Mateus 26

Gethsemani ruhuona Jisua chubaitho

36 Hanchu Jisua hah a ruoisingei leh munkhatin Gethsemani an tina han an sea, Jisua’n an kôm, "Soson chubai ka va tho sûngkâr chu hin lên sung roi," a tipe ngeia. 37 Peter le Jebedee nâipasal inik ngei hah a tuonga, Rathainvâina le mulungdûk tongnân ahong sipa, 38 male an kôm, "ka mulungdûk atong raia athi rang dôrin kêng ki ni zoi. Hin om ungla mên ning pui roi," a tia. 39 Hanchu, mântieng ava se uol vieta, pila ânboka, chubai a thoa, "O Pa, anitheiin chu, hi tuongna kilât hih ko kôm renga ni khâi pai pe roh! Nikhomrese, keima racham niloiin nangma racham ni rese," a tia. 40 Masuole chu a hongkîr nôka, ruoisi inthum ngei hah an inin a hong mua; Peter kôm, "Inmo nangni inthum hite dârkâr khat luo khom mi inningpui thei loi tie hi? 41 Huongna nin lût loina rangin intûng chienin chubai roi. Ratha’n chu a nuoma, taksa’n ai phari loi ani" a tia. 42 Hanchu, avoiniknân Jisua a se nôka, a chubai nôka, "O pa hi tuongna kilât hi ke nêk loia pai thei aninônchu nangma racham ni rese," a tia. 43 A hong nôkin chu ruoisingei hah ain dênin a mu nôka; an mitngei reng an meng zoi loi sikin. 44 Jisua’n a mâk ngei nôka, a voithumnân a ti nanâk hah tiin chubai a tho nôka. 45 Male ruoisingei kôm a hong nôka, an kôm, "Atûn tena inngamin nin la in bang na? En ta u, Miriem Nâipasal hih mi nunsiengei kuta pêk rang zora ahongtung zoi. 46 Inthoi ungla, sêng ei ti zoi. En ta u, ni sûr rangpu hih ahong nâi zoi!" a tia.