1 Agagudúañu nuba ítara keisi óunigihati lidan lubara,

ariha kaba lan lariñaga Wabureme nun,

kaba lan lóunabagüle lun nekeharun.

2 Aba lóunabunina Bungiu, lariñaga nun:

«Abürühabei le lunbei narufuduni bun,

lun gayaraabei lan laliirúniwa buidu.

3 Machülügili dan lun lagunfulirun uénedü le;

gama lumoun lagunfuliruba.

Agurababéi, íbini genege lan ladarasarun,

lachülürüba lidan dan.

4 Anihán uganubei:

Máhatina houn ha barüguabaña houngua,

ánhañati gürigia ha richaguabaña habagariduba luagu hafiñen».

5 Lau sun gagarabaaguadi tan diwéin hawagun gürigia barügua tungua,

lun meredebaña lan múnada.

Ladüga wéirigüda tumuti hagülerugu kei umúahaü,

ani makimuledaditiña kei óunweni,

íbini hóundaraguni sun néchani houngua,

óuyeda hagía lau sun ageiraü.

6 Gama lumoun sun néchanigu ha agañeirúbaña

hadügüba bula lau Babilónia,

lau heremuhan lun ítara:

«Fugiabu buguya le arisidubei lau le mama bani!

Ídaba san lásura bóundaraguagüdüni irisini le bibihubei furedeirügü?»

7 Hachülürüba aguburahatiña bumoun danme magurabunbani,

hagagudúba ha lúnbaña hagidarunibu lídangiñe bubara

ábame hígirunibu surusu.

8 Hóundaraguba néchanigu bubá,

hasagarahabadibu kei basagarahaniña.

Hafayeiragüdübadibu luagu sun áfarahani le badügübei,

anarimeni léñaha badügübei fulasurugu

lun burí uburugu hau sun lílana.

9 Fugiabu buguya le buíngüda báaruboun buban lau bíweru,

lun besefurun luéi sun denchaü!

10 Lau igaburi le babuinchagüdoun buban lau busiganu,

ani günringuaadibu búniwagua lau bagünrinchagun saragu néchanigu.

11 Íbini dübü luma fulansu le aubei tadügǘwa buban,

lagúarahaba kóntüra buguya.

12 Fugiabu buguya le ábunagubalin buburugute

ligibuagu áfarahani luma múarani!

13 Buguya Babilónia, ladügüba Wabureme Suntigabafu

lun mahuudun lan buadigimari luma lubucha buagu,

sun buadigimari láguduba.

14 Ladüga labuinchun sun ubóu lau

lisubudinwa luéirigun Wabureme,

ítara kei labuinchagüdüni duna barana.

15 Fugiabu buguya,

le abacharuadagüdübaliña bubesinanigu

lau bíchugun diwéin houn lun baríaguniña surusu!

16 Leweñegua uéiriguni babuinchuba lau busiganu,

lugundun látagüdübei Wabureme uniñein le lánina ligañi bun,

ani ábame babacharuadun,

ábameti lasansiragun buéirigun lun ǘnabugunime.

17 Buguya áchuahabalin áraabu Líwanu,

guentoti buguyaba agünrinchawagúa,

buguya áfaragubaliña animaalugu,

guentoti láfaraadibu anufudei hawéi.

Lasusereduba le bun ladüga burí báfarahan

luma burí anarimeni le badügübei ubouagu kóntüra burí

uburugu hau sun lílana.

18 Ka san un hu lan aban guáriua?

Ka san un hu tan aban iyawaü

to anügübaliña gürigia lidoun iyeeni?

Siñati hadimurehan guáriuagu;

ida lubati gayara lan lemenigidun le adügübaliña hawagu?

19 Fugiabu buguya, le ariñagubei lun

aban guáriua lauti wewe lun lagagudun,

ariñaga buguya lun aban dübü mariñagaditi lun lararamun!

Gayaraati funagia híchugun uganu?

Siñati, ladüga mabagaritiña

lau sun afurarúa hamá lau golu luma pülata!

20 Gama lumoun anihein Wabureme tidan litenpulun to sánduboun:

Manila sun ubóu ligibugiñe!