1 Niduheñu hínsiñetiña nun, anuhán tibiaman gárada nabürühan hun. Tidan biángubei, hóuchatina lun naritaguagüdünün luagu arufudahani inarüniti le furendei humaalibei, lun gayaraabei lan haruma lan hisaminan. 2 Haritagua humá luagu burí katei le meha hariñagubei profetagu, luma luagu lugumadin Wabureme Hesukrístu le Wasalbaragüle, le meha warufudahabei wagía apostolugu hun.

3 Lídangiñe sun burí katei le wariñagubei, rútima huméi le haritagunrugun: Luagu lídounme lan lagumuhóun dan, añaheinbaña gürigia adaagutiña bula hau; habagariduba keisi lariñaguni luriban haritagun houn, 4 ábame hariñagun: «Ka san mégeibei lau füramasei luagu lagiribuduba lan Kristu? Hilagua wagübürigu ani ítaramemegili sun katei kei meha lúmagiñe dan le ladügǘnbei ubóu». 5 Mabusenrúntiña hasubudiruni luagu ladügüni lan Bungiu sun katei lidan lidaani lun ladügǘniwa. Adüga lumuti meha sielu luma ubóu lúmagiñe binarü lau lugumadin; adügaléi múa lídangiñe duna ani lau duna. 6 Aba lachülürün dan lun lagünrinchaguni Bungiu ubóu meha ligira lau lidunarina guran. 7 Ánheinti sielu luma múa le guentobei, lareiduñein Bungiu lubame weyu lagünrinchawagun lau watu gemeti. Lareidahouña lubá luéyuri guséi luma hagünrinchawagun wuribatiña.

8 Mabulieida huméi giñe, niduheñu hínsiñetiña nun, luagu ítara liña lan aban weyu lun Wabureme kei milu irumu, milu irumu kei aban weyu. 9 Mama hamugatia ladüga ladarasarun lagunfuliruni Bungiu le füramase láalibei, keisi haritagun saragu; gaguraasunrügüti habá gürigia ladüga mabusenrunti lun leferidirun ni aban hádangiñe; labusenrun lun hasakürihan sun gürigia.

10 Lachülürüba weyu ligía lun lagiribudun Wabureme Hesukrístu ubouagun danme le magurabúniwa lan, keisi lachülürün híweruti áriebu. Ábameti lagumuchagun sielu lau aban lanarime ireini; rǘrüguagüdaleime watu gemeti sun katei le lídanbei.

11 Kéisiti lagünrinchaguba lan sun katei ítara, lunti lubeiti haruma lan habagaridun, deregeguañu hungua lun Bungiu sunsuinagubei, 12 agurabañu huméi lachülürün luéyuri Bungiu, adügañu huméi le huáraati lun hóufudahani. Lídanme weyu ligía, lagünrinchawaguba sielu lau watu gemeti, ábame larürüdagun sun katei le ubouagubei. 13 Ánheinti wagía, aguraba wamuti iseri sielu luma iseri ubóu le füramase láalibei Bungiu woun; úaraguabei sun katei ñein, ani buídubei sun katei ñein, richagua.

14 Ligía lubeiti, niduheñu hínsiñetiña nun, sun aünha lan agurabahéi burí katei le, houcha humá lun ladarirunün Bungiu lidan darangilaü ligibugiñe, harumañu, madurunga. 15 Subudi humeitia luagu lagurabaharügüña lan Wabureme Hesukrístu hasalbarun gürigia lubá lagiribudun ubouagun. Ítara liña giñe labürühan waduhe Pábulu le hínsiñebei woun saragu, hun, lau subudi le líchugubei Bungiu lun. 16 Adimurehati tidan sun burí ligaradan luagu burí katei le; lau sun anihein burí lan tídangiñe, hénrenguti gunfurandawa lan. Hati ibidiouguabaña aau hama ha lóuguabaña afiñe, garabaguati lanichigu labürühan Pábulu según hagía, ítara kei hadüga tun burí tíbiri líburu to Lererun Bungiu. Heferidiruba lun sun dan ladüga katei le.

17 Ligía lubeiti, niduheñu hínsiñetiña nun, kei subudi humaali lubéi burí katei le lubaramegiua, góunigigua humá hungua luéi heyeedunün gürigia wuribatiña, ígiragüdei arufudahani le inarüniti luáguti Bungiu hun. 18 Houcha humá lúntima hasubudiruni Wabureme Hesukrístu le Wasalbaragüle, awanse huguyame lidan línsiñehabu. Uéiriguni lun, guentó luma súnwandan! Ítarala.