1 Na'o ngowa'a Israel nga muḏiḏi i'a 'aḏi ma'u lawana, ḏua ananga 'aḏi tagi toma juruhakimi ma ngi'i, re juruhakimi-juruhakimi 'aḏi singeta'a putusanga toma ngowa'a Israel gena-ge nga muḏiḏi: 'a guna kama sala ua re 'a guna sanga hukumu, 2 Na'o ngowa'a matengo gena-ge ga'a sanga hukumu, unanga 'o patasa sanga ca'olo, ma juruhakimi 'o soma'a unanga 'o mapagara 'ai biono ngadolo toma tana'a re soma'a ngowa'a ca'olo unanga toma juruhakimi ma biono re sanga ca'olo ma repe mete'e 'ai kajahatana masiretene. 3 Ngowa'a gena-ge nyengara sanga ca'olo soi nyagi rata, mada'a awa pai'i; sababu na'o 'o sanga ca'olo lebe repe i'a, unanga ngowa-ngowa'a Israel 'u sipa-pake ua tamanga momina, 4 Sapi ga'a sipake ruju gandum, awa na sao ma madanga.✝ *

5 <<Na'o rema ngowa'a gia nongoḏu ga'a tegoro wala ḏu moi re matengo i'a 'o sengene kama sanga ngowa'a nau'u ua, dadi ma balo gena-ge awa mo molo'ara ngowa'a toma rera lelegu; 'ami geri masiretene balasu mi 'oro balo gena-ge di'a sidadi 'ai were'a re siḏagi ma geri ma haku. 6 Ḏuanga i'a na'o ananga gena-ge 'aḏi sanga ngowa'a nau'u ma jomolo re na-nau'u gena-ge balasu sanga lomanga toma geri ga'a 'o sengene ḏua re dadi unanga gena-ge 'ai ngowa'a nau'u, la lomanga gena-ge 'i iranga ua toma ngowa'a Israel manga sigolona. 7 Mada'a na'o geri gena-ge unanga 'o oḏu'u 'oro geri ro sengene unanga 'ai balo, ḏua munanga balasu mo tagi toma ngalana lamo'o talaḏi ngowa'a bi-biri'i—bi-biri'i re mo kanau: <'Ari geri 'o oḏu'u sitede 'ari geri 'ai lomanga toma ngowa'a Israel manga sigolona, unanga 'o oḏu'u siḏagi ma geri ma haku.> 8 Gena ḏua, limau ma ngowa'a bi-biri'i—bi-biri'i balasu 'aḏi 'aro'o geri gena-ge re kanau ra unanga. Na'o unanga tatapu ma tahana re 'o kanau so'o ne: <<Ngoi to oḏu'u 'oro munanga sidadi 'ari were'a.>> 9 Dadi 'ai geri ma were'a gena-ge balasu maco-cori ra unanga sitalaḏi toma ngowa'a bi-biri'i—bi-biri'i manga biono, re munanga mo woi'i 'ai tarupa tai rou ma kuwiḏa, mo obi'i 'ai biono di'a mo sipula'a mara'a ra unanga re mo sangoro so'o ne: <<So'o gena-ge 'i dadi toma ngowa'a ga'a riono oḏu'u geri 'ai lomanga rema enanga. 10 Re geri gena-ge 'ai rera ma lomanga balasu 'i terongo toma ngowa'a Israel manga sigolona so'o ne: <Rera ga'a unanga 'ai tarupa 'i woi'i.>

11 Na'o ngowa'a nga muḏiḏi ma'u tutu'u manga were'a matengo sapolo maco-cori di'a riono 'ami nau'u toma ngowa'a ga'a tutu'u 'ami nau'u, re were'a gena-ge ma toa'a 'ami giama re mo gu'u siduga ngowa'a gena-ge 'ai dalaḏi, 12 Dadi ngini balasu ni tola'a were'a gena-ge 'ami giama. Awa ni basono dadalara toma were'a gena-ge.>>

13 <<Awa taninga tohe ma dara rema maḏi kilo fara ḏiḏi, ma la-lamo'o re ma ce-ceka'a. * 14 Awa taninga wala ma dara, 'age rema du-duga fara ḏiḏi, ma la-lamo'o re ma je-jeka'a.* 15 Ngini balasu ni sikilo rema maḏi kilo ga'a tero-tero, re ngini balasu ni situga rema du-duga ga'a tero-tero - la ninga 'umuru kiḏanga toma tana'a ga'a Ma JOU ḏuanga i'a 'A pula'a ra ngini. Unanga gena-ge Ma Jou'ongu Madutu ga'a ngini ni silamo'o re siḏubuso. 16 Sababu, 'a guna ḇato ga'a 'akala boloto ua, ngowa'a gena-ge Ma JOU 'u emo-emono, Unanga gena-ge Ma Jou'ongu Madutu ga'a ni silamo'o re siḏubuso.>>

17 <<'Elingi 'oru ga'a ngowa'a Amalek 'aḏi 'a'a ra ngini ninga ete re dotumu tamanga ḏo-ḏagi ma dara wakutu 'aḏi supu sisoi'i tala Mesir. 18 Ananga 'aḏi mojongo ua Ma Jou'ongu Madutu. Dadi ananga 'aḏi parangi ra ngini ninga ete re dotumu toma ngo'omo ma dara wakutu ananga mo-moini lamahana re ananga 'aḏi sisengene ananga toma ḏuḏunu ga'a momoro re te'e ua. 19 Sababu gena-ge, wakutu Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ro si'a'a ngini ogoro taninga lawana ga'a 'aḏi sigoloḏi ngini toma tana'a ga'a Ma JOU ḏuanga i'a 'A pula'a ra ngini di'a ninga warisi re na ḏegoro, Unanga gena-ge Ma Jou'ongu Madutu ga'a ngini ni silamo'o re siḏubuso, ngini balasu ni singi-ngiranga ngowa'a Amalek mo-moini, la matengo i'a mai ua 'o 'elingi riwara 'age ngowa'a Amalek toma dungia ma dara. Awa ni sidaioranga gena-ge.>>