1,2 Lidan meha dan le aguseragüdütiña lan agumadiraña Ísüraelina, aba ladagarun ümi lidan sun fulasu ligía. Ábati lidin aban wügüri gíriti Elimélekü, Belenna, lumúanrugu Hudá, aganawa luagu fiu dan Moabü. Ñǘdüntu giñe Noemí to lúmari, hama bián hasaanigu, Malón luma Kilión. Éfüratana sun hagía, lememe gíribei Belenna. Ábati herederun aganawa Moabü.

3 Chüülü weyu lun lounwen Elimélekü, le túmari Noemí, aba terederun hau bián tirahüñü. 4 Dan luagun dan, aba hamarieidun irahüñü ha hama bián würiña Moábüna. Orufá tíribei aban, Rudu tiri to aban. 5 Gama lumoun diisi irumu lárigiñe, aba giñe hóunwegun Malón luma Kilión, aba terederun Noemí marahüñüga, mámariga.

6 Luagu aban weyu, aba taganbun Noemí ñein Moabü luagu gudemehabuhaali lan Wabureme lun tageira, ani gumuguagüdalá lan ümi le ñeinbei. 7 Ábati taranserun lun tagiribudun Hudáun, aba houdin lídangiñe fulasu le buga ñein lubéi taganawa, habu tídiñugu. 8 Gama lumoun ǘmada, aba tariñagun houn:

—Heiba, giribu humá húbiñoun tumoun húguchu. Rula Wabureme areini hun lun súnwandan, kei buga hóuseruniwa, nuguya hama nirahüñü lau areini, 9 anha láamuga giñe lunya hamarieidun, lun habagaridun lau ugundani.

Aba tachuuruniña Noemí le lánina ayouraguni, gama lumoun hagía aba hayahun, 10 aba hariñagun tun:

—Wéibuga buma bageiroun!

11 Tariñagaya Noemí houn:

—Heiba nirahüñü. Ka uagu habusenra hasigirun numa? Nuguya, marahüñüdigiaadina lun gayara lan hamarieidun huma. 12 Heiba, giribu humá húbiñoun. Nuguya, wéiyaadina lunya namarieidun. Íbini hamuga anhein hemenigigidinati lunya namarieidun, aba hamuga namarieidun gúñounmeme le, aba hamuga nagaraüdün, 13 Hagurabahabaña hamuga san haweinamudun lun hamarieidun hama? Herederuña hamuga san mamarieidunga agurabahaña? Uá nirahüñü, mama luba. Óunahaali Wabureme ligifi asufuriruni nun, gama lumoun gífitimabei nasufurirun anhaün nariha asufurira.

14 Ábaya hayahun. Lagumuhóun oura, aba tayouragun Orufá tun tágürü lau aban achuuruni; ánhounti Rudu, aba terederun tuma. 15 Ábati tariñagun Noemí tun:

—Arihabá, tagiribuda luguñoun búmari tageiroun luma houn tubungiutegu. Beiba tuma.

16 Tariñaga Rudu tun:

—Mamuriahabá numa lun nígirunibu luma lun nafanreinragun buéi! Nídiba le ñeinhin lumuti bidin, naganóuba le ñein lumuti baganawa. Le bageira, ligíaba nageira; le Bubungiute, ligíaba Nubungiute. 17 Nóunweba le ñein lumuti bounwe, ani ñeinba nabusenra lun nabunúniwa. Béilana Wabureme here ánhana afanreinragua buma, ánhawagubeirügü lafanreinragúa óunweni!

18 Dan tarihinbei Noemí luagu aranse tan Rudu lun tidin tuma, aba tánharun, 19 aba hasigiruni héibugun biángubei darí hachülürün Belén.

Dan le hebelurunbei Beléun, ñeinñein aban óunwenbu agülülühani hadan lílana fulasu lau harihiniña. Hariñagati würiña:

—Ma san Noemí to?

20 Tariñaga houn:

—Hebé hagúahan nun Noemí, wa humá nun Mará, ladüga gífigüda laali Wabungiute, le Suntigabafu nibagari. 21 Buin liña núhabu náfuridun yáagiñe; guenlé, dan nagiribudun, málaali ladüga ítara liña lan labusenruni Wabureme. Ka uagu hagúaha nun Noemí, anhein siadi láadina lubéi, ani nidiherigüda lana Wabureme le Suntigabafu?

22 Ítara liña tagiribudun Noemí Moábügiñe tuma Rudu to tídiñu, to Moábüna. Hachülüra Belén lidan lagumeserun lalubahóuniwa sebada.