1 Ma lubuidun burí bugudi tídangiñe bigeidin, liráü urúei!

Wende buriti biyada kei luadigimari aban gadiñeti.

2 Ítara tiña bari kei aban weru róunuti

le ñein tumuti diwéin súnwandan;

ítara liña biranaagua kei láhabuchagun türigu geyegu fuluri lau.

3 Ítara liña baniguagu kei bián usari mádounu.

4 Ítara liña bigiina kei aban wáyelesi lauti marüfíli;

ítara liña bagu kei bián lagei duna uburuguna Esübón

lubadu lubenari Batü-rabimü;

ítara liña bígiri kei luayelesin Líwanu

le luágunbei uburugu Damasüku.

5 Ítara liña bichügü luagu búgubu kei luwübüri Karümélu.

Ítara liña bídiburi kei tifilun gamisa funatu:

Anihein aban urúei adaürǘwa labadinagua bídiburi!

6 Númari, würi bímetu,

ma bumagadiñen!

7 Ítara liña besetirun kei aban tídibu yawara;

ítara liña baniguagu kei tiresimun.

8 Busentina lun nawariruni tídibu yawara lun nárügüdüni tiresimun.

Ítara lubati burí kei tiresimun beibei;

ítara luba líhemen bawaragun kei tíhemen mansana;

9 ítara luba biyumulugu kei diwéin buitu

to irirahaboun lau lámarun luéigiñe iyumaaru

luma luéigiñe ari.

10 Lani númari nuguya:

Ani hínsiñetina lun.

11 Higabu númari, keimoun áraabu!

Wásügürübei áriebu labadinagua fuluri le alühéña.

12 Wóudiba beibei-ágeirugu binaafin,

ariha anhein egelewehaaru lubéi,

anhein gínharu lubéi,

anhein egelewehaaru lubéi güranáda.

Ñeinba níchigei nínsiñe bun!

13 Ígiragüda tumuti mandürágora tíhemen.

Anuhein sun tuwuyeri in webenari:

To sáüharu tuma to sun liña tátügürüniwa

to nadireiruboun areida bubá númari.