1 'A Musa 'o kanau toma ngowa-ngowa'a Israel rema betongo so'o ne: <<Na'o ngowa'a nau'u matengo 'o 'oro we-were'a matengo sidadi 'ai were'a, re togumu i'a munanga unanga nimi nyafusu riwara, sababu munanga mo sipula'a mara'a unanga. Gena ḏua unanga 'o lefo surata to-tola'a re 'o pula'a ra munanga, kara 'o soma'a munanga mo supu tai wala 2 re na'o were'a gena-ge mo supu tai wala mo tagi i'a da'a, ḏua mo dadi ngowa'a Israel lelegu manga were'a, 3 re na'o na-nau'u matengo ḏi'i 'o dadalara riwara ra munanga, ḏua 'o lefo surata to-tola'a re 'o pula'a toma were'a gena-ge kara 'o soma'a munanga mo supu tai wala, bolo na-nau'u ma soi ḏiḏi ga'a 'oro munanga sidadi 'ai were'a gena-ge, unanga gena-ge 'o sengene, 4 dadi mi nau'u ma mulaingi, ga'a soma'a munanga mo supu ḏua, dadunu 'oro munanga moju yoḏu'u sa'olo 'ai were'a sababu munanga mo otu malomu reo nau'u lelegu re ḏi'i hali gena-ge Ma JOU 'a emo-emono. Awa ngini ni sinajis daeraha sababu ninga ḏosa gena-ge, daeraha ga'a Ma JOU ḏuanga i'a 'A pula'a ra ngini di'a dadi ninga warisi. Unanga gena-ge Ma Jou'ongu Madutu ga'a ngini ni silamo'o re siḏubuso.

5 Na'o ngowa'a nau'u matengo unanga aro 'oro 'ai were'a, awa unanga 'o tagi parangi mamete'e reo sordado, bolo sipula'a munara rimoi di'a rayata. Ma di'ara musungu rimoi unanga balasu bebasa di'a urusu 'ai ngitu re ngale, la 'o sisanangi were'a ga'a unanga aro 'oro sa'olo 'ai were'a.>>

6 'A Musa 'o kanau moju toma ngowa-ngowa'a Israel ma betongo so'o ne: <<Awa no 'oro maḏi gulinga bolo maḏi gulinga toma re'u, sa'olo gade, sababu na'o ni 'a'a so'o gena-ge ngini ni 'oro sa'olo gade ma duhu di'a ngowa'a gena-ge 'aḏi 'a'a roti. 7 Na'o ngowa'a matengo, ngowa'a 'u sanga i'a unanga 'o tori'i manga ioronongoḏu matengo i'a, toma ngowa'a Israel, re 'o 'a'a unanga sa'olo budaka re wu'unu unanga. Dadi ngowa'a ga'a tori'i gena-ge unanga ngini balasu 'u sisengene. Dadi ngana balasu singi-ngiranga 'ori i'a ma jira taninga sigolona. 8 Ma 'istiari ino toma si-siḏi eno'o re siḏagi tero-tero 'oru ga'a 'imam-'imam ngowa'a suku Lewi 'aḏi doto'o ra ngini. 'Oru ga'a ngoi Musa ta parenta ra ngini balasu ngini na siḏagi mode-mode'e. 9 'Elingi 'oru ga'a Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'o si'a'a ra ngo Miryam wakutu ngene toma ḏo-ḏagi ma dara supu toma Mesir ino.

10 Na'o ngini ni sibau 'ori i'a rimoi tani ḏagilomu, awa ni osama tai wala di'a ni 'oro pakeanga sa'olo ninga gade ra unanga. 11 Ngini balasu ni made-de'oso toma ḏuḏunu, re ngowa'a ga'a ngini ni sibau gena-ge unanga balasu 'o gasa ma gade gena-ge 'i sisupu. 12 Na'o unanga ngowa'a ma dinga'unu ua, awa 'o otu reo pakeanga ga'a 'ai gade; 13 Siḏibo ma 'ori i'a 'ai gade gena-ge ra unanga toma 'orasa wangere soḏu ma jelele i'a, la unanga otu nyengara reo pake 'ai pakeanga masiretene re 'o sibarakati ngini. Dadi ngini ḏuanga i'a ni dadi banari ra Ma JOU 'ai momina. 14 Awa ni sito'u-to'u ngowa'a ma dinga'unu ua re sangisara, ga'a munara wange moi-wange moi: bae unanga gena-ge ngowa'a Israel, bae ngowa'a tagi-tagi ino taninga daeraha ma limau ma dara. 15 Toma wangere gena-ge ḏua, ngini balasu pula'a 'ai ngogele wakutu wangere soḏu nyangu; unanga 'o masinganono sababu unanga ngowa'a ma dinga'unu ua; la awa singadolo 'o maḏigaro'o ra Ma JOU mangale ngini, la awa singadolo ngini ni baraḏosa. 16 Awa ḇaḇa matengo sanga hukumu sengene ma sababu 'ai ngowa'a. Ngowa'a matengo re matengo balasu sanga hukumu sengene ma sababu ḏosa masiretene. 17 Awa ngini gena-ge ni 'a'a putusanga kama 'adili ua di'a ngowa'a tagi-tagi ino re ngowa'a daga; re ḏi'i awa no 'oro balo matengo 'ami baju sa'olo 'ami gade. 18 Ngini balasu ni 'elingi, mangale ma siḏa ngini ni dadi budaka toma Mesir re Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'o tuusu ngini da'a ino. Sababu gena-ge, ngoi, Musa tini parenta ni si'a'a hali so'o ne:

19 Na'o ngini ni 'utu'u ninga guḏa ma hasili, ḏua no sidaioranga 'oki moi toma guḏa ma dara, dadi awa ni ḏibo i'a na 'oro. Gena-ge di'a ngowa'a tagi-tagi ino, ngowa'a daga re balo manga balangu, la Ma JOU ni sibarakati ngini ninga munara mo-moini 'oru ḇato, Unanga gena-ge Ma Jou'ongu Madutu ga'a ngini ni silamo'o re siḏubuso. 20 Na'o ngini ni 'utu'u 'ani zaitun ma hasili re ngini pa'i na sica'o-ca'olo uma-umanga soi moi ḇato, awa ni disa sowo'o toma uma-umanga soi moi moju. Gena-ge di'a ngowa'a tagi-tagi ino, ngowa'a daga re balo manga balangu. 21 Na'o ngini ni lomu 'ani guḏa 'anggur ma hasili, awa dadunu na 'utu'u soi moi moju. Gena-ge di'a ngowa'a tagi-tagi ino, ngowa'a daga re balo manga balangu. 22 Ngini balasu ni 'elingi, mangale ma siḏa ngini ḏi'i ni dadi budaka toma tana'a Mesir. Ma sababu gena, ngoi, Musa to parenta ngini na si'a'a nena-ne.>>