1 Anaha au, Pábulu, nabürühañoun gárada to hun, huguya lánigu Bungiu ha aganóubaña uburugu Roma. Aban eseriwiduti lun Kristu au, anúadira lumutina Bungiu lun lánibadina lan apostolu, aba lóunahanina lun napurichihani uganu luáguti asalbaruni.

2 Subudigüda lumuti Bungiu uganu le lúmagiñe binarü hádangiñe profetagu luma tidan Lererun. 3 Ñǘbuinti asalbaruni ligía woun lídangiñe Wabureme Hesukrístu. Keisi gürigia, hádangiñeti meha ladügawagun urúei Dawidi, 4 arufudúati luagu liráü lan Bungiu lau lueirin milaguru le ladügübei lau lásaaragüdüni Hesukrístu lídangiñe óunweni. 5 Fulesei lumutina Bungiu lídangiñe Hesukrístu lau lóunahanina lidan liri lun nasubudiragüdüni houn gürigia, gayara láamuga hafiñerun luagu, adüga hameime le lubeibei. 6 Ünhein haganagua gürigia hagía, huguya le unbei lagúara Bungiu lun lánigu humá Hesukrístu. 7 Nabürühaña lubeiti hun, huguya le aganóubei uburugu Roma, ha hínsiñebaña lun Bungiu, wa ligía hun lun lumutuniñabadün lan. Ibiha humá abiniruni luma darangilaü lúmagiñe Wáguchi Bungiu luma lúmagiñe Wabureme Hesukrístu.

8 Furumiñeti katei le nabusenrubei hasubudirun, luagu lueirin neteingiruni Nubungiute lídangiñe Hesukrístu huagu, sun huguya, lugundun adimurehóuati luagu hafiñen luagu Hesukrístu lidan sun fulasu. 9 Ani Bungiu, le unbei neseriwida tau sun nanigi apurichihei uganu luáguti Liráü, gefenti luagu lueirin nafurieidun huagu súnwandan. 10 Amuriahatina luma Bungiu súnwandan lun madisebei lan weyu ligía lun gayaraabei lan nidin arihaün, anhein ligía lubéi lugundanbei. 11 Lugundun busentina narihinün lun nafanreinhan abinirúnimeme le líchugubei lani Bungiu Sífiri nun, lúntima héredun lidan hafiñen; 12 lun giñe wíchugun gurasu wóuniwagua lau afiñeni le wawagubei.

13 Niduheñu, busentina hasubudiruni luagu álugaadina lan nidin arihaün saragu wéiyaasu gama lumoun siñagili nidin. Álugaadina nidin lun níderagunün lidan hawanserun lidan héibugun luma Bungiu, keisi narihini hawanserun híbiri afiñetiña lidan burí amu fulasu. 14 Lunti níderaguniña sun gürigia, dandu ha chülüguatiña keisi ha machülaaguntiña; dandu chu tau keisi ibidiougua tau. 15 Luéigiñe lubeiti nóubadina, busentina giñe lun napurichihani uganu luáguti Wasalbaragüle hun, huguya le aganóubei uburugu Roma.

16 Úati nibusigari nan lau uganu luáguti Wasalbaragüle, lugundun anihein lan lubafu Bungiu lidan lun lasalbaruniña sun ha afiñebaña luagu; huríu furumiñe, lárigiñe, ha mámabaña huríu. 17 Arufuda lumuti uganu ligía woun ida liña lan laricharaguagüdüniña Bungiu gürigia ligibugiñe, lau hafiñerun lúmagiñe lagumeseha lumoun lébeha. Ítara liña tariñaguni Lererun Bungiu: «Le richaguabei lau lafiñerun, labagariduba».

18 Ariha wamuti luagu ábürüha lan lanarime ligañi Bungiu siélugiñe luagun hafigoun luma hariban sun gürigia ha mígirunbaña lun lasubudirúniwa linarün Bungiu ladüga hariban. 19 Subudi hamuti le gayaraabei lasubudirúniwa luagu Bungiu buidu buidu lugundun ligía guánarügü arufudaha laali houn; 20 le marihínbei luagu Bungiu, gayaraati lasubudirúniwa lau burí katei le ladügübei. Arihúaali furangu lúmagiñe lagumeserun ubóu luagu Bungiu lan ligía, luagu giñe magumuchadi lan lubafu. Gadurunhaña lubeiti wuribatiña luagu hariban, 21 lugundun lau sun subudi hamani Bungiu, míchugungiña inebesei lun keisi Bungiu, meteingirun haméi. Lubaragiñe lira rédeihaña asaminara libidiounigan aau, ani rédeiha giñe hanigi lidan luburiga. 22 Lau sun ariñaga hamá luagu chu lan hau, ibidiouguati hau; 23 lubaragiñe háhuduragun lun Bungiu le wéirigubei, le móunwedadibei, háhuduraguarüga houn hayawa gürigia ha góunwedaditiña, luma giñe houn hayawa dunuru, animaalugu aduruuharügütiña múarugu hama animaalugu ha gádürügua tugudi.

24 Ligía ígira laaña lubéi Bungiu lau luriban igaburi le gádanbaliña, darí lun burí hadügün katei burí nibusigarídünati hámagua. 25 Sansi hamaali linarün Bungiu luagu iyeeni; lau háhuduragun lun burí katei le ladügübei, lubaragiñe hamuga lun lan le adügübalin katei ligía háhuduragua, le gadünabei inebesei lun súnwandan. Ítarala.

26 Ligía ígira laaña lubéi Bungiu lun hadaagun katei nibusigarídünati; íbini würiña adaaguatiña katei burí hama würiña háledigu lubaragiñe hamuga hagamaridun wügüri keisi lubudubu. 27 Ítarameme giñe ígira hamaali wügüriña hayusurun würiña lun hayusuragun houngua. Adaaguatiña wügüriña katei burí nibusigarídünati hámagua, ábati hasufuriruni lafayeiruaha hafigoun hawougua.

28 Kéisiti mabusenrúnhaña lan híchuguni lilugaarun Bungiu lun, ígira láañati lau lagübüri hasaminan, lun hadügüni le moun lubéi hadügüni. 29 Buin haña lau sun luwuyeri marichaü: Salufuri, wuribani, memenihabu, iyereehabúni, gimugaü, gáfarahadi, lanigiwa wuribu, eyeeraguni, ibibuni, marasualugu. 30 Adimurehatiña wuriba hawagu híbiri gürigia, iyereeguti Bungiu houn, menebenehabutiña, barüguatiña houngua, pántatiña. Adaaguatiña katei wuribati, mabahüdün hamutiña hagübürigu, 31 ibidiouguati hau, magunfulirun hamuti hererun, mínsiñehabutiña ni ka un, úati feruduna hamá, magudemehábutiña. 32 Subudi hamuti le lariñagubei Bungiu buidu buidu, subudi hamuti luagu ha lan adügüti burí katei le, lunti lan hounwen luéigiñe. Lau sun lira, adügameme hamuti, darí lun gunda hamá dan le harihin amu gürigia adügei.