1 'A Musa re Israel manga bi-biri'i ananga gena-ge 'aḏi parenta toma bangsa Israel rema betongo so'o ne: <<Ngini balasu ni siḏagi mo-moini toma parenta rimoi ma dara ga'a ngoi, Musa, ta singadolo ra ngini wangere nange-ne. 2 Re toma wangere ngini ḏuanga ni iwanga ḇanyo Yordan re ni tagi toma tana'a ga'a Ma JOU ḏuanga i'a Ra pula'a ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso, ngini balasu ni side'oso maḏi-maḏi lamo'o, re na lape reo dufahe buḏo. 3 Wakutu ngini reni iwanga palisi'i ḇanyo Yordan di'a ngini ni osama toma tana'a ga'a Ma JOU, Unanga gena-ge Ma Jou'ongu Madutu ḏuanga i'a 'A pula'a ra ngini, tana'a lai rousu ga'a ri romanga reo haiwani piara re tana'a ma hasili lai repe, tana'a gena-ge ga'a Ma JOU, Unanga gena-ge Ma Jou'ongu Madutu ga'a ninga ngimo-ngimono 'aḏi silamo'o re siḏubuso, Unanga gena-ge ro 'a'a jaji pasala ḏua ra ngini; ngini balasu ni lefo demo-demo ra Ma JOU 'ai Hukumu rimoi gena-ge toma maḏi gena-ge. 4 Re wakutu ngini ni iwanga ḇanyo Yordan palisi'i i'a, ngini balasu ni side'oso maḏi-maḏi gena-ge toma kie Ebal re na si'ese reo dufahe buḏo, ma tero sa'olo ga'a Ngoi reto parenta ra ngini toma wangere nange-ne. 5 Re ḏi'i toma ngi'i gena-ge ngini balasu ni 'a'a jou-jou tau'u ma ngi'i di'a Ma JOU, Unanga gena-ge Ma Jou'ongu Madutu ga'a ngini silamo'o re siḏubuso. Jou-jou tau'u ma ngi'i rimoi gena-ge 'i si'a'a yoḏu'u reo maḏi ga'a ngowa'a ya sipake pakakasa ḇesi. 6 Toma maḏi ga'a sonoto'o ua ngini balasu na side'oso jou-jou tau'u ma ngi'i gena-ge di'a Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso. Re toma re'u ngini balasu sigare ninga jou-jou tau'u di'a Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso. 7 Re ḏi'i ngini balasu ni gasa ninga jou-jou sababu ni dadunu dadi marimoi moju ra Ma JOU, re ngini ni oromo toma ngi'i gena-ge re ni maroanga ra Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'ai momina. 8 Re Ma JOU 'ai Hukumu rimoi nena-ne, ngini balasu na lefo lebe tarangi i'a toma maḏi gena-ge, la ngowa'a ya baca caiti.>>

9 'A Musa re 'imam-'imam ngowa'a Lewi, ananga gena-ge 'aḏi kanau toma ngowa'a Israel mo-moini rema betongo so'o ne: <<Hei ngowa'a Israel, ngini ni masiogoro re ni 'isene. Toma wangere nange-ne ngini reni dadi Ma JOU 'ai 'umata, Unanga gena-ge Ma Jou'ongu Madutu ga'a ngini ni silamo'o re siḏubuso. 10 Sababu gena-ge, ngini balasu ni mete'e Ma JOU 'ai iḏingi, Unanga gena-ge Ma Jou'ongu Madutu ga'a ngini silamo'o re siḏubuso, re ngini ni siḏagi huku-hukumu re 'atoranga-'atoranga ga'a ngoi, Musa ta singadolo ra ngini wangere nange-ne.>>

11 Toma wangere gena-ge 'a Musa 'o pula'a parenta toma ngowa'a Israel ma betongo so'o ne: 12 << Toma wakutu ngini reni iwanga ḇanyo Yordan re ngadolo da'a kaci moi, dadi ananga nena-ne ga'a 'aḏi made-de'oso toma kie Gerizim di'a 'isene ma duhu sa'olo Ma JOU ḏuanga i'a 'O sibarakati bangsa Israel: gena-ge suku Simeon, Lewi, Yehuda, Isakhar, Yusuf re Benyamin. 13 Re ananga nena-ne ga'a balasu ma de-de'oso toma kie Ebal di'a 'isene ma duhu sa'olo Ma JOU ḏuanga i'a 'o singe-ngeta'a hukumana toma bangsa Israel: gena-ge suku Ruben, Gad, Asyer, Zebulon, Dan re Naftali. 14 Ḏua ngowa-ngowa'a Lewi balasu mulaingi 'aḏi kanau siduga-duga toma ngowa'a Israel:

15 << <Ma JOU ḏuanga i'a 'o sihukumu ngowa'a matengo i'a ga'a 'o 'a'a dulada di'a jou'ongu ma somoara: bae 'o sonoto'o ate bae 'o si'a'a reo ḇesi. Enanga gena-ge Ma JOU 'a emo-emono ga'a tukanga gabara matengo i'a ga'a 'a'a, re 'a side'oso go-gogono.> Re suku Israel mo-moini, ananga gena-ge balasu 'aḏi sangoro: <'Amin!>

16 << <Ma JOU ḏuanga i'a 'o sihukumu ngowa'a ga'a 'aḏi sipa-pake ua ḇaḇa re ngina. Re suku Israel mo-moini, ananga gena-ge balasu 'aḏi sangoro: <'Amin!>

17 << <Ma JOU ḏuanga i'a 'o sihukumu ngowa'a matengo i'a ga'a sijujuru ngowa'a Israel ma lelegu manga tana'a ma bati. Re suku Israel mo-moini, ananga gena-ge balasu 'aḏi sangoro: <'Amin!>

18 << <Ma JOU ḏuanga i'a 'o sihukumu ngowa'a matengo i'a 'o si'a'a ngowa'a hafu matengo i'a 'o mete'e ngo'omo ma rapu. Re suku Israel mo-moini, ananga gena-ge balasu 'aḏi sangoro: < 'Amin!>

19 << <Ma JOU ḏuanga i'a 'o sihukumu ngowa'a matengo i'a ga'a 'o si'a'a 'ori i'a ga'a 'adili ua toma ngowa'a tagi-tagi ino, ngowa'a daga re balo. Re suku Israel mo-moini, ananga gena-ge balasu 'aḏi sangoro: <'Amin!>

20 << <Ma JOU ḏuanga i'a 'o sihukumu ngowa'a matengo i'a ga'a 'o dongotu 'ai ngina bau, sababu gena-ge unanga 'o sipula'a mara'a tai ḇaḇa sababu ḇaḇa 'ai were'a unanga masiretene 'ai hak.✝ Re suku Israel mo-moini, ananga gena-ge balasu 'aḏi sangoro: <'Amin!>

21 << <Ma JOU ḏuanga i'a 'o sihukumu ngowa'a matengo i'a ga'a 'o be-bere toma haiwani 'oru ḇato.✝ Re suku Israel mo-moini, ananga gena-ge balasu 'aḏi sangoro: <'Amin!>

22 Ma JOU ḏuanga i'a 'o sihukumu ngowa'a matengo i'a ga'a 'o dongotu 'ai biḏanga, bae ma ḇaḇa bau 'ai ngowa'a were'a bae ma ngina bau 'ami ngowa'a were'a. Re suku Israel mo-moini, ananga gena-ge balasu 'aḏi sangoro: <'Amin!>

23 << <Ma JOU ḏuanga i'a 'o sihukumu ngowa'a matengo i'a ga'a 'o dongotu 'ai dunungu. Re suku Israel mo-moini, ananga gena-ge balasu 'aḏi sangoro: <'Amin!>

24 Ma JOU ḏuanga i'a 'o sihukumu ngowa'a Israel matengo i'a ga'a 'o sisengene ngowa'a lelegu sigo-gogono. Re suku Israel mo-moini, ananga gena-ge balasu 'aḏi sangoro: <'Amin!>

25 Ma JOU ḏuanga i'a 'o sihukumu ngowa'a matengo i'a ga'a 'o dawongo pipisi sepa di'a sisengene ngowa'a matengo kai sala ua. Re suku Israel mo-moini, ananga gena-ge balasu 'aḏi sangoro: <'Amin!>

26 << <Ma JOU ḏuanga i'a 'o sihukumu ngowa'a matengo i'a ga'a 'o siḏagi Ma JOU 'ai Hukumu nena-ne tai 'ahu ma duhu. Re suku Israel mo-moini, ananga gena-ge balasu 'aḏi sangoro: <'Amin!> >>