU, Ma Jou'ongu Madutu ga'a ngini ni silamo'o re siḏubuso: gena-ge ninga suku-suku ma sae'e, ninga bi-biri'i re ninga pagawe, re ngowa'a Israel ma na-nau'u mo-moini, 11 ninga ngowa-ngowa'a, ninga were'a—were'a re ngowa'a tagi-tagi ino taninga suyu'u ma daeraha, re ḏi'i tukanga taga-taga ate re tukanga sia-siala ḇanyo taninga sigolona, 12 la ngini ni 'a'a jaji di'a siḏagi mo-moini ra Ma JOU 'ai jaji ma dara ga'a 'A si'a'a rema sasi ra ngini toma wangere nange-ne, Unanga gena-ge Ma Jou'ongu Madutu ga'a ngini ni silamo'o re siḏubuso, 13 la Unanga 'o sitatapu ngini ni dadi Unanga 'ai 'umata toma wangere nange-ne, ḏi'i Unanga 'o dadi Ma Jou'ongu Madutu ga'a ngini ni silamo'o re siḏubuso. Enanga gena-ge mete'e jaji ga'a Unanga 'a si'a'a ra ngini re Unanga Ro masisasi taninga ngimo-ngimono: gena-ge 'a Abraham, Ishak re Yakub. 14 Ma JOU 'o 'a'a jaji rema sasi gena-ge, pa'i ra ngini ḇato ua, 15 mada'a toma ngowa'a mo-moini ga'a 'ane-ne toma wangere nange-ne mamete'e ra ngene, ga'a made-de'oso ra Ma JOU 'ai momina, Unanga gena-ge Ma Jou'ongu Madutu ga'a ngene wo silamo'o re siḏubuso, re ḏi'i ra guna ḇato ga'a dadi ninga ju'uda toma 'orasa biono i'a.

16 'A Musa 'o kanau moju toma ngowa'a Israel ma betongo so'o ne: <<Ngini nena-ne reni 'elingi ma duhu sa'olo wakutu ngene wo tegoro toma Mesir re ma duhu sa'olo ngene wo basono wakutu wo tola'a i'a toma tana'a bangsa mo-moini manga sigolona. 17 Re tamanga sigolona, ngini rena oḏi'i ngowa'a mo-moini gena-ge manga jou'ongu ma somoara ma dulada ga'a Ma JOU 'a emo-emono. Enanga gena-ge ngowa'a ya si'a'a reo ate, maḏi, salaka re guraci. 18 Sababu gena-ge, awa toma wangere nange-ne, taninga sigolona 'age na-nau'u bolo we-were'a, bolo ninga rera bolo ninga suku ga'a manga 'akala re sinyingara 'i masoloto ra Ma JOU, Unanga gena-ge Ma Jou'ongu Madutu ga'a ngene wo silamo'o re siḏubuso, di'a ananga gena-ge 'aḏi siḏagi bangsa-bangsa gena-ge manga jou'ongu ma somoara ma mau. Na'o taninga sigolona 'age ngowa'a matengo i'a ga'a 'o 'a'a so'o gena, ngowa'a gena-ge ma tero sa'olo ate ma utu'u ma sowo'o ga'a ma racimi re mamaḏi. 19 Mada'a na'o ngowa'a matengo gena-ge wakutu 'o 'isene jaji gena-ge rema sasi, unanga 'o sibarakati 'ai diri masiretene re 'o ta'ajiri tai 'akala re sinyingara ma dara so'o ne: <Kalaha ngoi 'ari 'ahu 'i mete'e 'ari 'akala re sinyingara ga'a 'i te'e, ngoi ḏuanga i'a to salamata.> Mada'a duhu gena-ge ma hasili so'o ne: ngini mo-moini ḏuanga i'a ni iranga toma tana'a gena-ge: bae ngowa'a baraḏosa bolo ngowa'a baraḏosa ua. Gena-ge ma tero sa'olo ma tana'a 'i siiranga: bae rema ḇanyo bolo kama ḇanyo ua. 20 Dadi Ma JOU ḏuanga i'a 'o singi-ngiranga ua ngowa'a matengo 'ai ḏosa gena-ge. Siḏibo ḏi'i, Ma JOU ḏuanga i'a 'O sijumu 'Ari duruta ga'a 'i lejanga ma tero sa'olo u'u ra unanga ga'a 'o siḏagi jou'ongu ma somoara ma mau. Re hukumana mo-moini ga'a 'i silefo toma boku gena-ge, enanga 'i singe-ngeta'a ra unanga gena-ge re Ma JOU ḏuanga i'a 'o siiranga ngowa'a gena-ge 'ai lomanga toma dungia ma dara. 21 Ma JOU ḏuanga i'a 'o siwo-wola i'a ngowa'a gena-ge toma suku Israel, la unanga 'o sanga bahala, mete'e hukumana ra Ma JOU 'ai jaji ga'a 'i silefo toma boku Hukumu gena-ge. 22 Dadi ju'uda toma biono i'a, gena-ge ninga ngowa-ngowa'a ga'a tuu'u ra ngini, re ngowa'a tagi-tagi ino ga'a 'aḏi sapolo toma giḏanga, ananga ḏuanga i'a 'aḏi kanau sababu ananga oḏi'i bahala re si-siḏi ga'a Ma JOU 'o singa'unu toma tana'a gena-ge: 23 tana'a mo-moini ga'a ri ro'u reo beleranga re g̱asi, ga'a ngowa'a 'aḏi siare gisisi yoḏu'u, 'ori i'a ua nyengara 'i sikonyo re ma joro-joro 'i cua. Tana'a gena-ge 'i dadi ma tero limau Sodom re Gomora, limau Adma re Zeboim toma 'orasa Ma JOU 'o siro'u limau gena-ge ḏi'i sababu 'Ai duruta 'i lejanga ma tero sa'olo u'u. 24 Gena ḏua, bangsa mo-moini ḏuanga i'a 'aḏi kanau so'o ne: <I'a sa'olo Ma JOU 'o 'a'a so'o gena-ge toma tana'a nena-ne? I'a sa'olo Ma JOU 'ai duruta lai siḏi?> 25 Dadi ngowa'a ḏuanga i'a ya sangoro so'o ne: <Sababu ngowa'a Israel gena-ge 'aḏi siḏagi ua Ma JOU 'ai jaji, Unanga gena-ge Ma Jou'ongu Madutu ga'a ananga manga ngimo-ngimono 'aḏi silamo'o re siḏubuso, ga'a Ma JOU 'o 'a'a jaji ra ananga wakutu Unanga ya'u sigasa sisupu toma tana'a Mesir, 26 re ananga gena-ge raḏi siḏagi jou'ongu ma somoara ma mau re silamo'o re siḏubuso enanga gena-ge ga'a ananga ya nana'o ua re Ma JOU 'o simaha ua ananga 'aḏi silamo'o re siḏubuso enanga gena-ge. 27 Sababu gena-ge, Ma JOU 'ai duruta 'i lejanga ma tero sa'olo u'u tamanga tana'a nena-ne mete'e hukumana ra Ma JOU 'ai jaji ga'a 'i silefo ra Unanga 'ai boku Hukumu gena-ge 28 singadolo Ma JOU 'o sisupu ananga tamanga tana'a ma tero sa'olo ngowa'a guḏa 'aḏi wuru'u rurubu singadolo ma utu'u toma tana'a ma dara sababu 'Ai duruta lai siḏi, re siupa'a ananga toma daeraha lelegu, ma tero ga'a ngene wo oḏi'i toma 'orasa nange-ne.>

29 'A Musa 'o kanau moju toma ngowa'a Israel rema betongo so'o ne: <<'Oru ḇato ga'a 'i gogono, enanga gena-ge di'a Ma JOU, Ma Jou'ongu Madutu ga'a ngene wo silamo'o re siḏubuso, mada'a 'oru ḇato ga'a 'i sisupu, enanga gena-ge di'a ngene re nanga ju'uda kasingado-ngadolo i'a, la ngene wo siḏagi Ma JOU 'ai Hukumu ma demo mo-moini.>>