1 Xongenendäng, Yasuwandäng dokolo tä nyixtä Colonggonä Calil, ndä xä’dä kagurma paye däng ngakä Kaläg. 2 Na mägox dämpejiginy pädax tä nyixtä colonggo yä letuganagi näs menggä menekä asang, kawetäcco tunyu 'daye ka’dadaga. 3 Na Yasuwa kä’doc tä kaxsä nuxu dämpejigsi näs näkä Samanang, na mäläpede ta Saman ka, "Zexteyi dämpejigsiginong na pidänä ma." Yasuwa käcca tä nya kaxsä dämpejigsi ndä bälde xä’dä.

4 Yasuwa kä’dese legeyge, na ngade ta Saman ka, "Nyasi dämpejig tä maga tä’duginy na nggawi ka’dadagägo täng ndey meneng as." 5 Saman kabuc ka, "Ngotorpo, wakasängig kädayi tä wexed ndä kamenig nuxu 'dog song! Neng tä legeygägigong anggawada ka’dada tä ma."

6 Na sägädäng ngakäma sägawa ka’dadakäsa tä ma na samen as mange de ka’dadagäsa kacertäno. 7 Na sägädawasa ta biskodagäsagi tä dämpejigsi nuxungang ka wuno posa. Na sawuno sägäpäsä dämpejiginy pädax na as de paye muxosuno tä ma.

8 Saman Putros kox mänang, na kudukurusa tagä Yasuwa ngade ka, "Bazuwec, wede wangasa agä, xa anäs käxa sogo ngaka tasiny!" 9 Na todi Putros na känggi namang, kädongo tä menekä aski samendä mangeng. 10 Yaxup na Yoxana enggä penggä Zapadi menggä wexed na Saman kädongo mändey. Na Yasuwa ngade ta Saman ka, "Wanga nyigatäg, xa gang na ur’dug gi layis me menekä kän." 11 Na kala sagoyas dämpejiginygäsa tä tungurtic, na sawangasa weg bägälic na sägäräbkädä Yasuwa.

12 Tä cuku Yasuwa tä nuxu kaxsä pandäng, apangandäng kawung täma wane kä’dod na omo. Mägox Yasuwa na mägunusawa täzäg mäzaye zäg na manyäxay Yasuwa ka, "Bazuwec, kä’dang mpayeng kax kusog wanag kalay apo." 13 Na Yasuwa kälanga ande käpärä ma na ngade ka, "Agä ampaye asog gi lay mpo. Omo caya!" Na käccogos omo kaway tä wanäma.

14 Na Yasuwa kä’dedey ma ka andakä mäläpe tä nuxu kig song. Na madästä me omo ka, "Wede koyi ngasägi ta me tämed tä Kaläg na koyi 'dogu tämekägi ndey mäduwalasa ka wanägi kälay apo, tä bangä asiriyenä Musa kadästäse nangang, ndey säbäle ka wanägi kälay apo." 15 Yä wadi lulungudu wexekä Yasuwa kawasasäwa käked na xä’däni kädängang kawuno tä dänggä ngakäma ndey Yasuwa däxä sa tä täxäkäsa.

16 Ndä Yasuwa päledeswa tä owda kaculdoy xondaxonda watäke tä paley.

17 Na xongenendäng Yasuwa bäldecce na Farisiny na menggä lelericcä asiriyenä Musa aki käpädäsäno tä Calil na tä Yaxudiya na tä Ursalimang käcasäng käsac, ndä panggudugku Kalägkang kasog Yasuwa däxä känang.

18 Kulung apangas kawuno poko pudude tä salany. Säpaye ka sägoyas ma tax tagä Yasuwa. 19 Neng sa’doxa ow kapäs, ndä owda sälangeyis ma undung na sa’dese tazä ax sawe ax ndä sälolas ma nang tax na salany tagä Yasuwa. 20 Yasuwa kox menekä ngakäsa täma, na ngade ta pudude ka, "Bisko, ngaka tasinygägi käcayino."

21 Na menggä lelericcä asiriyenä Musa na Farisiny käre tä ngastängga ka, "Apangza tiyanang degeje Kalägkang? Xänang caye ngaka tasiny tä kän basa Kalägkang?"

22 Ani Yasuwa kabälenäs ngakäsagiyang, mäne sa ka, "Wi siye anggo makadang ngakong tä mäganygägong? 23 Ngakatiyag kädäppa ka xäxäminy ngadäningang, ‘Ani ka ngaka tasinygägi käcayining,’ wala ka, ‘Ngäsa tiyati wetäde’? 24 Asogo ngakong ndey bäleng ka agä, Päxä Käxa Jul panggudugkatäng tä andang täzäg layis näka anycayis ngaka tasiny." Na Yasuwa ngade ta pudude ka, "Ngäsa tiyati poka salanygägi wede tä pa."

25 Na tetex mangäsa tagäsa tiyati na madeccäng salanygäma mägä’doc tä pa, mädädäxti Kaläg. 26 Na mäganygäsa kabalza na sägädongo, na sägädädäxti Kaläg tä ngaki kasogunong. Na kala sanyigata Kaläg, sängadeccä ka, "Was kanoxig ngaka tädäxiny xongondong."

27 Tä bangä ngakong Yasuwa kawetä tunyu na kox käxa age ka Lawi, säbängäs ma mändeng Mata, näs me yawgä tuluba käcca gixinicci taxä burkune. Na Yasuwa ngade täma ka, "Räbta agä." 28 Na mangäsa tiyati mawangasa weg kä’day mägä’doc tä bangä Yasuwa.

29 Na Lawi kasog led tä pane ta Yasuwa, na kala xä’dä na menggä yawgä tulubada na kulung palangaski tängang, käcasäng sagur siyad nasa. 30 Na Farisiny na menggä lelericcä asiriyenä Musa daweccä ta menggä räbkä Yasuwa ka, "Wi siye anggo darjangedänang na ziyaccang na wuxiccing na menggä yawgä tuluba na kängga sogo ngaka tasinyang?"

31 Na Yasuwa kabuc ta Farisiny ka, "Känggi täxäccä songang paye me nayic song, basa känggi täxäccäng käcag paye me nayiccang. 32 Agä kawung tä bangakä känggi apoccung song, wadi kawung tä känggi sogo ngaka tasinyang ndey meley mäganyga."

33 Sängadeccä ta Yasuwa ka, "Menggä räbkä Yoxana mene uxkud todotol na palacca tä Kaläg, na mändey menggä räbkä Farisiny sogo mänang, yä menggä räbkägi kädil siyad na wuxid tol."

34 Na kala Yasuwa ngade täsa ka, "Kädäppa ka dogang palangaska kawuno tä batad ka men uxkud yä me batatandäng nang? 35 Musku xa ow wunodung säbate me batad täsa, ndä kala sälayenäs kängga mene uxkud."

36 Na sax mändey maser nga täsa ka, "Kigkandäng cerede nyonggo tä tandäna warändi ndä debede tä näka kaboxsu song. Käxa kasog mänangang kacere tandäni waränding, ndä nyonggoni waränding 'dasedäning na boxe song. 37 Kigkandäng colada bux tä meldäna näs boxenendäng song. Käxa kacolas buxka warändi tä meldäna näs boxeneng, zage meldä na wanyisäwa. 38 Wadi kädäppa ka buxka warändi säcolas tä kaxsä meldäna warändi. 39 Ndä käxa kawux buxku boxinyganang paye buxka warändi song. 'Do ngade ka, ‘Buxku boxinyga apoccu na wizicci.’"