Luka 20

Bugundugku Yasuwa

1 Xongenendäng Yasuwa bälde kän tä kaxsä kaldä axä tämed tä Kaläg na mäduwale yaxsäwecci apo lege ngakä Kaläg tä känang. Na bazuwinygä menggä tämed na menggä lelericcä asiriyenä Musa na ngondowinygä Yaxudiny kawuno täma 2 ngadeccä täma ka, "Lapäng, xänang kä’dakas gi ka wexseng? Xänang kadong butug tägi ka wexseng?" 3 Neng Yasuwa kämeley täsa ka, "Amäne anggo mäned ndä anggo buci tagä. 4 Kalägkang kä’daka Yoxana ka pacä känang, wala känag kä’dakas ma ka mäpacsang?"

5 Na sacengesuno tä cengic sabodsa watäkäsa sängadeccä ka, "Kax 'doccig ngadig ka, ‘Näs Kaläg’ na mä’do mängade ka, ‘Wi siye anggo kämeneng ngakä ma Yoxana songang?’ 6 Ndä mändey kä’doccig kängadig ka, ‘Näs känang,’ kän kä’day 'däme kog na nganyu, xa kän oxo ka Yoxana me logeyang."

7 Na sägä’docco sabuc ta Yasuwa ka säyex käxa kä’dakas Yoxana ka pacsa song. 8 Na Yasuwa ngade täsa ka, "Neng aläpedäng käxi kä’dakas butug tagä ka awexse nangang song."

Seredäniccä Kängga Samene Zäg Täng

9 Yasuwa kaser legey tä kän ka, "Apangandäng käsäbä pelowge, ndä menes tä menggä pelowatäng ndey meskädä yä kä’doc tä wedäg kalaygädä. 10 Kala weg kiye de säjede na mayaxsas cäläxsäma ka 'doc täsa menggä pelowgi mamene zäg tängang, ndey ka larä weg toga käma. Neng sa menggä pelowgi mamene zäg tängang käbadä cäläxsäma ndä matas täma na asängge päloccu mänang. 11 Sax mändey mägälasä mayaxsa nuxu cäläx. Na mändey salandä ndä säbadä ndä sämatas täma na asängge päloccu. 12 Sax mändey mayaxsa kodoseneni. Ani kala sägäbadä sägämexestey ndä sämaga tunyu.

13 "Na ledä pelow ngade tä ngase ka, ‘Oxadi asog gangang? Basa ayaxsas tirä päxä penenggong ampaye ngake pacceyang nuxus sä’doc sänyay ma.’ 14 Ani känggi samene zäg täng koxäs nya penämaniyang, sägaxsäning sängadeccä ka, ‘'Doxtongang luguccing, nycugo apaxa ndey lugig pelowge!’ 15 Na tetex samen ma sabokung ma tunyu tä kaxsänggä pelow sägä’docco sapax ma." Na Yasuwa kamän sa ka, "Ledä pelowgi kamenes pelow täsang sogo sa key? 16 Ma mäwunodung mäpaxe känggi mamenes pelow tängang yä mädogada tä kängga cakuny."

Na kala kän kädäng ngakong na ngadeccä ka, "Nyäzekä ngakong ndakä soguning mänang!" 17 Neng Yasuwa kalaley sa käteg na ngade täsa ka, "Ngaki gärekärejesuno tä Sorunu Kalägkang ngadeccä ka wi? Ngadeccä ka, ‘Ngayicci menggä tonyad käpexkäng kalayis ngayiccä saluweccä kadasuweccä ax.’*20.17 Yasuwa bangäs ngase ngayiccä saluweccä ax. 18 Ndä käxa kadel täzä nya ngayicciyang, nyäroborobogo yä käxa nyadeles zeneng, nyäregeregeje."

19 Na tänya axä owdi menggä lelericcä asiriyenä Musa na bazuwinygä axä tämed tä Kaläg paye ka men ma xa sabäle ka maser ngaki täsa, neng sänyigate kän.

Yawgä Tuluba ta Kaysar

20 Ngotorpodagä Yaxudiny jenggere Yasuwa käsac ndey ka sä’dox rakawza sämenäs ma na sayaxsas menggä raj ka 'docco paxesäning käräp sogosuning kängga apoccu. Säpaye ka sädäng legey tä ikäma ndey sämenenäs ma tä andä buguningzä Romaniny. 21 Na menggä raj ngadeccä täma ka, "Me bäldic, wa ayexig gi ka nycofu’dono legey ndä bälde zänggä nga tä ngakä Kaläg. Ndä päx gele kän song. 22 Gang kädäppa ka wa ayawig tuluba adogig ta Kaysar wala awangig toke?"

23 Neng Yasuwa kabäle rajsi tä mäganygäsang na mängade täsa ka, 24 "Doguning dinarsä Romaniny tagä. Läpäning ligidä xänang na agä xänang gärekärejesuno tä ongeneng?" Na sängadeccä täma ka, "Näkä Kaysarang."

25 Na Yasuwa ngade täsa ka, "Dogi wegki layis gäkä Kaysarang ta Kaysar, na aki layis käkä Kalägkang dogi tä Kaläg." 26 Na tänya owdi sägädongasa tä ngaki malegeyang na sa’dox rakawza ndey sämenäs ma tagä kän song, na sägämolosuno.

Batad na Ngäsad tä Xäs

27 Kulung menggä Yaxudinygi säbangäs Saduginy, ngadeccä ka kig äxse ngäsata tä xäs songang, kawuno ta Yasuwa. 28 Sängadeccä täma ka, "Me bäldic, me logey Musa gärekärejesa nga täwas ka apangza päxä bona kabagsa ndä äxsä yä kiyäng pipu songang, päxä bona bag nya mandursi ndey iyäng pipu tänya päxä bonanani käxsäng. 29 Ndä enggä bonyatäng paxtinding. Päxä bonanani täzälägkang kabagsa ndä käxsä kawangasa uxe kiyäng pipu täng song. 30 Ndä ani täbangeneng kasog mänang. 31 Kodoseneni kasog mänang. Sägädoneydä batakä ce uxi ndä sägäxse na’anggäsa paxtinding sägiyäng pipu song. 32 Na ce täzäce cägäxse tä bangäsa. 33 Gang mänangang, xänang täsa 'do layis yoxuce tä xongondu ngäsad tä xäsang, ndä na’anggäsa sägädoneydä batakä ceng?"

34 Na kala Yasuwa ngade täsa ka, "Menggä zong batacca na säbate. 35 Xa känggi lelexiny, ur’dug ngäsotäsäng tä xäs tä xongondu ngäsad tä xäsang, batacca na säbate song. 36 Ndä sa mändey säxseccä song xa kala sa’das malayikada. Säs enggä Kaläg, xa sänguso sa tä xäs. 37 Mändey me logey Musa kabäle ka käxa käxsä ngäsata tä xäs. Ka’das ani gärekärejesawa tä Sorunu Kaläg tä ngakä masi kagusi ta Musa tä kaxsetang, ani mabandäs Kaläg ka Kalägä Apraxim, Kalägä Isxag na ka Kalägä Yaxubang.*20.37 Kaläg kalegeyze ta me logey Musa tä kaxseti mas kangäsa täng ndä siye kaxsed songang. 38 Kaläg Bazuweccä kängga oxaccang, päx näkä kängga käxseng song. Xa kän kä’day ayeccä tänya."

39 Na kala kulung menggä lelericcä asiriyenä Musa kabuc tä ma ka, "Me bäldic, gi kälegeyze apo na’do!" 40 Na todi sanyigatas mänekä ma.

Mäneki Padäginy Yasuwa Kamänäs Kän tä Ngakä Almasiyang

41 Neng mängade täsa ka, "Oxadi siye sa sängadeccä ka Almasi näs päxä pe Dawutang? 42 Dawud täze ngade tä Sorunu Masmur ka,

‘Bazuwec Kaläg kangad ta Bazuweccang ka,

"Bo icca tä cengiccä andä abaniccang,

43 bal asog gi nyebesa menggä kurugi täzäg."’

44 "Dawud bangäs ma ‘Bazuwec,’ yä mälayis päxä pene key?"

Yasuwa Kädaxä Menggä Räbke ka Wang Poporey

45 Ani kän kä’day deldeyäs wungga ta Yasuwang, Yasuwa ngade tä menggä räbke ka, 46 "Meskädäning ta menggä lelericcä asiriyenä Musa. Xa säpaye lagkä tanduga apoccu säwalangeccä nang ndä säma’dite modey tä owtagä nganyatada na säpaye cad tä owtagä dädäxti tä axinygä paliccinygä Yaxudiny na owtagi sänyaye ngotoropu täng tä siyatang. 47 Yä sägäläkäläji wegkä manduriny ndä sädertesäno säpalacca mäna’ang. Känggi kala akakiyang, sag seley Kaläg 'doco cäläxti ta’asang."