1 Gena ḏua, 'a Musa 'o tagi sisoi'i tana'a Moab ga'a 'i rata re 'o pere ie toma Pisga ma tubu, toma kie Nebo toma limau Yerikho ma kaci moi. Toma ngi'i gena-ge, Ma JOU 'O sijumu daeraha Kanaan gena-ge mo-moini ra Musa: gena-ge daeraha Gilead singadolo limau Dan papolo kore mie, 2 gena-ge: daeraha suku Naftali mo-moini, suku Efraim re Manasye manga daeraha, daeraha suku Yehuda mo-moini singadolo ngoloto papolo wangere ma soḏu, 3 daeraha Negeb, rema balangu papolo kore sara re tana'a ga'a 'i rata toma picaru Yordan toma limau Yerikho, limau gena-ge korma ma ngi'i, singadolo toma limau Zoar. 4 Re Ma JOU 'o kanau ḏi'i ra Musa, <<Nena-ne daeraha ga'a To 'a'a jaji rema sasi ra Abraham, Ishak, re Yakub rema betongo so'o ne: < Ngoi ḏuanga i'a To pula'a daeraha gena-ge singadolo tamanga ju'uda tala.> Ngoi to simaha ngana na oḏi'i rani la'o masiretene, mada'a ngana na ngadolo yoḏu'u.>>✝

5 Dadi 'a Musa, Ma JOU 'Ai falalomu, unanga gena-ge 'o sengene, toma tana'a Moab ma tero Ma JOU 'o kanau ḏua. 6 'A Musa sanga otomo toma picaru rimoi toma tana'a Moab, talaḏi Bet-Peor. Mada'a matengo i'a mai ua 'o waro unanga 'ai kubu ma ngi'i singadolo wangere nange-ne. 7 'A Musa 'ai 'umuru musungu latu moi nyagi romoḏiḏi wakutu 'o sengene. Unanga 'ai la'o 'i hafu nyangu re 'ai de-de'e 'i iranga nyangu. 8 Ngowa'a Israel 'aḏi rerese ma gaḏi 'a Musa toma Moab ma tana'a ga'a 'i rata, ma di'ara wangere nyagi ro'ange. Gena ḏua, rerese ma gaḏi ma 'orasa 'i togumu di'a Musa.

9 Toma 'orasa 'a Musa 'o sengene nyangu moju, 'a Musa 'o siteru 'ai giama ra Yosua, unanga gena-ge 'a Nun 'ai ngowa'a nau'u, di'a sitede unanga sa'olo 'ai nga-ngali.* Sababu gena, Ma JOU 'o siromanga 'a Yosua reo roh ma 'akala soro'unu. Dadi ngowa'a Israel 'aḏi mete'e Yosua 'ai iḏingi re 'aḏi siḏagi parenta ga'a Ma JOU ra sipula'a ra Musa.

10 Ma ḏo-ḏogumu, nabi matengo i'a mai riwara ga'a 'age toma bangsa Israel ma sigolona ma tero sa'olo 'a Musa, unanga gena-ge Ma JOU ru kanau ma'u talaḏi, 11 re nabi matengo i'a mai ua ma tero 'a Musa sababu Ma JOU 'o 'utusu unanga di'a 'o 'a'a didina'o heranga re ga'a 'i hera-heranga mo-moini toma tana'a Mesir:✝ bae toma Firaun re 'ai pagawe bolo toma ngowa-ngowa'a toma tana'a Mesir mo-moini ḏi'i, 12 re sababu 'a Musa 'ai kuasa ma la-lamo'o i'a di'a si'a'a ga'a ma pari cua toma bangsa Israel mo-moini manga momina singadolo ananga gena-ge 'aḏi dadi mojongo madutu.