1 ಆಕ್ರಿಕ್ ಅನಿ ಲೈ ಎಳ್ ಅಮ್ಕಾ ರಾಕುಕ್ ಕಸ್ಟ್ ಹೊವ್ಲಾ, ತೆಚೆಸಾಟ್ನಿ ಅಮಿ ಅಥೆನ್ಸ್ ಮನ್ತಲ್ಯಾ ಜಾಗ್ಯಾರ್ ರ್‍ಹಾವ್ಚೆ ಮನುನ್ ನಿರ್ದಾರ್ ಕರ್ಲಾಂವ್, 2 ಕ್ರಿಸ್ತಾಚಿ ಬರಿ ಖಬರ್ ಸಾಂಗ್ತಲ್ಯಾ ದೆವಾಚ್ಯಾ ಕಾಮಾತ್ ಅಮ್ಚೊ ವಾಂಗ್ಡಿ ಹೊವ್ನ್ ಅಸಲ್ಲ್ಯಾ ಅಮ್ಚ್ಯಾ ಭಾವಾಕ್ ತಿಮೊತಿಕ್, ತುಮ್ಕಾ ಘಟ್ ಕರುಕ್ ಅನಿ ವಿಶ್ವಾಸಾತ್ ಉಮ್ಮೆದಿನ್ ಭರಿ ಸಾರ್ಕೆ ಕರುಕ್ ಮನುನ್ ಅಮಿ ಧಾಡುನ್ ದಿಲ್ಲಾಂವ್. 3 ಕಸ್ಟಾತ್ನಿ ಅನಿ ತರಾಸಾನಿ ಕೊನ್‍ಬಿ, ಭಿಂವ್ನ್ ದೆವಾ ವೈಲೊ ವಿಶ್ವಾಸ್ ಸೊಡ್ತಲೆ ನಕ್ಕೊ ಮನುನ್ ಅಮಿ ಅಶೆ ಕರ್ಲಾಂವ್. ಅಮಿ ಕಸ್ಟ್ ಸೊಸ್ತಲೆ ದೆವಾಚ್ಯಾ ಮರ್ಜಿ ಪರ್ಕಾರ್ ಹಾಯ್ ಮನುನ್ ಅಮ್ಕಾ ಗೊತ್ತ್ ಹಾಯ್. 4 ಅಮ್ಕಾ ಕಸ್ಟ್ ಸೊಸ್ತಲೆ ಪಡ್ತಾ ಮನುನ್, ಅಮಿ ತುಮ್ಕಾ ಅದ್ದಿಚ್ ತುಮ್ಚ್ಯಾ ವಾಂಗ್ಡಾ ರ್‍ಹಾತಾನಾಚ್ ಸಾಂಗಟಲ್ಲಾಂವ್, ಅನಿ ತಸೆಚ್ ತುಮ್ಕಾ ಗೊತ್ತ್ ಹೊತ್ತ್ಯಾ ಸಾರ್ಕೆ ಅತ್ತಾ ಚಲುಕ್ ಲಾಗ್ಲಾ. 5 ತೆಚೆಸಾಟ್ನಿ ಮಿಯಾ ಲೈ ಎಳ್ ರಾಕುಕ್ ಹೊಯ್ನಾ. ತೆಚೆಸಾಟ್ನಿ ತುಮ್ಚೊ ವಿಶ್ವಾಸ್ ಕಳ್ವುನ್ ಘೆವ್ಚೆ ನ್ಹಯ್ ಮನುನ್ ತಿಮೊತಿಕ್ ತುಮ್ಚಾಕ್ಡೆ ಧಾಡುನ್ ದಿಲೊ, ಅಶೆ ಹೊವ್ನ್ ಸೈತಾನಾಚ್ಯಾ ಪಾಸಾತ್ ಪಡುನ್ ಅಮ್ಚೆ ಸಗ್ಳೆ ಕಾಮ್ ಹಾಳ್ ಹೊಯ್ ನಸ್ತಾನಾ ರ್‍ಹಾಂವ್ದಿತ್.

6 ಖರೆ ಅತ್ತಾ, ತಿಮೊತಿ ಅಮ್ಚೆಕ್ಡೆ ತುಮ್ಚೆಕ್ನಾ ಪರ್ತುನ್ ಯೆಲಾ, ಅನಿ ಯೆತಾನಾ ತುಮ್ಚ್ಯಾ ವಿಶ್ವಾಸಾಚಿ ಅನಿ ಪ್ರೆಮಾಚಿ ಬರಿ ಖಬರ್ ಅಮ್ಕಾ ಘೆವ್ನ್ ಯೆಲಾ, ಕನ್ನಾಬಿ ಅಮ್ಚ್ಯಾ ವಿಶಯಾತ್ ಬರೆಚ್ ಬೊಲ್ತ್ಯಾಸಿ, ಅನಿ ತುಮಿಬಿ ಅಮ್ಕಾ ಭೆಟುಚೆ ಮನುನ್ ವಾಟ್ ಬಗುಕ್ ಲಾಗ್ಲ್ಯಾಸಿ ಮನುನ್ ತೆನಿ ಅಮ್ಕಾ ಸಾಂಗಟ್ಲ್ಯಾನ್. 7 ಹೆಚ್ಯಾಸಾಟ್ನಿ ಭಾವಾನು ಅನಿ ಭೆನಿಯಾನು, ತುಮ್ಚ್ಯಾ ವಿಶ್ವಾಸಾ ವೈನಾ ಅಮ್ಕಾ ಉಮ್ಮೆದ್ ಗಾವ್ಲಿ, ಧನಿಯಾಚ್ಯಾ ವಿಶಯಾತ್ ತುಮಿ ಘಟ್ ಇಬೆ ಹಾಸಿ, ಹೆಚ್ಯಾಸಾಟ್ನಿ ಅತ್ತಾ ಅಮಿ ಉಸ್ಕೊ ನಸ್ತಾನಾ ಜಿವನ್ ಕರುಲ್ಲ್ಯಾಂವ್. 8 ಕಶ್ಯಾಕ್ ಮಟ್ಲ್ಯಾರ್, ಜರ್ ತರ್ ತುಮಿ ತುಮ್ಚ್ಯಾ ಜಿವನಾತ್ ಧನಿಯಾ ವೈಲ್ಯಾ ವಿಶ್ವಾಸಾತ್ ಎಕ್ ಹೊವ್ನ್ ಘಟ್ ಇಬೆ ರ್‍ಹಾತ್ಯಾಶಿ, ತರ್ ಅಮ್ಚ್ಯಾ ಭುತ್ತುರ್ ಖರೊಚ್ ಜಿವ್ ಭರ್‍ತಾ. 9 ಅತ್ತಾ ತುಮ್ಕಾ ಲಾಗುನ್ ದೆವಾಚ್ಯಾ ಇದ್ರಾಕ್ ಅಮ್ಕಾ ಕವ್ಡಿಕಿ ಕುಶಿ ಹೊವ್ಕ್ ಲಾಗ್ಲಾ, ಹೆಚ್ಯಾಸಾಟ್ನಿ ಅಮಿ ದೆವಾಕ್ ಕವ್ಡ್ಯಾ ಮಾಪಾನ್ ಧನ್ಯವಾದ್ ದಿಲ್ಯಾರ್‍ಬಿ ಕಮಿಚ್. 10 ಅನಿ ಪರ್‍ತುನ್ ತುಮ್ಚೆ ತೊಂಡ್ ಬಗುಕ್ ಅನಿ ತುಮ್ಚ್ಯಾ ವಿಶ್ವಾಸಾಕ್ ಅನಿ ಕಾಯ್ಬಿ ಭರ್‍ತಿ ಕರ್‍ತಲೆ ರ್‍ಹಾಲ್ಯಾರ್ ತುಮ್ಕಾ ಆದಾರ್ ದಿ ಸಾರ್ಕೆ ಹೊವ್ಕ್ ದೆವ್ ಅಮ್ಕಾ ಅವ್ಕಾಸ್ ಕರುನ್ ದಿಂವ್ದಿತ್ ಮನುನ್ ಅಮಿ ತೆಚೆ ಕಡೆ ದಿಸ್‍-ರಾತ್ ಅನಿ ಉಲ್ಲೆ ಉಮ್ಮೆದಿನ್ ಮಾಗ್ತಾಂವ್.

11 ದೆವಾನ್ ಅಮ್ಚ್ಯಾ ಬಾಬಾನ್ ಅನಿ ಧನಿಯಾ ಜೆಜುನ್, ಅಮ್ಕಾ ತುಮ್ಚೆಕ್ಡೆ ಯೆವ್ನ್ ಪಾವಿ ಸಾರ್ಕಿ ವಾಟ್ ಕರುನ್ ದಿಲ್ಯಾರ್ ಫಿರೆ. 12 ಕಸೊ ಅಮ್ಚೊ ಪ್ರೆಮ್ ತುಮ್ಚ್ಯಾ ಮದ್ದಿ ಭರುನ್ ವೊತುಕ್ ಲಾಗ್ಲಾ, ತಸೆಚ್ ತುಮ್ಚೊ ಪ್ರೆಮ್‍ಬಿ ಎಕಾಮೆಕಾತ್ನಿ ಅನಿ ಸಗ್ಳ್ಯಾ ಲೊಕಾತ್ನಿ, ಭರುನ್ ವೊತಿ ಸಾರ್ಕೊ ರ್‍ಹಾಂವ್ದಿತ್ ಅನಿ ಧನಿಚ್ ತೊ ಪ್ರೆಮ್ ತುಮ್ಚ್ಯಾ ಮದ್ದಿ ಭರುಂದಿತ್. 13 ಅಸೆ, ಅಮ್ಚೊ ಧನಿ ಜೆಜು ಕ್ರಿಸ್ತ್ ಅಪ್ನಾಚ್ಯಾ ಸಗ್ಳ್ಯಾ ಭಕ್ತಾಂಚ್ಯಾ ವಾಂಗ್ಡಾ ದಿಸ್ತಾನಾ, ದೆವಾ ಅಮ್ಚ್ಯಾ ಬಾಬಾಚ್ಯಾ ಇದ್ರಾಕ್ ತುಮಿ ಪವಿತ್ರ್ ಅನಿ ಪರಿಪುರ್ನ್ ಹೊವ್ನ್ ಇಬೆ ರ್‍ಹಾವ್ಕ್ ತೊಚ್ ತುಮ್ಚಿ ಮನಾ ವಿಶ್ವಾಸಾತ್ ಘಟ್ ಕರುಂದಿತ್.