Lucas 22

Putros Kagil Yasuwa

54 Kala samen Yasuwa samagas tagäsa sagoyas tä pang ngotorponu axä tämed tä Kaläg. Yä Putros räbto sa ndä lewa täxandäxang. 55 Kulung kän kadox mas tä pidinä kaxsä kal pagedäning na Putros kä’doc käcca tä waräsa pagewa. 56 Na päxä uxandäng näs me wexed kox ma tä banyiccä mas na kajenggerey ma ngade ka, "Apangzong nyang na Yasuwa seley!" 57 Neng Putros kagil ngade ka, "Ama kuxong, ayex ma säxong!"

58 Sax mändey tä bälaxtäg, nuxu accäsandäng kox ma na ngade täma ka, "Gining mändey näs nuxu me räbkä Yasuwa." Neng Putros ngade ka, "Amo, agänang song!"

59 Sägäcudisi mäna’ang na nuxu kig kalewa ka, "Kax ka wi, na 'doxtongang na Yasuwa, xa ma mändey mäs me Calil." 60 Neng Putros kämeley täma ka, "Amo, ayex 'dogani legeng song!" Na tänya owdi musku tä zänggä legeygäma, modolong kalog. 61 Na kala Yasuwa Bazuwec kawexeswa kalala Putros käteg na Putros kagäräng ngaki Bazuwec kalogey tämang, ka, "Ndey ka tä kesekä ow modolong logo, gi n’do gäli agä taxä kodos." 62 Na Putros koya tunyu kangey paccey.