Mateus 21

Wakutu Yesus osama limau Yerusalem, ngowa’a kawasa 'U puji re silamo’o

1 Wakutu ananga 'aḏi co-cori limau Yerusalem, ananga 'aḏi ngadolo toma gamu Betfage toma Polono Zaitun. Toma ngi’i gena-ge Yesus 'o soma’a 'ai me-mete’e nga muḏiḏi, ananga tagi siḏa. 2 Unanga 'o kanau ra ananga gena-ge, "Ngini ni tagi siḏa i’a da’a toma gamu taninga biono. I’a da’a ni oḏi’i keledai rimoi rema ngowa, ngowa’a ya sipiri’u i’a. Na pasala enanga romoḏiḏi ma gumi re na gasa ino 'ane. 3 Na’o matengo i’a 'o sano ra ngini mangale 'oru ni 'a’a so’o gena-ge, ni kanau, ‘Ma Jou 'a paralu.’ Ḏua unanga gena-ge 'a dola’aku ua ngini na gasa keledai rimoi rema ngowa."

4 Enanga 'i dadi so’o gena, la sitotomo 'oru ga’a nabi 'a sinubuata pasala ḏua:

5 "Siajele ngowa-ngowa’a toma limau Yerusalem.

‘Oḏi’i, ninga 'Olana 'o sapolo ra ngini ino,

Unanga 'ai 'akala re sinyingara 'i mereoso re 'O maholo tala

re 'O mabalene toma keledai rimoi,

toma keledai ra-ramasa ie.’ "✝21:5 Za. 9:9

6 Dadi 'Ai me-mete’e nga muḏiḏi gena-ge 'aḏi tagi, re ya si’a’a ma tero sa’olo 'oru ga’a Yesus 'o bererongo ra ananga. 7 Ananga ya gasa keledai gena-ge rema ngowa. Ḏua ananga ya siwangini manga juba toma keledai romoḏiḏi ma ḏuḏunu, kara Yesus 'o mabalene. 8 Ngowa’a kawasa ya woi’i manga juba re ya sisela toma ngo’omo. Re 'age rema ngowa’a lelegu ḏi’i 'aḏi tola’a ate ma umanga ya siwangini toma tapaka. 9 Ngowa’a kawasa ga’a 'aḏi tagi siḏa-siḏa re ḏi’i ngowa’a kawasa ga’a 'aḏi tu-tuu’u ra Yesus, ananga mo-moini 'aḏi poa’a so’o ne:

"Puji re silamo’o 'Olana Daud 'ai ju’uda!"*21:9 'Olana Daud 'ai ju’uda ma tero sa’olo: Daud 'ai Ngowa’a Nau’u.

"Sibarakati Unanga ga’a 'o sapolo ra Ma Jou’ongu Madutu 'ai lomanga!"

"Puji re silamo’o Ma Jou’ongu Madutu toma Gau’u!"✝21:9 Nya. 118:26

10 Wakutu Yesus 'o osama limau Yerusalem, ngowa’a mo-moini toma limau gena-ge 'aḏi nyiwere re 'aḏi ma’u sano, "Unanga nena-ne 'a guna?"

11 Ngowa’a kawasa ga’a 'aḏi mamete’e ra Unanga 'aḏi sangoro, "Unanga nena-ne Yesus, nabi toma limau Nazaret toma daeraha Galilea ino."