1 Lidan libiaman lirumudiri larúeihan urúei Daríu, weyu furumiñe lidan lisisin hati, aba ladimurehan Wabureme lídangiñe profeta Ahéu, lun Sorobaweli gumadimati Hudá, le liráü Salatiéli, luma lun hábuti fádirigu, Hosué, le liráü Hosadákü.

2,3 Anihán katei le lariñagubei Wabureme Suntigabafu lídangiñe profeta Ahéu:

—Hariñahare gürigia ha luagu mámagili lan dan lun tararamawagüdünya nitenpulun tárigoun. 4 Ánheinti hun, dánhali san lun haganóun tidan muna wéndeguburitu, sun anuhán lan nitenpulun günringuañu? 5 Nariñaguña hun, au le Aburemei Suntigabafu lun hasaminarun buidu luagu ligaburi hóuserun. 6 Huguya bunaguatün gíbeti, gama lumoun míbeti halubahan; houtün, gama lumoun makimuleduntün; guratün gama lumoun magidarunti humagürabu; le nadagimeinbei luagu fáyeiti, ru lumuti lufayeitin tidoun sagü fuduharu.

7 —Nariñaguña hun, au, le Aburemei Suntigabafu lun hasaminarun buidu luagu ligaburi hóuserun. 8 Heiba áraabu, barǘ humá wewe bunaguaya humóun ténpulu. Anaheinbadina ñein gúndaañu ani narufudubei nuéirigun.

9 —Huguya gíbeti hálugun, gama lumoun míbeti hadarirun; katei le hareidubei húbiñe, barǘ numuti lau náfurun luagun. Kagia uagu? Ladüga lídanñoun lan günringuaü nuban, ani huguya túnrügüñein huban hetenira. Au le Aburemei ariñagubalin. 10 Ligía máhuyun lubéi huya hun, marandarun ligía múa hun. 11 Au anügübei lumabeigan luagun ichari, luagun wübü, luagun türigu, beibei-agei, oliwu-agei, luagun alubahani, hawagun gürigia, hawagun animaalugu luma luagun sun huádigimari.

12 Aba hasandirun Sorobaweli, Hosué hama ha híbiri gürigia anufudei dan le haganbunbalin le lariñagagüdübei Wabureme lun profeta Ahéu, anihán lariñagubei Wabungiute lun, lun lariñaguni. 13 Ábati ladimurehan Ahéu le lóunagüle Wabureme houn lidan liri Wabungiute, lariñaga:

—Lariñahare Wabungiute: "Au, le Aburemei ariñagubalin: Anahein huma".

14,15 Ítara liña lagaguduni Wabureme Sorobaweli le gumadimatibei Hudá, Hosué le hábuti fádirigu, hama ha híbiri gürigia, aba hagumeserun araramagüdounya litenpulun Habungiute le Wabureme Suntigabafu, weyu wein-gádürü lidan lisisin hati lidan libiaman lirumudiri larúeihan Daríu.