Marcos 6

Yesus 'o pula’a oromo ngowa’a nga cala romotoa pai’i

30 So’o 'au nange, Yesus 'o cumutu 'Ai so-soma’a 'aḏi tagi singadolo Habari Roanga. Pasala i’a, ananga 'aḏi maḏibo moju re 'aḏi malomu ra Yesus. Ananga ya siajele mangale ananga ya si’a’a re 'aḏi doto’o ngowa-ngowa’a mangale Habari Roanga. 31 Yesus re 'Ai me-mete’e 'aḏi de-de’oso ngowa’a repe 'aḏi tagi ḏibo ra ananga singadolo 'aḏi oromo mai sa’i yoḏu’u sababu 'aḏi sanga donga ua. Sababu gena-ge, Yesus 'o kanau i’a tai me-mete’e, "Ino, ngene wo masai’i toma ngi’i ga-garura, la ngini nga’unu ni mangomasa ceka’a ua." 32 Ḏua Yesus re 'Ai me-mete’e 'aḏi mabalene toma oti re 'aḏi sidete toma ngi’i ga-garura.

33 Mada’a ngowa’a repe 'aḏi oḏi’i re ya’u waro Yesus re 'Ai me-mete’e ya’u sisoi’i tala ananga. Dadi ngowa-ngowa’a toma limau mo-moini toma daeraha gena-ge 'aḏi la-lalara ya sitola’a ma ji’o tagi mete’e tana’a dudungu re ananga 'aḏi ngadolo siḏa. 34 Wakutu Yesus re 'Ai me-mete’e 'aḏi 'uci toma oti, Unanga 'o oḏi’i ngowa’a repe. Re Tai 'akala re sinyingara 'i baolo dadalara ra ananga gena-ge, sababu 'o oḏi’i i’a ananga sa’olo doba kama sowohi ua. Ḏua Yesus 'o pula’a do-doto’o ma repe ra ananga.✝6:34 Nyo. 27:17; 1'Oln. 22:17; 2Taw. 18:16; Yeh. 34:5; Za. 10:2; Mat. 9:36 35 Ma wangere so’o ne’o, 'ai me-mete’e 'aḏi kanau i’a ra Unanga, "Sa’i ri lobi’i re ngi’i ne 'i tiwongo i’a. 36 Jobilaha Jou no soma’a ngowa’a repe 'aḏi tagi toma gamu-gamu bolo toma do’usu-do’usu ma sebanga, la 'aḏi tibo manga ngo-ngoromo."

37 Mada’a Yesus 'o sangoro, "Ngini ni pula’a oromo ananga."

'Ai me-mete’e dadunu 'aḏi kanau, "Wah, ngowa’a manga repe nena-ne. Na’o ngomi pula’a roti ra ananga, balasu tibo roti ma ijana pipisi salaka latu ḏiḏi!"*6:37 Gena-ge ma tero ngowa’a munara ma bo-bangu ma di’ara ngara tu’angere.

38 Ḏua Yesus 'o sano, "Ninga roti ngai muḏuo? Tagi ni disa si." Ananga tagi ya disa toma ngowa’a repe manga sigolona kara 'aḏi ḏibo 'aḏi kanau, "Ngomi mi sanga roti ngai romotoa re nyao’o ngai ḏiḏi."

39 Ḏua Yesus 'o soma’a ngowa’a repe 'aḏi tegoro toropo moi-toropo moi toma rurubu ma re’u. 40 Ngowa’a repe gena-ge 'aḏi tegoro re 'aḏi masifato toropo moi-toropo moi; 'age toropo moi nga latu moi, 'age ḏi’i nga nyagi romotoa. 41 Ḏua Yesus 'o 'oro roti re nyao’o nange-ge re Unanga 'o talaḏi ie da’u diwanga re 'O sibere ie murasa ma la ra Ma Jou’ongu Madutu. Togumu i’a, Unanga 'A poti-poti ma roti re 'A pula’a i’a Tai me-mete’e, ḏua ananga ya sibalangu di’a ngowa’a repe. So’o gena ḏi’i, Unanga 'a sibalangu nyao’o gena-ge toma ngowa’a mo-moini. 42 Ananga mo-moini 'aḏi oromo singadolo 'aḏi wunusu. 43 Togumu i’a, Yesus 'ai me-mete’e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga. 44 'O na-nau’u ḇato ḏa nga cala romotoa.